ប្រពន្ធលោក ខៀវ សំផន គឺលោកស្រី សូ សុជាតិ បានអះអាងប្រាប់មន្ត្រីតុលាការសាលាក្ដីខ្មែរក្រហម នៅថ្ងៃទី១០ មិថុនា ថា លោក ខៀវ សំផន ដែលត្រូវជាប្ដី មិនបានប្រព្រឹត្តអំពើអាក្រក់កាប់សម្លាប់ប្រជាពលរដ្ឋនៅពេលលោក ខៀវ សំផន ចូលរួមដឹកនាំប្រទេសរយៈពេលជាងបីឆ្នាំ ដូចការចោទប្រកាន់ទេ។
លោកស្រី សូ សុជាតិ អាយុ ៦២ឆ្នាំ សម្បុរជ្រះ រាងស្ដើង បានថ្លែងថា លោកស្រីបានរំលឹកប្រវត្តិអនុស្សាវរីយ៍តស៊ូកម្សត់ធ្វើនយោបាយក្នុងព្រៃជាមួយប្ដី ជួនកាលអួលដើមក រលីងរលោងទឹកភ្នែក បានធានាចំពោះសវការថា លោក ខៀវ សំផន ប្ដីលោកស្រី ជាកំពូលស្វាមីដ៏ល្អលើសប្ដីដទៃ និងជាកំពូលអ្នកដឹកនាំស្អាតស្អំ ស្មោះត្រង់ជាតិក្នុងប្រវត្តិសាស្ត្រ មិនពុករលួយ មិនលោភលន់អំណាច ទ្រព្យសម្បត្តិ មិនបំផ្លាញប្រទេសជាតិ។
កូនប្រសាលោក ខៀវ សំផន គឺលោក ទន់ សឿន ក៏បានចូលធ្វើជាសាក្សីក្នុងសវនាការនោះដែរ នៅថ្ងៃទី១០ មិថុនា ហើយក៏បានអះអាងប្រហាក់ប្រហែលគ្នា។
ទាក់ទងការធ្វើសក្ខីកម្មរបស់លោក ខៀវ សំផន នេះ អ្នកសម្របសម្រួលសាលាក្ដីខ្មែរក្រហមនៃសមាគមការពារសិទ្ធិមនុស្សអាដហុក (Adhoc) លោក ឡាត់ គី បានថ្លែងថា ជារឿងមិនពិត និងមិនបានការ។ លោកថា ធម្មតាសង្គមខ្មែរ ប្ដីប្រពន្ធតែងតែការពារគ្នាដូច្នេះហើយ ទោះបីជាមានទំនាស់ធ្ងន់ធ្ងរក្នុងគ្រួសារយ៉ាងណាក៏ដោយ។
សាលាក្ដីខ្មែរក្រហមកំពុងដំណើរការសំណុំរឿងក្ដីលេខ ០០២ ដែលមានលោក ខៀវ សំផន និង នួន ជា ជាជនជាប់ចោទក្នុងការទទួលខុសត្រូវលើជីវិតមនុស្សជិតពីរលាននាក់ស្លាប់ក្នុងរបបខ្មែរក្រហមកាន់អំណាច ពីឆ្នាំ១៩៧៥ ដល់ឆ្នាំ១៩៧៩។
លោក ខៀវ សំផន (ហៅក្រៅ ហែម) ប្រមុខរដ្ឋ (ប្រធានគណៈប្រធានរដ្ឋ ក្នុងរបបកម្ពុជាប្រជាធិបតេយ្យ ត្រូវបានចាប់ខ្លួននៅថ្ងៃទី១៩ ខែវិច្ឆកា ឆ្នាំ២០០៧។
លោកជាប់បទចោទប្រកាន់បី៖ ឧក្រិដ្ឋកម្មប្រឆាំងមនុស្សជាតិ ការរំលោភបំពានធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ ឬ ឧក្រិដ្ឋកម្មសង្គ្រាម និងឧក្រិដ្ឋកម្មប្រល័យពូជសាសន៍លើជនជាតិចាម និងវៀតណាម។
ចំណែកលោក នួន ជា (ឈ្មោះកំណើត ឡុង ប៊ុនរួត) អតីតជាប្រធានរដ្ឋសភា និងអនុលេខាបក្សកុម្មុយនិស្តកម្ពុជា របបខ្មែរក្រហម ត្រូវបានចាប់ខ្លួននៅថ្ងៃ១៩ កញ្ញា ឆ្នាំ២០០៧ ជាប់បទចោទប្រកាន់បីដូចគ្នា។
សាលាក្ដីខ្មែរក្រហមដែលគេហៅជាផ្លូវការថា អង្គជំនុំជំរះវិសាមញក្នុងតុលាការកម្ពុជា នឹងដំណើរការសក្ខីកម្មប្រពន្ធលោក ខៀវ សំផន នៅថ្ងៃទី១១ មិថុនា ជាបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។