ភាគីពាក់ព័ន្ធក្នុងសំណុំរឿង០០២ វគ្គ២ របស់សាលាក្ដីខ្មែរក្រហម ប្រមាណ ១០០នាក់ ជួបជុំគ្នានៅថ្ងៃទី១១ មិថុនា តាមការគ្រោងទុក ដើម្បីពិភាក្សាគ្នាអំពីគម្រោងសំណងសម្រាប់ជនរងគ្រោះក្នុងរបបខ្មែរក្រហម។
អ្នកពាក់ព័ន្ធសំណុំរឿងលេខ០០២ នៃសាលាក្ដីខ្មែរក្រហម ប្រមាណ ១០០នាក់ រួមមានមន្ត្រីតុលាការ មេធាវី សមាគមជនរងគ្រោះ ដើមបណ្ដឹងរដ្ឋប្បវេណី ស្ថាប័នរដ្ឋាភិបាល និងម្ចាស់ជំនួយនានា ជួបពិភាក្សាគ្នាលើគម្រោងសំណងដែលនឹងដាក់ទៅតុលាការ។
ប្រធានអង្គភាពគាំពារជនរងគ្រោះ លោក ហង្ស វណ្ណៈ ថ្លែងថា ការជួបគ្នានេះ គឺដើម្បីពិភាក្សាគ្នាលើគម្រោងសំណង ដោយសហការជាមួយដៃគូនានា ដើម្បីឱ្យអនុវត្តចេញជាដុំកំភួន និងជាការចងចាំ។
សហមេធាវីនាំមុខសម្រាប់ដើមបណ្ដឹងរដ្ឋប្បវេណី លោក ពេជ អង្គ មានប្រសាសន៍នៅក្នុងសិក្ខាសាលាថា ការពិភាក្សានេះ គឺជាការចាប់ផ្ដើមត្រៀមគិតគូរអំពីគម្រោងសំណង ដែលត្រូវដាក់ទៅតុលាការនៅក្នុងសំណុំរឿង០០២ វគ្គ២ ខាងមុខ។
«សំឡេង»
អតីតជនរងគ្រោះមួយរូប គឺលោក ជុំ ម៉ី មានប្រសាសន៍ថា លោកពេញចិត្តនឹងការពិភាក្សាគ្នាលើគម្រោងសំណងសម្រាប់ប្រយោជន៍ជនរងគ្រោះ។ ក្នុងចំណោមសំណងទាំងឡាយ លោកចង់ឱ្យមានការសង់ស្តូបរំឭកដល់ជនរងគ្រោះនៅតាមវត្តនានា។
«សំឡេង»
លោកមានប្រសាសន៍ថា ជនរងគ្រោះមួយចំនួនក៏ចង់ឱ្យមានជាមន្ទីរពេទ្យ ក៏ប៉ុន្តែលោកយល់ជាការលំបាកក្នុងការថែរក្សា និងផ្គត់ផ្គង់។
មេធាវីដើមបណ្ដឹងរដ្ឋប្បវេណីមួយរូប គឺលោក ហុង គឹមសួន ថ្លែងថា គម្រោងទាមទារសំណងនៅក្នុងសំណុំរឿង០០២ វគ្គ១ ប្រឈមនឹងការលំបាក។
«សំឡេង»
ការចាប់ផ្ដើមពិភាក្សាគ្នាអំពីគម្រោងសំណងសម្រាប់សំណុំរឿង០០២ វគ្គ២ គឺផ្អែកតាមលំនាំគម្រោងសំណងចំនួន ១៣ចំណុច ដែលធ្វើឡើងដោយអង្គភាពគាំពារជនរងគ្រោះ និងក្រុមសហមេធាវីនាំមុខ សហការជាមួយដៃគូពាក់ព័ន្ធដទៃទៀត នៅក្នុងសំណុំរឿង០០២ វគ្គ១ កន្លងមក។
គម្រោងសំណង ១៣គម្រោងនោះ គឺគម្រោងបង្កើតឱ្យមានទិវាចងចាំ ការផ្ដួចផ្ដើមការចងចាំជាសាធារណៈ ការសង់ស្តូបរំឭកដល់ជនរងគ្រោះក្នុងរបបខ្មែរក្រហមនៅភ្នំពេញ និងប្រទេសបារាំង ការព្យាបាលផ្លូវចិត្ត ចងក្រងក្រុមជួយគ្នាសម្រាប់ស្ដារនីតិសម្បទា ការតាំងពិព័រណ៍ស្ដីពីការជម្លៀសដោយបង្ខំ ការចងក្រងមេរៀនស្ដីពីការជម្លៀសដោយបង្ខំដាក់បញ្ចូលក្នុងកម្មវិធីសិក្សារបស់រដ្ឋ ការសាងសង់មជ្ឈមណ្ឌលសិក្សាសន្តិភាពនៅវត្តសំរោងក្នុង ក្នុងខេត្តបាត់ដំបង ការចងក្រងសៀវភៅស្ដីអំពីដើមបណ្ដឹងរដ្ឋប្បវេណី ការបោះពុម្ព និងចែកចាយសាលក្រមក្នុងសំណុំរឿង០០២ វគ្គ១ និងការបោះពុម្ពឈ្មោះជនរងគ្រោះនៅក្នុងគេហទំព័រសាលាក្ដីខ្មែរក្រហម។
មន្ត្រីអង្គភាពគាំពារជនរងគ្រោះថ្លែងថា គម្រោងសំណងទាំងនេះ នឹងត្រូវតុលាការសម្រេចដោយចេញសាលក្រមនៅថ្ងៃទី៧ ខែសីហា ខាងមុខ។ ក៏ប៉ុន្តែ នៅពេលនេះមានគម្រោងខ្លះរកបានម្ចាស់ជំនួយសម្រាប់អនុវត្តហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។