ជនជាប់ចោទទាំងពីរ ជាថ្មីម្ដងទៀត បានបដិសេធថា ពួកគាត់មិនបានដឹងពីទុក្ខវេទនារបស់ពលរដ្ឋកម្ពុជា ទេ នៅពេលនោះ។
ជនរងគ្រោះ ៤រូប ដែលតាំងខ្លួនជាដើមបណ្ដឹងរដ្ឋប្បវេណីនៅក្នុងសំណុំរឿង ០០២ នៅថ្ងៃទី៣០ ឧសភា សុទ្ធតែបានថ្លែង និងបង្ហាញអំពីការឈឺចាប់ និងខូចខាតរបស់ខ្លួន ដែលបានទទួលរងកាលពីក្នុងរបបកម្ពុជាប្រជាធិបតេយ្យខ្មែរក្រហម ចន្លោះពីឆ្នាំ១៩៧៥ ដល់ ១៩៧៩។
ដើមបណ្ដឹងរដ្ឋប្បវេណីទី១ វ័យ ៧៩ឆ្នាំ ឈ្មោះ នូ ហ៊ន់ អតីតអ្នកខេត្តព្រៃវែង បានថ្លែងអំពីការឈឺចាប់ និងទុក្ខសោកដែលលោកត្រូវបាត់បង់កូនស្រីម្នាក់ និងបងប្អូនសាច់ញាតិមួយចំនួនដទៃទៀត នៅក្នុងអំឡុងពេលលោកជម្លៀសចេញពីទីក្រុងភ្នំពេញ នៅខែមេសា ឆ្នាំ១៩៧៥ និងក្នុងរបបនេះទាំងមូល។
លោក នូ ហ៊ន់ ថ្លែងថា ជនជាប់ចោទនៅក្នុងសាលាក្ដីខ្មែរក្រហម តែងតែបដិសេធថាមិនដឹងពីហេតុការណ៍នៅក្នុងសម័យនោះទេ។ ទាក់ទងនឹងបញ្ហានេះ លោកបានចោទសួរថា តើជនជាប់ចោទដឹងទេ នៅពេលនោះដែលកម្មាភិបាលក៏បាត់ខ្លួន តើអ្នកណាសម្លាប់អ្នកទាំងនោះ? ហើយម្យ៉ាងទៀត តើខ្មែរក្រហមការពារទឹកដីដើម្បីអ្វី នៅពេលដែលគេសម្លាប់ប្រជាពលរដ្ឋនោះ?
ឆ្លើយតបនឹងសំណួររបស់ដើមបណ្ដឹងរដ្ឋប្បវេណី នូ ហ៊ន់ ជនជាប់ចោទ ខៀវ សំផន បានថ្លែងសុំទោសដើមបណ្ដឹងរដ្ឋប្បវេណីរូបនេះ និងពលរដ្ឋកម្ពុជា ដទៃទៀត ហើយបានបដិសេធដដែលថា គាត់មិនបានដឹងអំពីអ្វីៗដែលជាបញ្ហាទេ នៅក្នុងរបបកម្ពុជាប្រជាធិបតេយ្យនោះ។
ជនជាប់ចោទ ខៀវ សំផន បន្តថា ការចូលរួមរបស់លោកជាមួយពួកខ្មែរក្រហម គឺសឹងជាការចៃដន្យ ហើយក៏ដើម្បីរំដោះប្រទេសជាតិពីសង្គ្រាម។
រីឯជនជាប់ចោទ នួន ជា វិញ ដែលមានតួនាទីជាអនុលេខាបក្សកុម្មុយនិស្តកម្ពុជា ដែលទទួលបន្ទុកផ្នែកអប់រំផ្ទៃក្នុងបក្ស និងជាប្រធានសភាតំណាងប្រជាជនកម្ពុជា ថ្លែងថា មានរឿងខ្លះគាត់ដឹង ប៉ុន្តែមានរឿងជាច្រើនទៀត គាត់មិនបានដឹងទេ ទោះជានៅក្នុងតួនាទីនេះក៏ដោយ។ ក៏ប៉ុន្តែ ក្នុងនាមជាអ្នកដឹកនាំម្នាក់ គាត់ទទួលខុសត្រូវនូវការខូចខាតចំពោះជាតិ ដែលបានកើតឡើង។
ទាក់ទងនឹងការខូចខាត និងបាត់បង់របស់ដើមបណ្ដឹងរដ្ឋប្បវេណី នូ ហ៊ន់ ជនជាប់ចោទ នួន ជា ចូលរួមសម្ដែងមរណទុក្ខជាមួយដើមបណ្ដឹងរូបនេះ។
បន្ទាប់ពីការឆ្លើយតបរបស់ជនជាប់ចោទទាំងពីរ ដើមបណ្ដឹងរដ្ឋប្បវេណី នូ ហ៊ន់ ប្រតិកម្មថា ពាក្យថាអង្គការរបស់ខ្មែរក្រហម អស្ចារ្យ គឺអស្ចារ្យក្នុងការសម្លាប់ ហើយអង្គការដែលប្រកាសថាមានភ្នែកដូចម្នាស់ ឥឡូវនេះត្រូវបានជនជាប់ចោទទាំងពីរឆ្លើយថាមិនដឹងទៅវិញ។ ទោះជាដូច្នេះក្ដី លោក នូ ហ៊ន់ បានសម្ដែងសមានចិត្តចំពោះជនជាប់ចោទ ខៀវ សំផន ខ្លះដែរ។
ដូចគ្នានោះដែរ ជនរងគ្រោះជាដើមបណ្ដឹងរដ្ឋប្បវេណី ៣រូបផ្សេងទៀត គឺលោកស្រី សុផាន់ សុវន្នី លោក យឹន រំដួល និងលោកស្រី ប៉ូ ឌីណា ក៏សុទ្ធតែបានថ្លែងអំពីទុក្ខសោក និងការឈឺចាប់របស់ពួកគាត់ដូចគ្នានឹងលោក នូ ហ៊ន់ ដែរ ដែលពួកគាត់ទាំងនោះខ្លះត្រូវបាត់បង់ឪពុកម្ដាយ កូន និងប្ដី ដោយសារតែការកាប់សម្លាប់។
ដើមបណ្ដឹងរដ្ឋប្បវេណីមួយរូប ឈ្មោះ ប៉ូ ឌីណា ជម្រាបអង្គជំនុំជម្រះថា ប្ដីរបស់លោកស្រីបាត់រហូត ព្រោះតែអង្គការខ្មែរក្រហមយកទៅរៀនសូត្រ។
ជនជាប់ចោទ ខៀវ សំផន បានហៅអំពើកាប់សម្លាប់នៅក្នុងរបបកម្ពុជាប្រជាធិបតេយ្យ ថាជាអំពើឆ្កួតលីលា ដែលប្រព្រឹត្តដោយស្ដេចត្រាញ់នៅតាមតំបន់ ហើយត្រូវតែស៊ើបអង្កេត និងចាប់ពួកទាំងនោះមកជំនុំជម្រះទោស។ ជនជាប់ចោទរូបនេះនៅតែបដិសេធថា គាត់មិនបានដឹងអំពីរឿងនេះទេ។
សវនាការសាលាដំបូង នឹងលើកទៅធ្វើបន្តនៅថ្ងៃអង្គារ ទី៤ ខែឧសភា ហើយអង្គជំនុំជម្រះនឹងបន្តស្ដាប់ការថ្លែងអំពីទុក្ខសោករបស់ដើមបណ្ដឹងរដ្ឋប្បវេណីចំនួន ៣រូបទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។