អង្គជំនុំជម្រះសាលាដំបូងនៃសាលាក្ដីខ្មែរក្រហម ចេញសេចក្ដីព្រមានជាថ្មីដល់ក្រុមមេធាវីការពារក្ដីជនជាប់ចោទ នួន ជា និង ខៀវ សំផន ថា នឹងចាត់វិធានការយ៉ាងម៉ឺងម៉ាត់បំផុត ប្រសិនបើមេធាវីការពារក្ដីណាមួយខកខាន មិនបានចូលរួមសវនាការនៅពេលខាងមុខនេះ។
សេចក្ដីប្រកាសព័ត៌មានរបស់សាលាក្ដីខ្មែរក្រហម ដែលចេញផ្សាយនៅថ្ងៃទី ៣ វិច្ឆិកា អង្គជំនុំជម្រះសាលាដំបូង បង្គាប់របស់ឱ្យភាគីទាំងអស់ ចូលរួមក្នុងសវនាការលើអង្គសេចក្ដី ដែលនឹងប្រព្រឹត្តទៅនៅថ្ងៃទី ១៧ ក្នុងខែវិច្ឆិកានេះ។
ក្នុងសេចក្ដីប្រកាសព័ត៌មានដដែលនេះ សាលាដំបូងបដិសេធចោល ហេតុផលនានា ដែលក្រុមមេធាវីការពារក្ដីទាំងពីរក្រុម លើកឡើងសម្រាប់ការធ្វើពហិការរបស់ខ្លួនកន្លងមក។
កាលពីថ្ងៃទី ១៧ តុលា ក្រុមមេធាវីការពារក្ដីជនជាប់ចោទ បានដើរចេញពីសាលសវនាការ ដោយលើកហេតុផលថា ព្រោះតែបណ្ដឹងដិតចិត្តឱ្យដកចៅក្រម និងបណ្ដឹងសាទុក្ខតុលាការកំពូលមិនទាន់សម្រេច។ ម្យ៉ាងទៀត ក្រុមជនជាប់ចោទ ខៀវ សំផន លើកហេតុផលថា ការចូលរួមសវនាការសំណុំរឿងថ្មី ០០២ វគ្គ ២ ផង ហើយធ្វើការលើបណ្ដឹងឧទ្ធរណ៍ផង ក្រុមគាត់មិនមានពេលគ្រប់គ្រាន់។
មេធាវីការពារក្ដីជនជាប់ចោទ ខៀវ សំផន លោក គង់ សំអុន បញ្ជាក់ថា ខាងលោកនៅតែរក្សាជំហរមិនចូលរួម៖ «ព្រោះថា យើងកំពុងធ្វើការនៅក្នុងការរៀបចំបណ្ដឹងសាទុក្ខ។ ដូច្នេះ យើងអត់អាចបំបែកខ្លួនទៅចូលរួមនៅក្នុងនីតិវិធីសវនាការបានទេបាទ។ ពីព្រោះយើងគិតទៅលើផលប្រយោជន៍របស់កូនក្ដី។ អ៊ីចឹងហើយបានជាយើងអត់ឡើងការពារគ្រាន់តែបង្គ្រប់កិច្ច ពីព្រោះកាលណាយើងឡើងសវនាការ យើងត្រូវការពេលវេលា ដើម្បីរៀបចំសំណុំរឿង គឺយើងត្រូវការពារ យើងត្រូវរៀបចំក្ដី។ អ៊ីចឹងឥឡូវនេះ តុលាការសម្រេចធ្វើពីរថ្ងៃ។ ការឡើងមួយថ្ងៃ យើងត្រូវរៀបមួយថ្ងៃ ឧទាហរណ៍អ៊ីចឹង ក៏អស់ពេលបួនថ្ងៃទៅហើយ។ អ៊ីចឹងយើងមានពេលឯណាទៅរៀបចំបណ្ដឹងសាទុក្ខ។ គឺយើងត្រូវមើលពេលវេលាហ្នឹង»។
អង្គជំនុំជម្រះសាលាដំបូងបញ្ជាក់ថា វិធានការដែលនឹងចាត់ធ្វើម៉ឺងម៉ាត់នៅក្នុងសេចក្ដីប្រកាសព័ត៌មាននេះ គឺជាការជូនដំណឹងដល់ក្រុមមេធាវីការពារក្ដី ខៀវ សំផន និង នួន ជា ឱ្យបានដឹងមុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។