អង្គជំនុំជម្រះសាលាដំបូង នៅថ្ងៃទី២៣ កក្កដា ឆ្នាំ២០១៣ បានសម្រេចបដិសេធចោលសំណើសុំរបស់ភាគីនៅក្នុងសំណុំរឿង ០០២/០១ គឺទាំងភាគីសហព្រះរាជអាជ្ញា និងភាគីមេធាវីការពារក្ដីជនជាប់ចោទ។
ប្រធានអង្គជំនុំជម្រះសាលាដំបូង គឺលោកចៅក្រម និល ណុន បានប្រកាសច្រានចោលសំណើសុំជាច្រើន មានជាអាទិ៍ គឺសំណើសុំរបស់សហព្រះរាជអាជ្ញាដែលសុំឱ្យកោះហៅសាក្សីបន្ថែម សម្រាប់អង្គហេតុសម្លាប់ទាហាន លន់ នល់ នៅទួលពោធិ៍ជ្រៃ ក្នុងខេត្តពោធិ៍សាត់៖ «អង្គជំនុំជម្រះយល់ឃើញថា សាក្សី ធី.ស៊ី.ដាបលយូ ៦៤៤ ធី.ស៊ី.ដាបលយូ ៨០២ ធី.ស៊ី.ដាបលយូ ៨០៣ (TCW 644 TCW 802 TCW 803) និងដើមបណ្ដឹងរដ្ឋប្បវេណីថ្មីនេះ មានលក្ខណៈច្រំដែលទៅនឹងភស្តុតាងដទៃ និងមិនបាននាំដល់ការស្វែងរកការពិតទេ។ ហេតុដូច្នេះ សំណើទាំងនេះត្រូវបដិសេធចោល»។
ចំពោះសំណើសុំរបស់សហព្រះរាជអាជ្ញាមួយទៀត ដែលសុំឱ្យអង្គជំនុំជម្រះពិចារណាសេចក្ដីសម្រេចរបស់ខ្លួនឡើងវិញ ដែលមិនកោះហៅដើមបណ្ដឹងរដ្ឋប្បវេណី ឈ្មោះ ស សារិន មកផ្ដល់សក្ខីកម្មឡើងវិញនោះ ក៏ត្រូវបានបដិសេធដែរ ដោយហេតុថា មិនបានបង្ហាញអំពីកាលៈទេសៈទេ។
ដោយឡែក សំណើសុំរបស់ក្រុមមេធាវីការពារក្ដី នួន ជា ដែលស្នើសុំឱ្យកោះហៅសាក្សីពាក់ព័ន្ធនឹងគោលនយោបាយ ដែលត្រូវបានចោទប្រកាន់នៅក្នុងការវាយប្រហារលើមន្ត្រីសាធារណរដ្ឋខ្មែរ ដែលជាសាក្សីថ្មីជាង ១០០នាក់ ក៏ត្រូវបានអង្គជំនុំជម្រះបដិសេធចោលដែរ ដោយហេតុផលថា សំណើនេះនិយាយច្រំដែល និងមិនមានឱកាសតទល់ទៅនឹងសេចក្ដីថ្លែងការណ៍ ទាក់ទងបញ្ហាសំខាន់ទៅនឹងការចោទប្រកាន់សំខាន់របស់សហព្រះរាជអាជ្ញា៖ «អង្គជំនុំជម្រះយល់ឃើញថា មេធាវីការពារក្ដីខកខានមិនបានបំពេញលក្ខខណ្ឌសមហេតុផល ក្នុងការបង្ហាញអំពីការរកឃើញសាក្សីថ្មី ដែលត្រូវស្នើសុំកោះហៅឱ្យស្របតាមវិធាន ៨៧ អនុវិធាន ៤ នោះឡើយ។ លើសពីនេះទៅទៀត ចំពោះ ... សំណើផ្សេងទៀត នៅពេលខាងមុខលើបញ្ហានេះ នឹងត្រូវចាត់ទុកថាច្រំដែល និងមិនទទួលយកបានឡើយ។ សំណើផ្ទាល់មាត់នេះ ត្រូវច្រានចោល ដែលសម្អាងហេតុលម្អិត នឹងមានចេញជាក្រោយ»។
រីឯសំណើមេធាវីការពារក្ដី ខៀវ សំផន ទាក់ទងទៅនឹងព័ត៌មានរបស់សាក្សីឈ្មោះ នូ មុខ អង្គជំនុំជម្រះបានបង្គាប់ឱ្យអង្គភាពគាំពារសាក្សី និងអ្នកជំនាញ ផ្ដល់នូវព័ត៌មាននេះជាលាយលក្ខណ៍អក្សរផ្លូវការមកអង្គជំនុំជម្រះក្នុងរយៈពេលពីរសប្ដាហ៍។
ក្រៅពីនេះ មានសំណើមួយចំនួនត្រូវបានលោកចៅក្រម និល ណុន ប្រកាសថា បានឆ្លើយតបរួចហើយ ហើយសំណើសុំខ្លះពុំមានភាពចាំបាច់។ ចំពោះសំណើសុំមួយចំនួនទៀត អង្គជំនុំជម្រះសាលាដំបូង នឹងចេញសេចក្ដីសម្រេចនៅក្នុងពេលឆាប់ៗខាងមុខ ដូចជា សំណើរបស់មេធាវីការពារក្ដី នួន ជា ដែលសុំអង្គជំនុំជម្រះកោះហៅសាក្សី ឈ្មោះ រ៉ប់ លែមគីន (Rob Lamkin) ជាអ្នកផលិតភាពយន្តជាដើម។
ប្រធានអង្គជំនុំជម្រះសាលាដំបូងប្រកាសថា បន្ទាប់ពីសវនាការនេះទៅ អង្គជំនុំជម្រះនឹងចាប់ផ្ដើមសវនាការរបស់ខ្លួនឡើងវិញ នៅថ្ងៃទី៩ ខែតុលា ឆ្នាំ២១០៣ ដែលជាសវនាការធ្វើសេចក្ដីសន្និដ្ឋានបញ្ចប់កិច្ចពិភាក្សាដេញដោលក្នុងសំណុំរឿង ០០២ វគ្គ ១។ ក៏ប៉ុន្តែ សាលាដំបូងប្រកាសថា សវនាការលើភស្តុតាងនៅក្នុងសំណុំរឿង ០០២/០១ នៅមិនទាន់បិទបញ្ចប់ទេ រហូតដល់អង្គជំនុំជម្រះតុលាការកំពូលចេញសេចក្ដីសម្រេចលើបណ្ដឹងសាទុក្ខរបស់សហព្រះរាជអាជ្ញា និង នួន ជា ដែលប្រឆាំងនឹងវិសាលភាពនៃសំណុំរឿង ០០២ វគ្គ ១។ កាលវិភាគសម្រាប់សវនាការអាចនឹងកែប្រែវិញ នៅពេលដែលអង្គជំនុំជម្រះតុលាការកំពូលចេញសេចក្ដីសម្រេចលើបណ្ដឹងសាទុក្ខនោះ។
ព័ត៌មានចុងក្រោយមួយនៅល្ងាចថ្ងៃទី២៣ ខែកក្កដា អង្គជំនុំជម្រះតុលាការកំពូល បានចេញសេចក្ដីសម្រេចច្រានចោលបណ្ដឹងសាទុក្ខនោះហើយ។
អង្គជំនុំជម្រះតុលាការកំពូល បានចេញសេចក្ដីបង្គាប់មួយទៀត ដោយឱ្យសាលាដំបូងស្វែងរកលទ្ធភាពបង្កើតក្រុមប្រឹក្សាជំនុំជម្រះទីពីរ ដើម្បីចាប់ផ្ដើមធ្វើសវនាការលើភស្តុតាងទីពីរ គឺសំណុំរឿង ០០២ វគ្គ ២ ឱ្យបានឆាប់តាមតែអាចធ្វើទៅបាន បន្ទាប់ពីការបិទកិច្ចពិភាក្សាដេញដោលក្នុងសំណុំរឿង ០០២ វគ្គ ១ បច្ចុប្បន្ននេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។