សំណើសុំនៅក្រៅឃុំចុងក្រោយដែលលោក ខៀវ សំផន ឡើងស្នើផ្ទាល់មាត់កាលពីដើមខែមេសា នោះ ត្រូវបានតុលាការប្រកាសច្រានចោលជាថ្មី កាលពីថ្ងៃទី២៦ ខែមេសា។
អង្គជំនុំជម្រះវិសាមញ្ញនៃតុលាការកម្ពុជា ឬសាលាក្តីខ្មែរក្រហម ប្រកាសបដិសេធជាថ្មីសំណើសុំនៅក្រៅឃុំរបស់អតីតប្រមុខរដ្ឋខ្មែរក្រហម លោក ខៀវ សំផន ដោយសម្អាងថាតុលាការបារម្ភជាចម្បងនូវសុវត្ថិភាពជនជាប់ចោទ។
មន្ត្រីអ្នកនាំពាក្យសាលាក្តីខ្មែរក្រហម លោក នេត ភក្ដ្រា នៅថ្ងៃទី២៧ មេសា មានប្រសាសន៍ថា សាលាក្តីកំពុងដំណើរការសវនាការសំណុំរឿង០០២/០១ ប្រឆាំងនឹងអតីតមេដឹកនាំខ្មែរក្រហម លើបទចោទឧក្រិដ្ឋកម្មប្រឆាំងមនុស្សជាតិ និងការជម្លៀសដោយបង្ខំ ដែលចាំបាច់ត្រូវតែមានវត្តមានជនជាប់ចោទនៅក្នុងសវនាការ។
លោកបន្តថា សំណុំរឿងនេះគ្រោងនឹងបញ្ចប់នៅរយៈពេលសមស្របមួយ ដើម្បីធានាឲ្យមានការទទួលយកបានពីគ្រប់មជ្ឈដ្ឋាន៖ «បដិសេធចោល ហើយបង្គាប់ឲ្យឃុំខ្លួនបន្តទៀត អង្គជំនុំជម្រះលើកឡើងពីហេតុផលមួយចំនួន វត្តមានចាំបាច់របស់គាត់នៅតុលាការ សន្តិសុខសាធារណៈ សុវត្ថិភាពផ្ទាល់ខ្លួនរបស់គាត់ ការស្នើសុំជាសិទ្ធិរបស់គាត់ ការសម្រេចជាសិទ្ធិរបស់តុលាការ»។
ទោះជាយ៉ាងណាក្តី ជនជាប់ចោទ ខៀវ សំផន ថ្លែងថា ការសម្រេចឲ្យលោកនៅក្រៅឃុំ នឹងមិនប៉ះពាល់អ្វីដល់ដំណើរការកាត់ក្តីរបស់សាលាក្តីទេ ដោយលោកសន្យាថានឹងមិនរត់ចោលស្រុក និងព្រមអនុវត្តគ្រប់បែបយ៉ាងតាមសេចក្តីបង្គាប់របស់តុលាការ៖ «បើសិនជាខ្ញុំបានរស់នៅជុំគ្រួសារខ្ញុំវិញ ចាំបាច់តុលាការអាចកោះហៅខ្ញុំបាន។ ខ្ញុំនឹងមកគ្រប់ការកោះហៅរបស់តុលាការ»។
ក្រៅពីការបដិសេធសំណើរបស់លោក ខៀវ សំផន នេះ សាលាក្តីខ្មែរក្រហម ក៏បានប្រកាសថា សាលាដំបូងសម្រេចបំបែកសំណុំរឿង០០២ ដើម្បីធានាឲ្យមានសាលក្រមស្ថាពរមួយនៅពេលដ៏ខ្លីខាងមុខ។
លោក នេត ភក្ដ្រា បញ្ជាក់ថា សំណុំរឿង០០២/0១ បញ្ចប់ទៅបានអាស្រ័យលើកត្តា ៣សំខាន់ៗ៖ «ទី១ តើនឹងមានបណ្ដឹងបន្ថែមទៀតពីភាគីផ្សេងៗដែរឬទេ? បើសិនមានបណ្ដឹងសាទុក្ខបន្ថែមទៀត នឹងចំណាយពេលទៀត។ ទី២ អាស្រ័យលើសុខភាពរបស់ជនជាប់ចោទ និងទី៣ បញ្ហាជួបប្រទះនឹងកង្វះថវិការបស់សាលាក្តី ដែលជាបញ្ហាសំខាន់ៗដែលធ្វើឲ្យអង្គជំនុំជម្រះត្រូវពិចារណានៅក្នុងការកាត់បន្ថយនីតិវិធីខ្លះៗ»។
តុលាការកំពូលនៃសាលាក្តីកូនកាត់នេះ ធ្លាប់សម្រេចដោះលែងជនជាប់ចោទ អៀង ធីរិទ្ធ ឱ្យនៅក្រៅឃុំរួចហើយកាលពីខែកញ្ញា ឆ្នាំ២០១២។ សេចក្ដីសម្រេចនេះ ធ្វើឡើងតាមសំណើសុំរបស់សហព្រះរាជអាជ្ញា កាលថ្ងៃទី១៤ កញ្ញា ដែលសុំផ្អាកសេចក្ដីសម្រេចដោយសាលាដំបូង ដោះលែងជនជាប់ចោទ អៀង ធីរិទ្ធ ដោយគ្មានលក្ខខណ្ឌ។ ក្រោមហេតុផលថា ដោយសារតែជំងឺវង្វេងវង្វាន់ និងបាត់ការចងចាំរបស់ជនជាប់ចោទកាន់តែធ្ងន់ធ្ងរ មិនអាចចូលរួមតតាំងក្ដីក្នុងសវនាការបាន និងមិនមានសញ្ញាណាមួយប្រសើរឡើងវិញបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។