មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ត្រា បញ្ជាក់បន្ថែមនៅថ្ងៃទី២ ខែតុលា ថា រហូតមកដល់ពេលនេះ សាលាក្ដីខ្មែរក្រហមដំណើរការជាធម្មតា ហើយគ្រប់ភាគីកំពុងត្រៀមសម្រាប់ចូលរួមសវនាការនៅថ្ងៃទី១៦ ខែតុលា៖ «ភាគីពាក់ព័ន្ធនានា ទាំងចៅក្រម ទាំងព្រះរាជអាជ្ញា មេធាវីការពារក្ដីឱ្យដើមបណ្ដឹងរដ្ឋប្បវេណី ព្រមទាំងក្រុមការងារការពារក្ដីជនជាប់ចោទ លោក ខៀវ សំផន និងលោក នួន ជា កំពុងតែត្រៀមខ្លួននៅក្នុងការរៀបចំឯកសារផ្សេងៗ ដើម្បីចូលរួមសវនាការធ្វើសេចក្ដីសន្និដ្ឋានបិទបញ្ចប់ការសួរដេញដោលទៅលើសំណុំរឿង ០០២/០១ ដែលផ្ដោតទៅលើអង្គហេតុពាក់ព័ន្ធឧក្រិដ្ឋកម្មប្រឆាំងមនុស្សជាតិ ដែលមានការជម្លៀសដោយបង្ខំដំណាក់កាលទីមួយ និងទីពីរ ការសម្លាប់ទាហាន លន់ នល់ នៅទួលពោធិ៍ជ្រៃ ក្នុងស្រុកកណ្ដៀង ខេត្តពោធិ៍សាត់»។
លោក នេត្រ ភក្ត្រា ថ្លែងទៀតថា សវនាការសាលាដំបូង ធ្វើសេចក្ដីសន្និដ្ឋាន បិទបញ្ចប់ការសួរដេញដោលលើសំណុំរឿងលេខ ០០២ វគ្គទី ១ នឹងចាប់ធ្វើនៅថ្ងៃទី១៦ រហូតដល់ថ្ងៃទី៣១ ខែតុលា ឆ្នាំ២០១៣។ បន្ទាប់ពីសវនាការនេះទៅ ចៅក្រមសាលាដំបូងលោកនឹងយកពេលវេលាសរសេរសាលក្រមទីមួយ នៅក្នុងសំណុំរឿង ០០២ នេះ ដែលគេរំពឹងថា នឹងអាចប្រកាសជាផ្លូវការនៅក្នុងអំឡុងពាក់កណ្ដាលឆ្នាំ២០១៤ ខាងមុខ។
ទាក់ទងនឹងបញ្ហាថវិកាវិញ លោក នេត្រ ភក្ត្រា ថ្លែងកាលពីពាក់កណ្ដាលខែកញ្ញាថា ខាងភាគីជាតិនៅតែស្វែងរកថវិកាជិត ២លានដុល្លារបន្ថែមទៀត ដើម្បីបន្តការងាររបស់ខ្លួនរហូតដល់ចុងឆ្នាំ២០១៣ នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។