អង្គជំនុំជម្រះសាលាដំបូងនៃសាលាក្ដីខ្មែរក្រហម ផ្អាកសវនាការដោយសារមេធាវីជនជាប់ចោទក្នុងសំណុំរឿង ០០២ វគ្គ ២ ដើរចេញពីសវនាការ នៅរសៀលថ្ងៃទី១៧ តុលា។ នៅថ្ងៃដដែលនេះ ក៏មានជនរងគ្រោះក្នុងរបបខ្មែរក្រហម ដែលជាដើមបណ្ដឹងរដ្ឋប្បវេណីប្រមាណ ៤០០នាក់ ប្រមូលផ្ដុំគ្នានៅមុខច្រកចូលសាលាក្ដី ដើម្បីដាក់ញត្តិទាមទារឱ្យមានសំណងជាបុគ្គល។
ប្រធានអង្គជំនុំជម្រះសាលាដំបូងនៃសាលាក្ដីខ្មែរក្រហម គឺលោកចៅក្រម និល ណុន សម្រេចប្រកាសផ្អាកសវនាការរបស់ខ្លួនមុនម៉ោងកំណត់ បន្ទាប់ពីក្រុមមេធាវីការពារក្ដីឱ្យជនជាប់ចោទ នួន ជា និង ខៀវ សំផន ធ្វើពហិការ ដោយដើរចេញពីបន្ទប់សវនាការ។
លោក និល ណុន៖ «ដោយសារមេធាវីពហិការចាកចេញពីសវនាការ គឺអង្គជំនុំជម្រះមិនអាចដំណើរការតទៅទៀតបានទេ ដូច្នេះ អង្គជម្រះប្រកាសផ្អាកសវនាការថ្ងៃនេះត្រឹមនេះ ហើយសវនាការនឹងលើកទៅបន្តនៅពេលក្រោយ ដែលអង្គជម្រះនឹងជម្រាបជូនដំណឹងដល់ភាគី និងសាធារណជនបានជ្រាបនៅក្រោយកិច្ចប្រជុំរៀបចំសវនាការ ដែលនឹងប្រព្រឹត្តទៅនៅថ្ងៃទី២១ ខែតុលា ឆ្នាំ២០១៤ អាទិត្យក្រោយនេះ»។
ក្រុមមេធាវីការពារក្ដីជនជាប់ចោទទាំងពីរក្រុម បានដើរចេញពីសាលសវនាការដែលប្រព្រឹត្តទៅបានរយៈពេលជាងមួយម៉ោង នៅពេលរសៀលថ្ងៃទី១៧ តុលា គឺភ្លាមៗ បន្ទាប់ពីមេធាវីការពារក្ដីជនជាប់ចោទ ខៀវ សំផន បញ្ចប់សេចក្ដីថ្លែងការណ៍របស់ខ្លួន ដោយពាក្យថាជម្រាបលា៖ «យើងក៏គ្មានអ្វីស្នើសុំទៀតដែរ ដោយហេតុថា អង្គជំនុំជម្រះបានសម្រេចកាលពីម្សិលមិញរួចហើយ ក្នុងការបដិសេធសំណើជាបន្ទាន់របស់យើង ដើម្បីលើកពេលវេលាសវនាការនេះ។ ហេតុដូច្នេះ ខ្ញុំជាចុងក្រោយសុំជម្រាបលាអង្គជំនុំជម្រះចាប់ពីពេលនេះទៅ ហើយយើងខ្ញុំសុំចាកចេញពីបន្ទប់នេះ ដើម្បីទៅរៀបចំបណ្ដឹងសាទុក្ខ។ សុំអរគុណ»។
ចាប់តាំងពីពេលបញ្ចប់សំណុំរឿង ០០២ វគ្គ ១ មក ក្រុមមេធាវីការពារក្ដីឱ្យជនជាប់ចោទ ខៀវ សំផន តែងតែស្នើសុំឱ្យសាលាក្ដីខ្មែរក្រហមសម្រេចលើសំណុំរឿង ០០២ វគ្គ ១ ឱ្យចប់សព្វគ្រប់សិន មុននឹងចាប់ផ្ដើមសំណុំរឿង ០០២ វគ្គ ២ ពីព្រោះភាគីលោកមិនមានពេលគ្រប់គ្រាន់សម្រាប់ធ្វើការលើសំណុំរឿងទាំងពីរក្នុងពេលតែមួយបានទេ។ សំណុំរឿង ០០២ វគ្គ ១ កំពុងនៅក្នុងដំណាក់កាលប្ដឹងសាទុក្ខទៅតុលាការកំពូល ដោយភាគីពិរុទ្ធជននៅឡើយ។ មេធាវីការពារក្ដីឱ្យជនជាប់ចោទ ខៀវ សំផន លោក គង់ សំអុន ថ្លែងជូនអង្គជំនុំជម្រះសាលាដំបូងដោយប្រៀបធៀបថា ការចាប់ផ្ដើមធ្វើសវនាការលើសំណុំរឿង ០០២ វគ្គ ២ នៅពេលដែលបណ្ដឹងសាទុក្ខសំណុំរឿង ០០២ វគ្គ ១ មិនទាន់ចប់សព្វគ្រប់ ដូចគ្នានឹងការចាប់ត្រីពីរដោយដៃមួយដែរ។
នៅមុននេះបន្តិច ជនជាប់ចោទ ខៀវ សំផន ប្រកាសជាឱឡារិកថា គាត់គ្មានបំណងចូលរួមសវនាការសំណុំរឿង ០០២ វគ្គ ២ ទេ ព្រោះគាត់ត្រូវចំណាយពេលការពារក្ដីក្នុងបណ្ដឹងសាទុក្ខរបស់គាត់៖ «ខ្ញុំមិនមានបំណងមកចូលរួមសវនាការទេ។ បើតុលាការបង្ខំឱ្យខ្ញុំចូលរួមសវនាការ ជាការពិតហើយខ្ញុំមិនអាចប្រឆាំងបានទេ ប៉ុន្តែខ្ញុំត្រូវការឱ្យមានការកត់ត្រាក្នុងកំណត់ហេតុឱ្យច្បាស់លាស់ថា រាល់ថ្ងៃខ្ញុំត្រូវមានមុខនៅទីនេះ គឺដោយមានការបង្ខិតបង្ខំ ហើយនេះជាការរំលោភលើសិទ្ធិរបស់ខ្ញុំ ដែលខ្ញុំត្រូវមាន ដើម្បីចូលរួមធ្វើការក្នុងរៀបចំសារណាបណ្ដឹងឧទ្ធរណ៍របស់ខ្ញុំ រហូតដល់ត្រូវបានយកទៅដាក់នោះ»។
ជនជាប់ចោទ នួន ជា ថ្លែងទៅចៅក្រមអង្គជំនុំជម្រះសាលាដំបូងថា លោកបានប្ដឹងដិតចិត្តឱ្យដូរចៅក្រមហើយ ព្រោះចៅក្រមទាំងនោះមិនមានលក្ខណៈសម្បត្តិ ដើម្បីសម្រេចលើរឿងក្ដីរបស់គាត់ទៀតទេ ដោយសារមិនមានឯករាជ្យ ហើយលម្អៀងដូចតុលាការជាតិ ដែលធ្វើការក្រោមរដ្ឋាភិបាលដោយភាពភ័យខ្លាចដែរ។
ជនជាប់ចោទ នួន ជា សុំឱ្យតុលាការបញ្ឈប់សវនាការ ០០២ វគ្គ ២ សិនមុននឹងមានសេចក្ដីសម្រេចអំពីបណ្ដឹងដិតចិត្តរបស់លោក៖ «ប្រសិនបើចៅក្រមមិនផ្អាកសវនាការក្នុងពេលបណ្ដឹងដិតចិត្តកំពុងពិនិត្យ និងសម្រេចនោះ លោកចៅក្រមធ្វើឱ្យខ្ញុំគ្មានជម្រើសផ្សេងទេ។ ខ្ញុំសុំណែនាំ និងស្នើសុំឱ្យមេធាវីរបស់ខ្ញុំឱ្យចេញពីបន្ទប់សវនាការ បន្ទាប់ពីលោក ខៀវ សំផន ប្រកាសពីជំហររបស់គាត់ ហើយនឹងធ្វើពហិការមិនចូលរួមរាល់សវនាការនាពេលខាងមុខនៃសវនាការលើកទីពីរនេះ រហូតដល់បណ្ដឹងដិតចិត្តត្រូវបានសម្រេច»។
ប្រធានអង្គជំនុំជម្រះសាលាដំបូង លោកចៅក្រម និល ណុន ប្រកាសថា អង្គជំនុំជម្រះនឹងសម្រេចអំពីការប្រព្រឹត្តពហិការរបស់ក្រុមមេធាវីទាំងពីរក្រុមនៅពេលខាងមុខ។
សវនាការបន្តរបស់សាលាដំបូងនៅមិនទាន់បានកំណត់នៅឡើយទេ ហើយនៅថ្ងៃទី ២១ តុលាខាងមុខនេះ អង្គជំនុំជម្រះនឹងមានកិច្ចប្រជុំ ដើម្បីរៀបចំសវនាការជាបន្តទៀត។
ស្របពេលដែលសវនាការសាលាដំបូងកំពុងប្រព្រឹត្តទៅ នៅថ្ងៃទី១៧ តុលា នៅឯច្រកចូលខាងក្រៅសាលាក្ដីវិញ ដើមបណ្ដឹងរដ្ឋប្បវេណីប្រមាណ ៤០០ នាក់ នាំគ្នាដាក់ញត្តិទៅចៅក្រមសាលាដំបូង ដោយទាមទារឱ្យមានបញ្ចូលសំណងជាបុគ្គលសម្រាប់ពួកគាត់ ក្នុងម្នាក់ ១៣.៥០០ ដុល្លារ។ ដើមបណ្ដឹងរដ្ឋប្បវេណីមួយរូប គឺលោក ប៊ុន ណែត ថ្លែងនៅបន្ទាប់ពីការដាក់ញត្តិនៅសាលាក្ដីថា លោកនឹងតស៊ូមតិជាមួយសាលាក្ដីរហូតដល់មានសំណងជាបុគ្គល។
លោក ប៊ុន ណែត៖ «ពិសេសគ្រាន់តែថា សំណូមពរឱ្យសាលាក្ដីមួយនេះ សូមលោកមេត្តាជួយពន្លឿននូវញត្តិរបស់ខ្ញុំបាទជាដើមបណ្ដឹងទាមទារសំណងជាបុគ្គលនេះ សូមលោកជួយពន្លឿន។ កាលណាបើសិនជាសំណងរបស់យើងខ្ញុំមិនបានហើយ គឺខ្ញុំនឹងតស៊ូមតិជាបន្តទៀត និងរកយុទ្ធវិធីយុទ្ធសាស្ត្រយ៉ាងម៉េចឱ្យតុលាការមួយនេះ មានការសងជាសំណងជាបុគ្គលដល់យើងខ្ញុំជាដើមបណ្ដឹងរដ្ឋប្បវេណី»។
បន្ទាប់ពីដាក់ញត្តិនៅសាលាក្ដីខ្មែរក្រហម ដើមបណ្ដឹងរដ្ឋប្បវេណីនាំគ្នាទៅដាក់នៅស្ថាប័ននានា មួយចំនួនទៀត ដូចជា ទីស្ដីការគណៈរដ្ឋមន្ត្រី ស្ថានទូតសហរដ្ឋអាមេរិក អាល្លឺម៉ង់ អង់គ្លេស និងការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។