សាក្សីអតីតកុមារពេទ្យនៅមន្ទីរសន្តិសុខស-២១ផ្ដល់សក្ខីកម្មនៅសាលាក្ដីខ្មែរក្រហម
2016.05.02
សាក្សីជាអតីតកុមារពេទ្យមួយរូប នៅមន្ទីរសន្តិសុខ ស-២១ ឬគុកទួលស្លែង ប្រាប់អង្គជំនុំជម្រះសាលាដំបូងសាលាក្ដីខ្មែរក្រហមថា លោកធ្លាប់ព្យាបាលអ្នកទោសដែលគេឃុំនៅទីនោះ។ នេះគឺជាសក្ខីកម្មសាក្សីទី៦ ទាក់ទងនឹងអង្គហេតុឧក្រិដ្ឋកម្មនៅមន្ទីរសន្តិសុខ ស-២១ ឬគុកទួលស្លែង កាលពីក្នុងរបបខ្មែរក្រហម។
អតីតពេទ្យនៅមន្ទីរសន្តិសុខ ស-២១ ឬគុកទួលស្លែង ជាកុមារក្នុងវ័យ ១៦ឆ្នាំ គឺសាក្សីឈ្មោះ ម៉ក់ ធីម ឬ ម៉ក់ ស៊ីធីម អះអាងថា លោកធ្លាប់ព្យាបាលអ្នកទោសដែលរងរបួសដោយសារគេធ្វើទារុណកម្មសួរចម្លើយ៖ «អ្នកទោសដែលខ្ញុំទៅព្យាបាលលាងរបួសហ្នឹង ប្រាប់ខ្ញុំថា គេវាយ គេសួរចម្លើយវាយ។ សួរយ៉ាងម៉េចបានរបកក្រចកអ៊ីចឹង? គេថា បងដកដោយដង្កាប់ក្រចកជើងហ្នឹង អ្នកសួរចម្លើយហ្នឹង។ ឆក់ខ្សែភ្លើងមានប្រាប់អ៊ីចឹងដែរ ប្រាប់ថា ឆក់សន្លប់។ ប៉ុន្តែមិនមែនមកសន្លប់ទេ សន្លប់នៅកន្លែងវា វាបណ្ដើរមកទេ។ មិនមែនសន្លប់យកប្រង់កាទៅទេ»។
សក្ខីកម្មរបស់សាក្សី ម៉ក់ ធីម គឺជាការបញ្ជាក់បន្ថែមទៅនឹងសក្ខីកម្មរបស់អតីតអ្នកទោស ជុំ ម៉ី ដែលកាលពីថ្ងៃទី១៨ ខែមេសា អះអាងក្នុងសវនាការថា អ្នកសួរចម្លើយនៅគុកទួលស្លែង បានវាយដំសួរចម្លើយលោក កាលពីឆ្នាំ ១៩៧៧៖ «វាយកដង្កាប់មួលក្រចកមេជើងហ្នឹងទាញផ្ដាច់។ ពេលយើងឆ្លើយថា យើងអត់ស្គាល់ សេ.អ៊ី.អា កាហ្សេបេ ហ្នឹងទេ។ ពេលហ្នឹងវាវាយថែមទៀត។ វាយហើយ វាយកខ្សែភ្លើងមកញាត់ស្លឹកត្រចៀកយើង។ ញាត់ឆាច់ទៅ ប៊ឹង! ដូចរយះបែកអំពិលអំពែកអ៊ីចឹង។ យើងសន្លប់មួយសន្ទុះធំ។ វាវាយ ១២ថ្ងៃ ១២យប់។ វាវាយពេលព្រឹក ពីម៉ោង ៧ ដល់ម៉ោង ១១។ ម៉ោង ១ រហូតដល់ម៉ោង ៥។ ពីម៉ោង ៦ រហូតដល់ម៉ោង ១០យប់។ ដល់សួរចប់ហើយ បានវាយកទៅដាក់នៅឯលើនោះ ៤ខែ»។
នៅមុនសក្ខីកម្មរបស់សាក្សី ម៉ក់ ធីម បន្តិច អតីតអ្នកសួរចម្លើយមួយរូប គឺលោក ប្រាក់ ខន បញ្ជាក់ថា ការធ្វើទារុណកម្មជាពាក្យត្រូវប្រើជាសាមញ្ញ និងទូទៅនៅគុកទួលស្លែង។ លោកនៅចាំបានថា លោកប្រើមែកឈើតូចៗ វាយអ្នកទោសម្នាក់ឈ្មោះ ឆុន ពេលសួរចម្លើយ៖ «ការកាច់មែកឈើយកមកវាយឈ្មោះ ឆុន ហ្នឹង គឺគាត់ឈឺផ្សាណាស់ មិនមែនមិនឈឺទេ។ ធម្មតា ឱ្យតែវាយឈឺហើយ រមួលខ្លួន។ ពេលវាយនឹងមែកឈើតូចៗ មិនមានឈាមទេ មានតែកន្ទួលស្នាមរំពាត់តែប៉ុណ្ណឹង។ អត់មានសន្លប់ទេ។ ស្នាមកន្ទួលហ្នឹង តែមួយ ឬពីរថ្ងៃបាត់វិញហើយ។ សូមបញ្ជាក់ថា នៅក្នុងពេទ្យ ស-២១ ទាល់តែអ្នកហ្នឹងវាយទៅរបួសបែកដំបៅពេញខ្លួន ទើបមានពេទ្យព្យាបាលយកចិត្តទុកដាក់។ បើត្រឹមតែកន្ទួលអី ពេទ្យអត់មានទៅជិតទេ»។
ទាក់ទងការព្យាបាល លោក ម៉ក់ ធីម ថ្លែងថា លោកមិនមែនជាគ្រូពេទ្យដែលត្រូវព្យាបាលអ្នកទោសទាំងអស់នៅគុកទួលស្លែងនោះទេ គឺគ្រាន់តែជាអ្នកលាងរបួស និងផ្ដល់ថ្នាំបុរាណដែលផលិតនៅក្រុងតាខ្មៅ ខេត្តកណ្ដាល៖ «ខ្ញុំមានតែលាងរបួសនឹងទឹកអំបិល និងថ្នាំក្រហម ថ្នាំផ្សេងៗ ហើយរុំកុំប្រេស (Compress) ឱ្យគាត់ទៅ។ ដល់ម៉ោងខ្ញុំលាងមួយសាទៀត មិនអាចចោលបានទេ ត្រូវវេនរបស់ខ្ញុំ។ បើមិនលាងទេ គេត្រូវចោទប្រកាន់ខ្ញុំថា បម្រើការមិនល្អ ក៏ត្រូវដាក់ទោសដាក់ពៃរ៍ដែរ»។
រហូតមកដល់ពេលនេះ អង្គជំនុំជម្រះសាលាដំបូង កំពុងស្ដាប់សក្ខីកម្មនានា ទាក់ទងនឹងឧក្រិដ្ឋកម្មនៅមន្ទីរសន្តិសុខ ស-២១ ឬគុកទួលស្លែង ប្រឆាំងជនជាប់ចោទ នួន ជា និង ខៀវ សំផន នៅក្នុងសំណុំរឿង ០០២ វគ្គទី ២។ សហព្រះរាជអាជ្ញាស្នើសុំឱ្យអង្គជំនុំជម្រះកោះហៅសាក្សីមួយចំនួនបន្ថែមទៀតឱ្យបានឆាប់នៅក្នុងអង្គហេតុនេះ។
ក្នុងសវនាការនៅថ្ងៃទី២ ឧសភា ដដែល ក្រុមមេធាវីការពារក្ដីជនជាប់ចោទ នួន ជា និង ខៀវ សំផន សុំអង្គជំនុំជម្រះសាលាក្ដីខ្មែរក្រហម ឱ្យផ្អាកសវនាការបួនសប្ដាហ៍ ដើម្បីឱ្យភាគីខ្លួនមានពេលត្រៀមគ្រប់គ្រាន់។ ប៉ុន្តែអង្គជំនុំជម្រះនៅមិនទាន់សម្រេចលើការស្នើសុំនេះទេ ហើយអង្គជំនុំជម្រះនឹងប្រកាសសេចក្ដីសម្រេចនៅថ្ងៃទី៣ ឧសភា។ អង្គជំនុំជម្រះក៏គ្រោងស្ដាប់សាក្សីមួយរូបទៀត បន្ទាប់ពីសក្ខីកម្មរបស់សាក្សី ម៉ក់ ធីម៕