សាលាក្ដីខ្មែរក្រហមចាប់ផ្ដើមធ្វើសវនាការលើអង្គហេតុការដ្ឋានទំនប់អាងត្រពាំងថ្ម
2015.07.27
ក្រុមចៅក្រមអង្គជំនុំជម្រះសាលាដំបូងនៃសាលាក្ដីខ្មែរក្រហម មុនពេលចាប់ផ្ដើមប្រកាសសាលក្រមសំណុំរឿង ០០២ វគ្គ១ នៅថ្ងៃទី៧ ខែសីហា ឆ្នាំ២០១៤។
អង្គជំនុំជម្រះសាលាដំបូងនៃសាលាក្ដីខ្មែរក្រហម ចាប់ផ្ដើមបន្តនីតិវិធីសវនាការទៀត នៅថ្ងៃទី២៧ កក្កដា ដោយការពិនិត្យភស្តុតាងលើការដ្ឋានការងារអាងត្រពាំងថ្ម ក្នុងសំណុំរឿង ០០២ វគ្គ ២។ ការដ្ឋានការងារអាងត្រពាំងថ្ម គឺជាការដ្ឋានមួយក្នុងចំណោមការដ្ឋាន ៣ ដែលសាលាដំបូងដាក់ជាអង្គហេតុជំនុំជម្រះនៅបច្ចុប្បន្ននេះ។
អង្គជំនុំជម្រះសាលាដំបូង នៃសាលាក្ដីខ្មែរក្រហម ចាប់ផ្ដើមស្ដាប់ការសួរដេញដោលដើមបណ្ដឹងរដ្ឋប្បវេណីទីមួយ ទាក់ទងនឹងអង្គហេតុការងារដោយបង្ខំ នៅការដ្ឋានការងារអាងត្រពាំងថ្ម ក្នុងស្រុកភ្នំស្រុក ខេត្តបន្ទាយមានជ័យ។
ដើមបណ្ដឹងរដ្ឋប្បវេណីទីមួយឈ្មោះ សែន សុផុន ជាប្រជាជនថ្មីជម្លៀសពីទីក្រុងភ្នំពេញ ជម្រាបអង្គជំនុំជម្រះថា លោកត្រូវអង្គការខ្មែរក្រហមបង្ខំឱ្យលើកដីធ្វើទំនប់អាងប្រវែង ៣ម៉ែត្រគីបក្នុងមួយថ្ងៃ ដោយត្រូវងើបតាំងពីម៉ោង ៤ព្រឹករហូតដល់យប់៖ «ពេលរសៀលម៉ោង ១ ចុះធ្វើ។ ធ្វើរហូតទាល់តែយប់ដល់ម៉ោង ៩ ម៉ោង ១០ ព្រោះថា ៣ម៉ែត្រគីបធ្វើមិនហើយទេ។ ធ្វើអត់ហើយគេអត់ឱ្យឈប់។ អត់មានថ្នាំពេទ្យថ្នាំអីទេ។ ឈឺដេកនៅក្នុងរោងនោះឯង សូម្បីតែបាយក៏អត់ចែកឱ្យហូបផង។ អត់មានឱ្យសម្រាក អត់មានពេលសម្រាកទេ»។
លោក សុផុន បន្តថា ឪពុកលោក ដែលជាអតីតទាហានរបប លន់ នល់ ព្រមទាំងម្ដាយ និងបងប្អូនរបស់លោក ត្រូវបានពួកខ្មែរក្រហមសម្លាប់ ហើយមនុស្សផ្សេងទៀតនៅក្នុងក្រុម ចេះតែបាត់ខ្លួនមិនដឹងទៅណា។
ដើមបណ្ដឹងរដ្ឋប្បវេណីរូបនេះ បញ្ជាក់ទៀតថា រូបលោកបានរួចជីវិតពីការសម្លាប់ ដោយសារតែលោករត់គេចខ្លួនពីកងចល័ត៖ «មានមនុស្សស្រីម្នាក់ ខ្ញុំទៅបើកបាយម៉ោង ១០ ហើយ ស្រាប់តែគាត់មកប្រាប់ខ្ញុំភ្លាម។ គាត់ថា ពូ ផុន គេយកពូឯងទៅសម្លាប់ចោលហើយ... ខ្ញុំភ័យណាស់។ គេលួចប្រាប់តិចៗ ថា ពូផុន គេយកពូឯងទៅវាយចោលហើយ។ គេឱ្យមេកងប្រាប់ឈ្លបរួចហើយ ពូឯងរត់ទៅ។ ខ្ញុំយកតែកន្តូបាយរត់គេចទាំងយប់»។
ទាក់ទងនឹងអាងត្រពាំងថ្ម នេះដែរ មុនពេលចាប់ផ្ដើមសវនាការនៅព្រឹកថ្ងៃទី២៧ កក្កដា ភាគីសហព្រះរាជអាជ្ញា បានស្នើសុំយកឯកសារពីសំណុំរឿង ០០៤ មកដាក់ក្នុងសំណុំរឿង ០០២ វគ្គ ២ នេះ។ ក៏ប៉ុន្តែសំណើសុំនេះ ត្រូវបានភាគីមេធាវីការពារក្ដីជនជាប់ចោទ នួន ជា និង ខៀវ សំផន ជំទាស់ថា អាចនឹងធ្វើឱ្យប៉ះពាល់ដល់ដំណើរការសវនាការសំណុំរឿង ០០២ វគ្គ ២។
មេធាវីការពារក្ដីជនជាប់ចោទ នួន ជា មានមន្ទិលអំពីភាពប្រាកដប្រជាអំពីសំណុំរឿង ០០៤ នៅថ្ងៃខាងមុខ៖ «ហេតុអ្វីក៏មិនទុកឱ្យចៅក្រម មេធាវី ០០៣ និង ០០៤ ដោះស្រាយជាមួយសាក្សី ឬក៏ដើមបណ្ដឹងរដ្ឋប្បវេណីនេះទៅ? ហេតុអីបានជាការចាំបាច់ឱ្យសំណុំរឿង ០០២ វគ្គ ២ ដោះស្រាយជាមួយសាក្សី ឬក៏ដើមបណ្ដឹងរដ្ឋប្បវេណីនេះទៅវិញ? ខ្ញុំមិនដឹងថាមានអ្វីនៅពីក្រោយខ្នងនោះឡើយ។ អាចជាការប៉ាន់ស្មាន ប៉ុន្តែអ្វីដែលខ្ញុំអាចប៉ាន់ស្មានបាន គឺថាសំណុំរឿង ០០៣ និង ០០៤ ប្រហែលជានឹងមិនមាន ឬក៏ប្រហែលជាមិនកើតឡើង។ ហេតុដូច្នេះហើយ ទើបយើងដាក់បញ្ចូលឯកសារជាច្រើន ភស្តុតាងជាច្រើនពីសំណុំរឿង ០០៣ និង ០០៤ មកចូលក្នុងសំណុំរឿង ០០២ ទៅវិញ»។
អង្គហេតុការដ្ឋានធ្វើទំនប់អាងត្រពាំងថ្ម អង្គជំនុំជម្រះគ្រោងស្ដាប់សាក្សីចំនួន ១១នាក់។ ប៉ុន្តែដោយសារមានបញ្ហាឯកសារបន្ថែមនេះ អង្គជំនុំជម្រះសាលាដំបូងសម្រេចកែសម្រួលកាលវិភាគមិនធ្វើសវនាការស្ដាប់សាក្សីអំពីការដ្ឋានទំនប់អាងត្រពាំងថ្មទេ នៅសប្ដាហ៍ក្រោយ គឺអង្គជំនុំជម្រះនឹងផ្ដល់ឱកាសឱ្យភាគីនានា ពិនិត្យលើឯកសារ ដែលបានស្នើសុំដាក់បន្ថែមជាច្រើន នៅរយៈពេលចុងក្រោយថ្មីៗ នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
ខ្មែរក្រហម
