ជនរងគ្រោះក្នុងរបបខ្មែរក្រហម ដែលតាំងខ្លួនជាដើមបណ្ដឹងរដ្ឋប្បវេណីនៃសាលាក្ដីជាង ២០០ នាក់ ជួបជុំនៅរាជធានីភ្នំពេញ ពិភាក្សាគ្នាអំពីសំណុំរឿងលេខ ០០២ និងការវិវឌ្ឍនៃសាលាក្ដីខ្មែរក្រហម។
កិច្ចប្រជុំនេះរៀបចំដោយអង្គភាពគាំពារជនរងគ្រោះនៃសាលាក្ដីខ្មែរក្រហម នៅថ្ងៃទី៦ តុលា និងជាកិច្ចប្រជុំមួយ ដែលផ្ដល់ឱកាសឱ្យដើមបណ្ដឹងរដ្ឋប្បវេណីជាង ២០០នាក់ មកពីរាជធានីភ្នំពេញ និងខេត្តចំនួន ១៣ ជួបពិភាក្សាជាមួយមេធាវីរបស់ខ្លួន និងមន្ត្រីសាលាក្ដី។ប្រធានអង្គភាពគាំពារជនរងគ្រោះ នៃសាលាក្ដីខ្មែរក្រហម លោក ហង្ស វណ្ណៈ មានប្រសាសន៍ថា ការជួបប្រជុំជាមួយដើមបណ្ដឹងរដ្ឋប្បវេណីជាង ២០០ នាក់នេះ គឺដើម្បីផ្សព្វផ្សាយសាលក្រមរបស់សាលាដំបូង ដែលកាលថ្ងៃទី ៧ ខែសីហា កាត់ទោសឱ្យអតីតមេដឹកនាំជាន់ខ្ពស់ខ្មែរក្រហមចំនួនពីររូប គឺ នួន ជា និង ខៀវ សំផន ជាប់ពន្ធនាគារអស់មួយជីវិត៖ «សំឡេង»។
លោកបញ្ជាក់ដែរថាក្នុងកិច្ចប្រជុំនេះ ក៏នឹងមានពិភាក្សាអំពីការដាក់គម្រោងសំណងដែរ។ ដើមបណ្ដឹងខ្លះទាមទារឱ្យមានសំណងជាបុគ្គលឯកជន។
ប្រធានការិយាល័យរដ្ឋបាលស្ដីទី លោក ក្រាញ់ តូនី មានប្រសាសន៍ថា ការទាមទារសំណងជាបុគ្គលជាសិទ្ធិរបស់ជនរងគ្រោះ ក៏ប៉ុន្តែការអនុវត្តន៍តាមច្បាប់របស់សាលាក្ដីនេះ មិនអាចធ្វើទៅបានទេ៖ «សំឡេង»។
កិច្ចប្រជុំនេះក៏ជាពិធីចែកសាលក្រមសង្ខេប និងពិស្ដារស្ដីពីដំណើរការក្ដី ០០២ វគ្គ១ ដែលប្រកាសដោយសាលាដំបូងនៅថ្ងៃទី ០៧ ខែសីហាកន្លងទៅ។ សាលាដំបូងបានកាត់ទោស ពិរុទ្ធជន នួន ជា និងខៀវ សំផន ឱ្យជាប់គុកអស់មួយជីវិត។
ឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ប្រចាំកម្ពុជា លោក Joachim Baron von Marschall ថ្លែងនៅឯកិច្ចប្រជុំនេះថា ការចេញសាលក្រមលើសំណុំរឿង ០០២ វគ្គ ១ គឺជាចំណុចសម្គាល់ផ្នែកតុលាការដ៏សំខាន់មួយ ចំពោះវិនាសកម្មនៃរបបខ្មែរក្រហម។ លោកថាជាការសំខាន់ដែលត្រូវផ្សព្វផ្សាយសាលក្រមនេះ ដើម្បីបង្ហាញថា ទីបំផុតជនរងគ្រោះទទួលបានយុត្តិធម៌៖ « ដូចអ្នកដឹងស្រាប់ហើយថា ប្រទេសអាល្លឺម៉ង់ មានប្រវត្តិសាស្ត្រនៃបញ្ហាដូចគ្នានេះ នៅក្នុងទសវត្សឆ្នាំ ១៩៣០ ដល់ ១៩៤០។ នៅចំពោះមុខប្រវត្តិសាវតានេះហើយ ទើបប្រទេសអាល្លឺម៉ង់ ចាប់អារម្មណ៍ខ្លាំងនឹងការសម្រេចក្ដីរបស់សាលាក្ដីខ្មែរក្រហមនេះ » ។
លោកបន្តថាប្រទេសអាល្លឺម៉ង់ គឺជាប្រទេសផ្ដល់ជំនួយសំខាន់មួយ ចាប់តាំងពីពេលសាលាក្ដីមួយនេះបង្កើតមក។ លោកថាប្រទេសអាល្លឺម៉ង់នឹងបន្តផ្ដល់ជំនួយដល់សាលាក្ដីនេះទៀត។
ដើមបណ្ដឹងរដ្ឋប្បវេណីជាច្រើនរីករាយនឹងទទួលយកសាលក្រមសំណុំរឿងលេខ ០០២ វគ្គ ១។ ដោយឡែកមានដើមបណ្ដឹងរដ្ឋប្បវេណីមួយរូប មិនទទួលស្គាល់សាលក្រមនេះទេ ដោយចាត់ទុកថា ជាសាលក្រមមិនមានយុត្តិធម៌។
សាលាក្ដីខ្មែរក្រហមកាលពីថ្ងៃទី ៧ ខែសីហា បានកាត់សេចក្ដីអតីតមេដឹកនាំជាន់ខ្ពស់ខ្មែរក្រហមចំនួនពីររូប គឺ នួន ជា និង ខៀវ សំផន ជាប់ពន្ធនាគារអស់មួយជីវិត ទាក់ទងសំខាន់នឹងការជម្លៀសដោយបង្ខំ និងការសម្លាប់អតីតអ្នករដ្ឋការរបបសាធារណរដ្ឋខ្មែរ។
សាលាដំបូងនៃសាលាក្ដីខ្មែរក្រហម គ្រោងបើកសវនាការលើសំណុំរឿង ០០២ វគ្គ ២ ទៀត នៅថ្ងៃទី ១៧ ខែតុលានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។