សាលាដំបូងនៃសាលាក្ដីខ្មែរក្រហមបើកសវនាការពិនិត្យភស្តុតាងលើសំណុំរឿង ០០២ ជាបន្ត នៅថ្ងៃទី២២ ខែមេសា បន្ទាប់ពីការសម្រាកបុណ្យចូលឆ្នាំខ្មែរកាលពីសប្ដាហ៍មុន។ សវនាការបន្តនេះ អង្គជំនុំជម្រះស្ដាប់សាក្សីឈ្មោះ ឈូក រីន ដែលជាអតីតមេបញ្ជាការកងទ័ពខ្មែរក្រហមមួយរូប នៅខេត្តកំពត ជុំវិញទំនាក់ទំនងការងាររបស់គាត់ជាមួយមេដឹកនាំបក្សកុម្មុយនិស្តកម្ពុជា។
នៅពេលចាប់ផ្ដើមសវនាការនៅព្រឹកថ្ងៃទី២២ ខែមេសា ឆ្នាំ២០១៣ សាក្សី ឈូក រីន ដែលជាសមាជិកបក្សកុម្មុយនិស្តកម្ពុជា និងជាមេទ័ពខ្មែរក្រហមមួយរូប បានស្នើសុំឱ្យអង្គជំនុំជម្រះសាលាដំបូង ដោះលែងជនជាប់ចោទ ខៀវ សំផន។
សាក្សី ឈូក រីន អះអាងពីហេតុផលថា ជនជាប់ចោទ ខៀវ សំផន មិនមែនជាមេដឹកនាំជាន់ខ្ពស់ក្នុងបក្សកុម្មុយនិស្តកម្ពុជាទេ៖ «មេដឹកនាំរបស់ខ្ញុំ លោក អៀង សារី អី គាត់ស្លាប់បាត់បង់ជីវិតទៅខ្ញុំស្ដាយ។ ស្ដាយដែលមិនបានឮខ្ញុំនិយាយ ហើយឥឡូវនេះ មេដឹកនាំរបស់ខ្ញុំដែលថា មេបក្សកុម្មុយនិស្តកម្ពុជា នៅតែលោក នួន ជា មួយទេ ហើយចំពោះមុខហ្នឹង។ ខ្ញុំចង់និយាយ ហើយខ្ញុំបានជួបចៅក្រមស៊ើបអង្កេតអី ខ្ញុំថា ខៀវ សំផន ហ្នឹង ខ្ញុំមិននិយាយអីទេ ខ្ញុំសុំថា ឱ្យតុលាការដោះលែងគាត់ទៅ។ គាត់មិនមែនអ្នកទទួលខុសត្រូវកុម្មុយនិស្តជាន់ខ្ពស់ទេ។ ខ្ញុំសុំអ៊ីចឹង»។
លោកអះអាងទៀតថា ជនជាប់ចោទ ខៀវ សំផន គ្រាន់តែជាមេដឹកនាំខ្មែរក្រហមមួយរូប ដែលមានតែឈ្មោះ ហើយគ្មានអំណាច។
លោក ឈូក រីន បញ្ជាក់ថា មេដឹកនាំរបស់លោកនៅក្នុងសាលាក្ដីខ្មែរក្រហម មានពីរនាក់ គឺជនជាប់ចោទ នួន ជា និង អៀង សារី។ លោក ឈូក រីន ថ្លែងថា លោកសោកស្ដាយ ពេលដែលអតីតមេរបស់លោកឈ្មោះ អៀង សារី ស្លាប់ទៅ ដោយមិនបានឮលោកនិយាយបំភ្លឺតុលាការ។
សាក្សី ឈូក រីន ដែលធ្លាប់បួសជាព្រះសង្ឃពុទ្ធសាសនា បានចូលរួមចលនាតស៊ូជាមួយបក្សកុម្មុយនិស្តកម្ពុជា របស់ក្រុមខ្មែរក្រហម ចាប់តាំងពីដើមទសវត្សឆ្នាំ១៩៧០ រហូតដល់ ១៩៩៤។
លោក ឈូក រីន បច្ចុប្បន្ន ជាទណ្ឌិតជាប់ពន្ធនាគារអស់មួយជីវិត នៅមជ្ឈមណ្ឌលកែប្រែទី១ ព្រៃស បន្ទាប់ពីតុលាការជាតិរកឃើញថា គាត់មានកំហុសក្នុងការសម្លាប់ជនបរទេស ៣នាក់ នៅភ្នំវល្លិ៍ ក្នុងខេត្តកំពត កាលពីឆ្នាំ១៩៩៤ បន្ទាប់ពីការវាយប្រហារលើខ្សែរថភ្លើង។
សាក្សី ឈូក រីន ត្រូវបានសហព្រះរាជអាជ្ញាសួរដេញដោលអំពីទំនាក់ទំនងការងារ និងការទទួលបញ្ជាផ្សេងៗ រវាងមេដឹកនាំជាន់ខ្ពស់ខ្មែរក្រហម និងរូបគាត់ ចាប់តាំងពីពេលចូលតស៊ូរហូតមកដល់ពេលជម្លៀសពលរដ្ឋចេញពីក្រុង ដើម្បីរកទំនាក់ទំនងជនជាប់ចោទ នួន ជា។
សហសហព្រះរាជអាជ្ញាបានអានឯកសារសក្ខីកម្មរបស់គាត់ ដែលធ្លាប់បានបំភ្លឺដល់សហចៅក្រមស៊ើបអង្កេត កាលពីអំឡុងពេលស៊ើបអង្កេត ក្នុងឆ្នាំ២០០៨ និង ២០០៩។
នៅពេលដំបូង សាក្សី ឈូក រីន បដិសេធមិនឆ្លើយសំណួររបស់ព្រះរាជអាជ្ញាទេ ដោយគាត់លើកហេតុផលថា សុខភាពគាត់មិនល្អ គឺឈឺក ឈឺក្បាល ហើយភ្នែករបស់គាត់មិនអាចអានឯកសារបាន។
ទោះជាដូច្នេះក្ដី ប្រធានអង្គជំនុំជម្រះសាលាដំបូង លោកចៅក្រម និល ណុន សម្រេចបន្តសវនាការដោយលើកហេតុផលថា គ្រូពេទ្យមិនបានផ្ដល់អនុសាសន៍ឱ្យអង្គជំនុំជម្រះផ្អាកសវនាការស្ដាប់សាក្សីរូបនេះទេ៖ «គ្រូពេទ្យបានផ្ដល់ការសន្និដ្ឋានមកអង្គជំនុំជម្រះថា លោកមានការកត់សម្គាល់អំពីការត្អូញត្អែរថា ឈឺក្បាលខាងស្ដាំពេលអង្គុយ ឬពេលស្ដាប់យូរ ហើយគាត់បានផ្ដល់សេចក្ដីសន្និដ្ឋានថា សភាពជាក់ស្ដែងរបស់គាត់ គាត់អាចចូលរួមស្ដាប់ និងឆ្លើយតបទៅនឹងសំណួរក្នុងសវនាការបាន។ នេះគឺជាមតិយោបល់របស់គ្រូពេទ្យ»។
ក្រោយការសម្រេចរបស់ប្រធានអង្គជំនុំជម្រះ សាក្សី ឈូក រីន ឆ្លើយនឹងសំណួរសហព្រះរាជអាជ្ញា ហើយសវនាការបានបន្តរហូតចប់។
សវនាការនៅថ្ងៃទី២២ ខែមេសា ឆ្នាំ២០១៣ ជនជាប់ចោទ នួន ជា មិនបានចូលរួមដោយផ្ទាល់ទេ គឺគាត់តាមដានសវនាការនៅបន្ទប់ឃុំខ្លួនខាងក្រោមសាលសវនាការ លោកចៅក្រម និល ណុន ប្រកាសថា ដោយសារតែគាត់បញ្ហាអង្គុយមិនបានយូរ។ សវនាការស្ដាប់សាក្សី ឈូក រីន នឹងបន្តទៅថ្ងៃអង្គារ ទី២៣ មេសា ទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។