អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២ ធ្នូ បន្តធ្វើសវនាការស្ដាប់ដើមបណ្ដឹងរដ្ឋប្បវេណីមួយរូប ស្ដីពីការសម្លាប់ជនជាតិវៀតណាម។ ដើមបណ្ដឹងរដ្ឋប្បវេណីវ័យ ៧៣ឆ្នាំ ឈ្មោះ ប្រាក់ ឌឿន ជម្រាបអង្គជំនុំជម្រះពីហេតុការណ៍ក្នុងរបបកម្ពុជាប្រជាធិបតេយ្យ ដែលពួកខ្មែរក្រហមសម្លាប់ជនជាតិវៀតណាម នៅស្រុកបរិបូណ៌ ខេត្តកំពង់ឆ្នាំង។
ដើមបណ្ដឹងរដ្ឋប្បវេណី ប្រាក់ ឌឿន ជម្រាបអង្គជំនុំជម្រះថា លោកនៅតែតក់ស្លុត នៅពេលដែលនិយាយពីការកាប់សម្លាប់ជនជាតិវៀតណាម ក្នុងរបបខ្មែរក្រហម ជាពិសេស ការសម្លាប់កូន ប្រពន្ធ និងម្ដាយក្មេករបស់លោក ដែលជាជនជាតិវៀតណាម៖ «ដល់គេហៅសាច់ញាតិដែលថា មានប្ដីខ្មែរ មានប្រពន្ធវៀតណាមអ៊ីចឹង គេឱ្យទៅទាំងអស់។ ខ្ញុំរាប់ទៅមាន ៧គ្រួសារ។ មុននឹងពេលធ្វើដំណើរទៅគេអត់ជេរវាយអីទេ។ ដើរទៅតាមសម្រួល។ ពេលល្វើយវាឱ្យឈប់តាមត្រពាំងតាមថ្លុក។ ប៉ុន្តែទៅពេលយប់ ពេលទៅដល់កន្លែងកើតហេតុហ្នឹង វាឱ្យខ្ញុំបាទនៅមួយកន្លែងសិន។ កន្លែងនោះគេហៅថា មេលុំទួលរកា ជាកន្លែងដែលធ្វើទារុណកម្មសម្លាប់។ ពេលមេកងដើរទៅ ខ្ញុំកំពុងបោកស្រូវស្រាប់តែពោលថា គ្រួសារគេកម្ទេចអស់ហើយ។ ដល់ព្រឹកឡើងបានខ្ញុំដឹងថា គេកម្ទេចអស់ហើយ អាកូននោះគេលើកឡើងទៅលើ គេរងនឹងចំពុះទុងចាក់យកបណ្ដោយ។ យំយ៉ាងណាទេ មិនជាឈាមយ៉ាងណាទេ សុំមេត្តាជួយ ខ្ញុំនៅមានអារម្មណ៍តក់ស្លុតណាស់»។
លោក ប្រាក់ ឌឿន ជាជនជាតិខ្មែរ កើតនៅភូមិកំពង់ព្រះ ឃុំឆ្នុកទ្រូ ស្រុកបរិបូណ៌ កំពង់ឆ្នាំង បានរៀបការប្រពន្ធទីមួយរបស់លោកជាជនជាតិវៀតណាម ឈ្មោះ ប៊ូ សំបាន នៅសម័យសម្ដេច សីហនុ ក្នុងឆ្នាំ១៩៦៦។ ប្រពន្ធលោកកើតនៅឃុំស្រុកជាមួយគ្នា ចេះនិយាយខ្មែរច្បាស់ តែម្ដាយក្មេករបស់លោកនិយាយប៉ៃឡាំ។
ដើមបណ្ដឹងរដ្ឋប្បវេណីរូបនេះបញ្ជាក់ថា ហេតុការណ៍មុនពេលដែលនាំឱ្យខ្មែរក្រហមសម្លាប់ប្រពន្ធរបស់លោក និងសមាជិកគ្រួសារប្រាំមួយផ្សេងទៀតនោះ គឺលោកឮពួកខ្មែរក្រហមចោទជនជាតិវៀតណាម ទាំងនោះថា ជាជនស៊ីរូងផ្ទៃក្នុងនៅសង្គមកម្ពុជា៖ «ខ្ញុំបាទបានឮសម្ដីប្រធានកងថា កម្លាំងដែលត្រូវគេប្រមូលបងប្អូនប្រជាជនវៀតណាមហ្នឹង ដើម្បីឱ្យធ្វើដំណើរទៅប្រទេសខ្លួនវិញហើយ។ គេក៏ប្រកាសដែរថា បើនរណាចង់ទៅ ឆាប់ទៅឱ្យហើយ តែដោយសារប្រពន្ធខ្ញុំថា មិនព្រមទៅទេ នៅងាប់ជាមួយប្ដីហ្នឹង ក៏សុខចិត្តនៅងាប់មែនដូចពាក្យប្រពន្ធខ្ញុំថា។ ឃើញគេបញ្ជូនវៀតណាម ប្រហែលម្ភៃទៅសាមសិបនាក់តាមទូកមួយនៅសហករណ៍ ទៅប្រទេសវៀតណាម វិញ។ នៅសល់ម្នាក់ គឺឈ្មោះនារី អាំ។ គេប្រាប់ថា ម៉ែឪគេបញ្ជូនទៅអស់មុន នៅសល់តែមួយ គេយកមកទុកនៅសហករណ៍ខ្ញុំនៅដាច់ដោយឡែកពីគ្នា ហើយមិត្តកងទ័ពហ្នឹងគេប្រាប់ថា "មិត្តឯងកុំនិយាយវៀតណាមតទៅទៀត។ និយាយជាភាសាមួយគត់ទៅ គឺភាសាខ្មែរ»។
ការប្រព្រឹត្តចំពោះជនជាតិវៀតណាម នៅក្នុងរបបកម្ពុជាប្រជាធិបតេយ្យ រួមមានការធ្វើបាប និងការកាប់សម្លាប់ គឺឋិតក្នុងបទចោទអំពីឧក្រិដ្ឋកម្មប្រល័យពូជសាសន៍ នៅក្នុងសំណុំរឿងលេខ ០០២ វគ្គ ២ ប្រឆាំងនឹងជនជាប់ចោទ នួន ជា និង ខៀវ សំផន ដែលអង្គជំនុំជម្រះសាលាដំបូងកំពុងធ្វើសវនាការនៅពេលនេះ។
ទាក់ទងនឹងការប្រព្រឹត្តចំពោះជនជាតិវៀតណាម នេះដែរ សាក្សីខ្លះអះអាងថា របបកម្ពុជាប្រជាធិបតេយ្យរបស់បក្សកុម្មុយនិស្តកម្ពុជា មានគោលនយោបាយរបស់ខ្លួន ចាត់ទុកជនជាតិវៀតណាមថា ជាសត្រូវទី១ ហើយបញ្ជាឱ្យសម្លាប់។
ដើមបណ្ដឹងរដ្ឋប្បវេណី ប្រាក់ ឌឿន ជម្រាបអង្គជំនុំជម្រះថា ការប្រមូលជនជាតិវៀតណាម ដែលរៀបការជាមួយជនជាតិខ្មែរ គឺគេសម្លាប់ទាំងកូន បើកូននោះមានម្ដាយជាវៀតណាម។
ការស្ដាប់សក្ខីកម្មរបស់ដើមបណ្ដឹងរដ្ឋប្បវេណី ប្រាក់ ឌឿន ទាក់ទងនឹងការសម្លាប់ជនជាតិវៀតណាម នៅខេត្តកំពង់ឆ្នាំង នេះ នឹងត្រូវធ្វើបន្តទៀតនៅថ្ងៃព្រហស្បតិ៍ ទី៣ ធ្នូទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។