បុរស ៥នាក់ដែលជាអតីតខ្មែរក្រហមផ្តាច់ខ្លួននៅតំបន់ភ្នំវល្លិ នៃឃុំកូនសត្វ ស្រុកឈូក ខេត្តកំពត និងជាតំណាងក្រុមគ្រួសារអតីតខ្មែរក្រហមនៅតំបន់នោះចំនួន ២៦គ្រួសារ នៅព្រឹកថ្ងៃច័ន្ទ ទី២៦ ខែកក្កដានេះ បានអំពាវនាវសុំឲ្យមានការដោះស្រាយបញ្ហាដីធ្លី ក្រោយពីដីដែលមានទំហំ ៥៨ហិកតា កំពុងមានជម្លោះចម្រូងចម្រាស់ជាមួយអ្នកស្រី ហៀវ លន់ អស់រយៈពេល ៥ឆ្នាំមកហើយ ហើយផលដំណាំទាំងឡាយរបស់អ្នកភូមិ កំពុងតែត្រូវបានគេកម្ទេចចោល។
តំណាងប្រជាពលរដ្ឋដែលមកដល់រាជធានីភ្នំពេញ ដើម្បីស្វះស្វែងរកជំនួយពីអ្នកកាន់អំណាច បានរៀបរាប់នៅក្នុងសន្និសីទកាសែតថា ដីធ្លីនោះជារបស់ពួកគេដែលបានកាន់កាប់ស្របច្បាប់ចាប់តាំងពីឆ្នាំ១៩៩៦មក ក្រោយពីសមាហរណកម្ម។
លោក ឃុត ឃាន មានប្រសាសន៍បណ្តើរ លើករូបថតដីធ្លី និងដំណាំដែលត្រូវបានឈូសបំផ្លាញបណ្ដើរ បានសម្ដែងដូច្នេះ ៖ «នេះទំនាស់កើតឡើងតាំងពីការបាញ់បោះ ឆ្នាំ២០០៥ រហូតមកដល់ឆ្នាំនេះ។ នៅក្នុងចិត្ត វាដូចជាណែនទ្រូងពេក យើងកំពុងធ្វើ ដូចរូបភាពជាក់ស្ដែងអ៊ីចឹង គេចូលទៅកម្ទេចអស់អ៊ីចឹងទៅ»។
ប្រភពពីប្រជាពលរដ្ឋបានអះអាងថា ក្រោយពីសមាហរណកម្ម អាជ្ញាធរមូលដ្ឋានបានចែកដីនោះឲ្យអតីតក្រុមខ្មែរក្រហមផ្ដាច់ខ្លួនក្នុងការធ្វើចម្ការដើម្បីចិញ្ចឹមជីវិត ប៉ុន្តែនៅឆ្នាំ២០០៥ ស្រាប់តែមានទាហានមួយក្រុមបានមករារាំងមិនឲ្យប្រជាជនធ្វើចម្ការ។ ក្រោយមកជម្លោះនោះបានស្ងប់ទៅវិញ ហើយក៏បានលេចមុខអ្នកស្រី ហៀវ លន់ ចេញមកអះអាងថា ជាដីរបស់អ្នកស្រីទៅវិញ។
ការប៉ះទង្គិចជាថ្មីបានកើតឡើង ហើយការប្ដឹងផ្ដល់គ្នាបានចាប់ផ្ដើមឡើងដែរ។ អ្នកភូមិចំនួន ១៩នាក់ ត្រូវបានតុលាការខេត្តកំពត កោះហៅបំភ្លឺ តែមកដល់ពេលនេះគ្មាននរណាម្នាក់ចូលខ្លួនមកបំភ្លឺនៅក្នុងតុលាការនោះឡើយ។ អ្នកស្រុកបដិសេធក្នុងការចូលទៅបំភ្លឺ ដោយភ័យខ្លាចចំពោះការចាប់ខ្លួន។
អាជ្ញាធរមូលដ្ឋានមិនអាចទាក់ទងបានទេ នៅថ្ងៃច័ន្ទដដែលនេះ ប៉ុន្តែមេធាវីរបស់អ្នកស្រី ហៀវ លន់ បានអះអាងថា អ្នកស្រី ហៀវ លន់ បានទិញដីនោះពីទាហានស្របច្បាប់។ លោកមេធាវី ឈីវ ថេង បានចោទថា អ្នកស្រុកគ្មានប័ណ្ណកម្មសិទ្ធិស្របច្បាប់ឡើយ ហើយអ្នកស្រុកមានដីធ្លីនៅក្នុងឃុំកូនសត្វ ប៉ុន្តែមកដណ្ដើមយកដីនៅក្នុងឃុំត្រពាំងព្រីងទៅវិញ ដែលជាដីកូនក្តីរបស់លោកបានទិញ និងបានកាន់កាប់តាំងពីឆ្នាំ២០០៥មក។
លោកមេធាវី ឈីវ ថេង បញ្ជាក់បន្តទៀតដូច្នេះ ៖ «ទៅប្លន់គេកើតអី? ពួកហ្នឹងកាប់ងាប់។ អ៊ីចឹងយើងធ្វើតាមផ្លូវច្បាប់។ គាត់បង្ហាញប័ណ្ណគាត់មកអ៊ីចឹងទៅ គាត់នៅក្នុងឃុំកូនសត្វ ហើយអាដីទំនាស់នៅក្នុងភូមិត្រពាំងព្រីងខាងជើង»។
ក្នុងគ្រាដែលមានជម្លោះចម្រូងចម្រាសនេះ តុលាការខេត្តកំពត ចេញដីកាការពារមួយកាលពីពេលថ្មីៗនេះ ដោយផ្ដល់ភាគីអ្នកស្រី ហៀវ លន់ កាន់កាប់ដីនោះជាបណ្ដោះអាសន្នទម្រាំមានការដោះស្រាយ។ ប៉ុន្តែមន្ត្រីអ្នកការពារផ្នែកសិទ្ធិមនុស្សនៃអង្គការលីកាដូ លោកស្រី ង៉ែត សូរ្យសែង វិញបានបញ្ជាក់ថា ដីកាការពារនោះមិនយុត្តិធម៌ទេសម្រាប់ប្រជាពលរដ្ឋ។
លោកស្រី ង៉ែត សូរ្យសែង មានប្រសាសន៍ថា ៖ «ប្រជាពលរដ្ឋគាត់មានភាពស្របច្បាប់ច្រើន ហើយដោយឡែកទៀតគឺថា គាត់ជាអ្នកអាស្រ័យផលផ្ទាល់នៅលើដីហ្នឹង»។
ក្រោយពេលតុលាការខេត្តកំពត បានចេញដីកាការពារឲ្យដីនេះទៅអ្នកស្រី ហៀវ លន់ គ្រប់គ្រងបណ្ដោះអាសន្ន ប៉ុន្តែក្រសួងមហាផ្ទៃវិញ បានចេញស.ជ.ណ កាលពីចុងខែមិថុនា បញ្ជាឲ្យអាជ្ញាធរខេត្តផ្អាកសកម្មភាពរបស់អ្នកស្រី ហៀវ លន់ វិញ ទម្រាំមានការដោះស្រាយទៅវិញ៕