លោក អំ សំអាត ប្រធានក្រុមស៊ើបអង្កេតនៃអង្គការការពារសិទ្ធិមនុស្សក្រៅរដ្ឋាភិបាលមួយ ហៅកាត់ថា លីកាដូ បានមានប្រសាសន៍ជុំវិញស្ថានការណ៍ថ្មីនៃប្រជាពលរដ្ឋរងគ្រោះជាច្រើនរយគ្រួសារឲ្យដឹងថា ស្ថានការណ៍នៅតែតានតឹងនៅទ្បើយទេ។
លោក អំ សំអាត បានបញ្ជាក់ថា ៖ «អំពើនៃការរុះរើឬក៏ដុតបំផ្លិចបំផ្លាញផ្ទះហ្នឹងគឺចប់ ប៉ុន្តែបច្ចុប្បន្នគឺគេនៅស្វែងរកតំណាងប្រជាពលរដ្ឋក៏ដូចជាអ្នកដែលតវ៉ា»។
ប្រជាពលរដ្ឋចំនួន៤នាក់ដែលរងការចាប់ខ្លួនភ្លាមៗនោះ មានឈ្មោះ ទ្បុង សារិទ្ធ, ឈ្មោះ ចាន់ សារី ហៅ សួស្តី, ឈ្មោះ ម៉ា ប៊ុនឈឿន និងឈ្មោះ ម៉ៅ ខ្លឹម ត្រូវបានចាប់ខ្លួនជាថ្មីកាលពីពេលថ្មីៗនេះ ក្រោយពីត្រូវបានដោះលែងរួចម្តងទៅហើយ។
តំណាងប្រជាពលរដ្ឋម្នាក់រស់នៅក្នុងឃុំកូនគ្រៀល ក្រុងសំរោង ខេត្តឧត្តរមានជ័យ ដែលកំពុងតែរត់គេចខ្លួនមកទីក្រុងភ្នំពេញដើម្បីសុំកិច្ចអន្តរាគមពីក្រុមអង្គការការពារសិទ្ធិមនុស្សក្រៅរដ្ឋាភិបាលឲ្យជួយដោះស្រាយបញ្ហារបស់គាត់ បានថែ្លងថា ៖ «ខ្ញុំមកដល់ក្រុងភ្នំពេញហ្នឹង គឺយើងខ្ញុំរងគ្រោះដោយសារពួកក្រុមហ៊ុនហ្នឹង ឬក្រុមសមត្ថកិច្ចរបស់ខេត្តហ្នឹង គេតាមចាប់ខ្ញុំយកមកដាក់ពន្ធនាគារ ចោទថា ពួកយើងខ្ញុំហ្នឹងជាជនល្មើសកាប់បំផ្លាញព្រៃឈើ»។
សុខ សេរី ៖ លោកបានរស់នៅលើដីហ្នឹងតាំងពីឆ្នាំណាមក? តំណាងពលរដ្ឋ ៖កាលពីអតីតមកគឺខ្ញុំទៅរស់នៅក្នុងភូមិហ្នឹងនៅឆ្នាំ១៩៩៨។
តំណាងប្រជាពលរដ្ឋម្នាក់ទៀតដែលកំពុងតែរត់គេចខ្លួនមកទីក្រុងភ្នំពេញដែរ បានថ្លែងថា ៖ «វាដុតផ្ទះចោលអស់១២៩ខ្នងឥឡូវនេះ។ ប្រជាពលរដ្ឋហ្នឹងអត់មានបាយ មានទឹកអីហូបទេ យំរហេមរហាម។ ខ្លះនៅតាមថ្នល់ អាខ្លះនៅតាមសាលាឆទាន»។
នៅមិនទាន់មានការបំភ្លឺណាមួយនៅទ្បើយទេពីតំណាងក្រុមហ៊ុនឯកជនចំនួន៤ដែលរងការចោទប្រកាន់ខាងលើនេះ ប៉ុន្តែប្រភពពីអាជ្ញាធរមូលដ្ឋានបានអះអាងថា ក្រុមហ៊ុនទាំង៤នោះបានទទួលសិទ្ធិកាន់កាប់ដីធ្លីជាង១ម៉ឺនហិកតារពីរដ្ឋាភិបាលកម្ពុជាកាលពីឆ្នាំ២០០៥ ដើម្បីដាំដើមអំពៅនៅទីនោះ។
ទាក់ទងនឹងរឿងចម្រូងចម្រាសខាងលើនេះ លោក ពិជ សុឃិន ជាអភិបាលខេត្តឧត្តរមានជ័យ បានមានប្រសាសន៍ដោយសម្រួលស្ថានការណ៍នោះថា ស្រួលបួលវិញហើយ។
លោក ពិជ សុឃិន បានមានប្រសាសន៍ថា ៖ «អត់អីទេ ស្រួលបួល អត់មានអីទេ! ជាង១ពាន់គ្រួសារ ហ្នឹងហើយដោះមួយឆ្នាំមកហើយ ដោះអស់ហើយ នៅសល់តែ២០០ទេ»។
សូមជម្រាបថា ផ្ទះសម្បែងប្រជាពលរដ្ឋចំនួនជាង១០០គ្រួសារនៅក្នុងចំណោមប្រជាពលរដ្ឋសរុបចំនួន២១៤គ្រួសារត្រូវបានឈូសនិងដុតបំផ្លាញចោល កាលពីថៃ្ងសុក្រ ទី៩ ខែតុលាថ្មីៗនេះ នៅក្នុងឃុំកូនគ្រៀល ក្រុងសំរោង ខេត្តឧត្តរមានជ័យ ក្នុងរឿងជម្លោះដីធ្លីជាមួយក្រុមហ៊ុនចំនួន៤ដាំដើមអំពៅនៅលើផៃ្ទដីជាង១ម៉ឺនហិកតារ ក្នុងនោះមានក្រុមហ៊ុនរបស់លោក លី យ៉ុងផាត់ ផងដែរ ដែលជាសមាជិកព្រឹទ្ធសភារបស់គណបក្សប្រជាជនកម្ពុជា នេះបើតាមការអះអាងឲ្យដឹងពីប្រជាពលរដ្ឋនិងសកម្មជនការពារសិទ្ធិមនុស្សក្រៅរដ្ឋាភិបាល៕