ប្រជាពលរដ្ឋ ៣នាក់ ត្រូវបានអាជ្ញាធរស្រុកស្នួល ខេត្តក្រចេះ ចាប់ខ្លួន ដោយចោទពីបទកាប់ទន្ទ្រានដីតំបន់អភិរក្សបរិស្ថាន។ សាច់ញាតិជនរងគ្រោះម្នាក់បញ្ជាក់ថា ការចាប់ខ្លួននេះ គឺជារឿងមិនត្រូវនោះទេ ពីព្រោះប្អូនលោកមិនបានកាប់ទន្ទ្រានដីតំបន់បរិស្ថានឡើយ។
ប្រជាពលរដ្ឋនៅខេត្តកំពង់ចាម ៣នាក់ ដែលបានទៅធ្វើចម្ការនៅស្រុកស្នួល ខេត្តក្រចេះ ត្រូវបានអាជ្ញាធរផ្នែកបរិស្ថានចាប់ខ្លួន ដោយចោទថា កំពុងតែមានសកម្មភាពខុសច្បាប់ដោយគ្រប់គ្រងលើដីអភិរក្សបរិស្ថាន។
បងថ្លៃរបស់ប្រជាពលរដ្ឋត្រូវបានគេចាប់ខ្លួនម្នាក់ លោក វ៉ូច ទ្រា បានឱ្យដឹងថា ប្អូនថ្លៃលោកឈ្មោះ គីម សាវ៉ុន រស់នៅឃុំក្រែក ស្រុកពញាក្រែក ខេត្តកំពង់ចាម បានទៅទិញដីចម្ការស្រាប់ពីប្រជាពលរដ្ឋនៅក្នុងឃុំឃ្សឹម ស្រុកស្នួល ខេត្តក្រចេះ ធ្វើបានរយៈពេលជាង ១ឆ្នាំមកហើយ ដោយមិនមានបញ្ហាអីកើតឡើងនោះទេ ហើយប្អូនរបស់លោកមិនបានដឹងថា ដីនោះជាតំបន់អភិរក្សបរិស្ថាននោះដែរ។
លោកបន្តថា ដីដែលប្អូនលោកនិងប្រជាពលរដ្ឋផ្សេងទៀតដាំដំណាំ ពិសេសដំឡូងនោះ គឺមានតិចតួចប៉ុណ្ណោះ ហើយនៅព្រឹកថ្ងៃ៩ មីនា លោកទទួលដំណឹងពីអ្នកធ្វើចម្ការក្បែរប្អូនថ្លៃលោកប្រាប់ថា ប្អូនលោកត្រូវអាជ្ញាធរផ្នែកបរិស្ថានចាប់ខ្លួន ដែលលោកហៅការចាប់ខ្លួននេះថា គឺជារឿងអយុត្តិធម៌៖ «ដីហ្នឹងហាមឃាត់ហើយបង! ដីខាងសហគមន៍គេ ប៉ុន្តែមិនមាននរណាមកប្រាប់ថា ជាដីហាមឃាត់ទេ ហើយយើងបានទិញពីគេ ទិញតពីគេ ពីអ្នកភូមិតៗគ្នាមក»។
លោកបន្ថែមទៀតថា ប្អូនរបស់លោកមិនទាន់នឹងប្រមូលផលដំឡូងរួចរាល់ផង ស្រាប់តែត្រូវបានគេចាប់បញ្ជូនទៅខាងប៉េអឹមខេត្តក្រចេះ ដើម្បីសាកសួរព័ត៌មានជុំវិញបញ្ហានេះ។
ជំទប់ទី២ ឃុំឃ្សឹម លោក សឹម ជី មានប្រសាសន៍ថា ការចុះចាប់ខ្លួនគឺជាសមត្ថកិច្ចរបស់មន្រ្តីបរិស្ថាន ដោយអះអាងថា ប្រជាពលរដ្ឋទាំងនោះកាន់កាប់ និងរុករានដីព្រៃបរិស្ថាន ដោយមិនបានប្រាប់អាជ្ញាធរឃុំនោះទេ។ លោកបន្តថា តំបន់នោះមានតែឈ្មោះថា ជាតំបន់អភិរក្សព្រៃបរិស្ថានសម្រាប់ជាជម្រកសត្វ ប៉ុន្តែមិនមានព្រៃនោះទេ ពីព្រោះប្រជាពលរដ្ឋបានកាប់រុករានអស់ជាច្រើនឆ្នាំមកហើយ ដោយមានតែព្រៃនៅក្បាលចម្ការតែប៉ុណ្ណោះ ចំណែករឿងចាប់ខ្លួនប្រជាពលរដ្ឋ លោកយល់ថា ជារឿងមិនត្រឹមត្រូវនោះឡើយ។
លោក សឹម ជី៖ «អារឿងនេះមិនត្រឹមត្រូវទេ បើនិយាយទៅកាលពីបង្កើតខាងបរិស្ថានសហគមន៍អីហ្នឹង គឺដើម្បីការពារព្រៃ ប៉ុន្តែអាការឃុបឃិតកន្លងមកហ្នឹង អាពួកវាដើរយកលុយយកកាក់ ហើយប្រជាជនចេះតែកាប់ៗទៅ។ ដល់ឥឡូវហ្នឹងដំណើរវាអត់លុយ ចេះតែដើរចាប់ៗទៅ។ ហើយខ្ញុំមើលឃើញថា វាមិនមានអីអស្ចារ្យថាវាជាព្រៃបរិស្ថាន ព្រៃការពារអីទៀតវាអស់ទៅហើយ»។
លោកបន្ថែមទៀតថា បញ្ហានេះក៏មានប្រជាពលរដ្ឋដែលចំណាកស្រុកភាគច្រើនមកទិញដីយ៉ាងអនាធិបតេយ្យ និងដោយលួចលាក់ ហើយប៉ះចំដីតំបន់អភិរក្ស ទើបធ្វើឲ្យមានបញ្ហាចោទឡើង ប៉ុន្តែប្រសិនបើតំបន់អភិរក្សមានតែឈ្មោះទៅហើយ គប្បីធ្វើសម្បទានឱ្យប្រជាពលរដ្ឋដែលមិនមានដីធ្លីនោះក៏ជារឿងល្អដែរ។
អភិបាលស្រុកស្នួល លោក គង់ គឹមនី បានមានប្រសាសន៍នៅថ្ងៃ៩ មីនា ថា ការចាប់ខ្លួននោះ គឺដោយសារប្រជាពលរដ្ឋទាំងនោះមិនបានគោរពទៅតាមនីតិវិធីច្បាប់ ហើយអាជ្ញាធរបានណែនាំជាច្រើនលើកច្រើនសាមកហើយមុននឹងឈានដល់ការអនុវត្តច្បាប់។
លោកបន្តថា ប្រជាពលរដ្ឋចំណាកស្រុកភាគច្រើន គឺក្លាយទៅជាជនរងគ្រោះនៅពេលដែលពួកគាត់ទទួលទិញដីដោយមិនបានជម្រាបអាជ្ញាធរឱ្យដឹងនោះ៖ «ពេលខ្លះអ្នកដែលកាប់រុករានហ្នឹងគាត់ដឹងគាត់រត់ទៅ គាត់ឈប់ទៅ ហើយគាត់លក់ ហើយលក់ហ្នឹងមិនមែនឱ្យអាជ្ញាធរឃុំ អាជ្ញាធរភូមិដឹងទេ។ គាត់ទិញដូរពួកគាត់ស្ងាត់ៗណា អាហ្នឹងមិនមែនជាផ្លូវច្បាប់ទេ គឺគាត់មិនបានប្រាប់ឱ្យអាជ្ញាធរបានដឹងផង អ៊ីចឹងវាជាការខុសច្បាប់មួយ។ កន្លងមកបងប្អូនហ្នឹងច្រើនតែអ៊ីចឹង អ្នកដែលមកហ្នឹងច្រើនតែអត់ដីៗ ហើយគាត់កាប់ៗៗៗ ហើយគាត់ដើរចង្អុលប្រាប់គេផ្សេងទៀតឱ្យទិញ ហើយគាត់ទៅកាប់ទៀតហើយ»។
លោកបន្ថែមទៀតថា ប្រសិនបើអាជ្ញាធរមិនអនុវត្តច្បាប់ក្នុងការដាក់ទោសទណ្ឌដល់ជនណាដែលបានរុករានដីដោយខុសច្បាប់នោះទេ នោះប្រជាពលរដ្ឋនឹងមិនមានការខ្លាចរអាឡើយ។ ប៉ុន្តែយ៉ាងណាក៏ដោយ លោកបញ្ជាក់ថា ក្នុងនាមអាជ្ញាធរនៅតែខិតខំអប់រំប្រជាពលរដ្ឋឱ្យបានយល់ដឹង និងខិតខំអនុវត្តច្បាប់ទាំងអស់គ្នា ដើម្បីឱ្យតំបន់អភិរក្សទាំងនោះប្រសើរឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។