ករណីចាប់ខ្លួននេះធ្វើឡើងកាលពីថ្ងៃសៅរ៍ ទី៤ ខែឧសភា ឆ្នាំ២០១៣ នៅក្នុងជម្លោះវាយតប់មួយ ដែលបណ្ដាលឲ្យប្រជាពលរដ្ឋ ៥នាក់រងរបួស ក្នុងនោះស្ត្រីម្នាក់បាក់ដៃ និងបុរសម្នាក់ត្រូវគេព្រួតវាយសន្លប់។
ប្រជាពលរដ្ឋជាឪពុកជនរងគ្រោះ លោក រី សារុន មានប្រសាសន៍បញ្ជាក់ថា កូនគាត់ ៣នាក់ និងអ្នកភូមិម្នាក់ ត្រូវបានកម្មកររបស់ក្រុមហ៊ុនព្រួតគ្នាវាយតាមការបញ្ជារបស់មេការក្រុមហ៊ុនឈ្មោះ បុល។
លោកបន្តថា តំណាងក្រុមហ៊ុនមានងារជាឧកញ៉ា ឈ្មោះ ណាង បាន យកគ្រឿងចក្រកាយព្រំដីរំលោភយកដីលោកដែលបានវាស់វែងចុះបញ្ជីទទួលស្គាល់ដោយក្រុមការងារវាស់វែង និងនិស្សិតស្ម័គ្រចិត្តរាជរដ្ឋាភិបាល ហើយបានប្រើអំណាចយកកម្មករប្រមាណ ៣០នាក់ និងទាហានមានអាវុធឆ្នៃមួយដើម ព្រួតវាយកូនរបស់គាត់ដែលតវ៉ាមិនឲ្យគ្រឿងចក្រកាយប្រឡាយលើដីរបស់គាត់។
លោក រី សារុន៖ «មើលងាយដល់ប្រជាពលរដ្ឋ ហើយនិងរាជរដ្ឋាភិបាល ដែលគាត់ខំមកវាស់វែងដីខ្ញុំហើយ។ មិនមែនប៉ះតែខ្ញុំមួយទេ ប៉ះគ្នាច្រើនណាស់រឿងដីនេះ។ ខ្ញុំទាមទាររកយុត្តិធម៌មួយ និងសំណងជំងឺចិត្ត»។
ជនសង្ស័យបង្ករបួសស្នាមជាកម្មករ ៤នាក់ ត្រូវឃុំខ្លួនបណ្ដោះអាសន្ននៅស្នងការប៉ូលិសខេត្ត និងម្នាក់ជាទាហានត្រូវឃុំខ្លួននៅបញ្ជាការដ្ឋានកងរាជអាវុធហត្ថខេត្ត នៅថ្ងៃអាទិត្យ ទី៥ ខែឧសភា។
ស្នងការរងប៉ូលិសខេត្តរតនគិរី លោក ផែន ឌីណា មានប្រសាសន៍បញ្ជាក់ថា ជនសង្ស័យទាំង ៥ នឹងត្រូវបញ្ជូនទៅស្ថាប័នអយ្យកាតុលាការខេត្តដើម្បីចាត់ការបន្តនៅថ្ងៃច័ន្ទ សប្ដាហ៍ក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។