គម្រោងលើកទំនប់រណប ដើម្បីស្តុកទឹកយកទៅផ្គត់ផ្គង់ប្រព័ន្ធប្រឡាយមេកង្ហត កំពុងបង្កផលប៉ះពាល់លើដីលំនៅឋាន ដីស្រែចម្ការអ្នកភូមិចំនួន ៧០គ្រួសារ លើដីប្រហែល ៣ពាន់ហិកតារ ឋិតភូមិចំនួន៤ ក្នុងឃុំផ្លូវមាស ស្រុករតនៈមណ្ឌល ខេត្តបាត់ដំបង។ បញ្ហានេះ បានធ្វើឲ្យអ្នកភូមិជាម្ចាស់ដីទាមទារឲ្យរដ្ឋាភិបាលដោះស្រាយសំណងជូនពួកគាត់ឲ្យបានសមរម្យ។
អ្នកភូមិឈ្មោះ យិន អាង រស់នៅភូមិទឹកសាប ថ្លែងនៅថ្ងៃទី២៣ ខែវិច្ឆិកា ថា ក្រុមហ៊ុនចិន សាងសង់ទំនប់កង្ហត និងអាជ្ញាធរមូលដ្ឋានស្រុករតនៈមណ្ឌល បានចុះទៅវាស់វែងលើដីចម្ការដាំដុះរបស់ពួកគាត់ជាបន្តបន្ទាប់ ខណៈអ្នកភូមិជាម្ចាស់ដីបដិសេធមិនទទួលសំណងដែលមានតម្លៃតិចតួច។ អាជ្ញាធរបានកំណត់តម្លៃដីជាថ្នូរនឹងការដោះស្រាយសំណង។ ក្នុងនោះ ដីលំនៅឋាន ១ម៉ែត្រការ៉េ ឲ្យតម្លៃ ១ដុល្លារ ៥កាក់ និងដីចម្ការក្នុង ១ហិកតារ ៣ពាន់ដុល្លារ។ លោកអះអាងថា តម្លៃនេះអ្នកភូមិមិនអាចទទួលយកបានទេ៖ «សំណូមពរឲ្យតម្លៃដីហ្នឹងឲ្យវាឡើងសមរម្យ ប្រជាជនចង់បាន ១ម៉ែត្រការ៉េ ១០ដុល្លារ ដីភូមិ ហើយដីចម្ការហ្នឹង ធ្វើម៉េចឲ្យបាន ១ដុល្លារ អាហ្នឹងទើបអាចទទួលបាន»។
ក្រៅពីការទាមទារឲ្យមានសំណងសមរម្យ ក្រុមអ្នកភូមិគ្រោងនាំគ្នាយកញត្តិដាក់ទៅតំណាងរាស្ត្រគណបក្សប្រជាជនកម្ពុជា គណបក្សសង្គ្រោះជាតិ និងសមាគមអាដហុក (Adhoc) នៅថ្ងៃច័ន្ទ ដើមសប្ដាហ៍ក្រោយនេះ ឲ្យជួយដោះស្រាយថែមទៀត។
វិទ្យុអាស៊ីសេរី ពុំអាចទាក់ទងតំណាងក្រុមហ៊ុនចិន និងអាជ្ញាធរពាក់ព័ន្ធស្រុករតនៈមណ្ឌល ដើម្បីបញ្ជាក់ជុំវិញបញ្ហានេះបានទេ។
អភិបាលខេត្តបាត់ដំបង លោក ប្រាជ្ញ ចន្ទ មានប្រសាសន៍បញ្ជាក់ថា ក្នុងរយៈពេលកន្លងទៅ អាជ្ញាធរខេត្តទទួលបានព័ត៌មានជុំវិញករណីនេះ។ ទន្ទឹមគ្នានេះ លោកបានជំរុញឲ្យអាជ្ញាធរមូលដ្ឋាន និងប្រជាពលរដ្ឋសិក្សារួមគ្នា ដើម្បីដោះស្រាយទំនាស់ដោយផ្ដោតលើផលប្រយោជន៍ជារួមទាំងអស់គ្នា៖ «កន្លងមកខ្ញុំទទួលបានព័ត៌មានហ្នឹង ហើយឲ្យបងប្អូនក្រុមការងារដែលដោះស្រាយប៉ះពាល់ហ្នឹង រួមគ្នាពិភាក្សារកចំណុចមួយរួម ឯកភាពគ្នាទៅ ពីព្រោះពេលខ្លះយើងឃើញថា ធ្វើដើម្បីផលប្រយោជន៍ប្រជាពលរដ្ឋទាំងអស់គ្នានោះទេ បើគាត់ទាមទារហួសហេតុពេក ក៏មិនទំនងនោះដែរ។ យើងក៏បានត្រៀមដោះស្រាយផលប៉ះពាល់ឲ្យគាត់ដែរហើយ»។
ដីលំនៅឋាន ដីស្រែចម្ការ ទំហំប្រហែល ៣ពាន់ហិកតារ របស់ប្រជាពលរដ្ឋ ៧០គ្រួសារនោះ ស្ថិតនៅភូមិអូរត្រែង ភូមិទឹកសាប ភូមិផ្លូវមាស និងភូមិសេកសក ឃុំផ្លូវមាស ស្រុករតនៈមណ្ឌល ខេត្តបាត់ដំបង។
ទាក់ទិនករណីនេះ អ្នកសម្របសម្រួលសមាគមអាដហុក ប្រចាំខេត្តបាត់ដំបង លោក យិន ម៉េងលី សង្កេតឃើញថា គណៈកម្មការដែលបង្កើតឡើងដោយអាជ្ញាធរមូលដ្ឋានពុំបានដោះស្រាយត្រឹមត្រូវតាមច្បាប់អស្សាមិករណ៍នោះទេ។ ច្បាប់អស្សាមិករណ៍ បានតម្រូវឲ្យចុះធ្វើការសិក្សាវាយតម្លៃធ្វើរបាយការណ៍យ៉ាងល្អិតល្អន់គ្រប់ជ្រុងជ្រោយទាំងអស់ ទាំងចំណុចវិជ្ជមាន និងអវិជ្ជមាន ដើម្បីដាក់ជូនរាជរដ្ឋាភិបាលសម្រេច៖ «ក៏ប៉ុន្តែនៅក្នុងរឿងនេះ ប្រជាពលរដ្ឋមិនបានទទួលសេចក្តីសម្រេច ឬក៏ការចុះហត្ថលេខាសម្រេចថាម៉េចពីថ្នាក់ណា អត់មានទាំងអស់ មួយទៀតក្នុងច្បាប់អស្សាមិករណ៍ក៏បាននិយាយដែរ ប្រគល់ប្រាក់ឲ្យបានសមរម្យត្រឹមត្រូវជាមុន ទើបចាប់ផ្ដើមអនុវត្ត ហើយពេលដែលទទួលបានហ្នឹង ក្នុងច្បាប់ទុករយៈពេលមួយខែឲ្យម្ចាស់ ដើម្បីត្រៀមខ្លួនចាកចេញពីទីនោះ»។
លោកសង្កត់ធ្ងន់ថា ចំណុចនេះពុំបានដោះស្រាយទេ ប៉ុន្តែក្រុមអាជ្ញាធរបែរជានាំគ្នាចុះអនុវត្តទៅវិញ។ លោកបន្តថា ដំណើរការដកហូតដីកម្មសិទ្ធិឯកជនក្នុងគម្រោងអភិវឌ្ឍន៍នេះ មានភាពមិនប្រក្រតីច្រើន។ បញ្ហានេះហើយ ដែលធ្វើឲ្យប្រជាពលរដ្ឋចេះតែនាំគ្នាតវ៉ា។
យោងលើច្បាប់អស្សាមិករណ៍ លោក យិន ម៉េងលី បានស្នើឲ្យអាជ្ញាធរបង្កើតនូវគណៈកម្មការ និងអនុគណៈកម្មការដែលមានសមាសភាពចូលរួម មាន អភិបាលខេត្ត អភិបាលស្រុក មេឃុំ មេភូមិ និងអ្នកពាក់ព័ន្ធទាំងអស់ ចុះទៅធ្វើការរួមគ្នា ដើម្បីទទួលយកសំណូមពររបស់ប្រជាពលរដ្ឋរាយការណ៍ជូនរដ្ឋាភិបាល ដើម្បីធ្វើសេចក្ដីសម្រេចចៀសវាងការប្រើប្រាស់រូបមន្តប្រលេះគ្រាប់ពោត កោះហៅប្រជាពលរដ្ឋម្ដងមួយគ្រួសារៗ យកទៅបង្ខំឲ្យផ្ដិតមេដៃយល់ព្រម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។