អ្នកបុរីកីឡា សង្កាត់វាលវង់ ខណ្ឌ៧មករា អ្នកស្រី ស ស៊ន ថ្លែងនៅថ្ងៃទី៨ មករា ថា អាជ្ញាធរខណ្ឌ និងប៉េអិម បានហៅពួកគាត់ទាំង ៥គ្រួសារ ឲ្យទៅសាលាខណ្ឌនិយាយគ្នាចំពោះករណីដែលពលរដ្ឋបានសម្រេចទៅរស់នៅផ្ទះរបស់អ្នកទទួលបានគោលនយោបាយឡើងអគារថ្មី ហើយមិនបានជូនដំណឹងទៅអាជ្ញាធរជាមុន។ អ្នកស្រីបន្តថា ពួកគាត់មិនអាចរង់ចាំការដោះស្រាយដ៏យូររបស់លោកអភិបាលរាជធានីនោះទេ ដោយសារស្ថានភាពរស់នៅរបស់ពលរដ្ឋបច្ចុប្បន្នមានការលំបាក។
អ្នកស្រី ស ស៊ន៖ «ពួកខ្ញុំហ្នឹងពួករង់ចាំហ្នឹង មានគ្រួសារខ្លះកូនច្រើនៗ កូនធំៗកូនស្រីពេញជំទង់រស់នៅក្រោមតង់ ចង្អៀតពេកគាត់រង់ចាំយូរ។ លោក ប៉ា សុជាតិវង្ស គាត់សន្យា ២ខែ ឥឡូវលើសពីពីរខែហើយ គាត់ទៅបោសផ្ទះចាស់នៅ។ គេដាក់កម្លាំងប៉េអិម ខាងខណ្ឌគេមករុះរើឥវ៉ាន់គាត់ចេញ តែមិនបានយកចេញទេ ព្រោះប្រជាពលរដ្ឋច្រើន។ ឥឡូវគេហៅទៅខណ្ឌ ថាយើងហ្នឹងធ្វើអីអត់ចេះសុំច្បាប់គេ ធ្វើអីឆៅៗ»។
អភិបាលខណ្ឌ៧មករា លោក សោម សុវណ្ណ ជាប់រវល់មិនធ្វើអត្ថាធិប្បាយបានទេជុំវិញបញ្ហានេះ។
អ្នកបុរីកីឡា ជាង ១៥០គ្រួសារទៀត នៅមិនទាន់ទទួលបានការដោះស្រាយផ្ទះសម្បែងនៅឡើយទេ បន្ទាប់ពីអាជ្ញាធរក្រុង និងក្រុមហ៊ុន ផាន អ៊ីម៉ិច បានឈូសកម្ទេចផ្ទះពួកគាត់តាំងពីថ្ងៃទី៣ ខែមករា ឆ្នាំ២០១២។ អ្នកភូមិបានបន្តស្វែងរកអន្តរាគមន៍ឲ្យក្រុមហ៊ុននេះគោរពកិច្ចសន្យាសង់អគារថែម ២អគារទៀត ឲ្យបាន ១០អគារ ព្រោះបច្ចុប្បន្នក្រុមហ៊ុននេះសង់បានតែ ៨អគារ ទើបពួកគាត់មួយចំនួនមិនបានទទួលគោលនយោបាយឡើងអគារថ្មី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។