មន្ត្រីក្រសួងធម្មការ និងសាសនា អះអាងជាថ្មីទៀតថា មិនមានការដោះដូរ ឬលក់ដីអគារពុទ្ធសាសនបណ្ឌិត្យដូចមានការចោទប្រកាន់នោះឡើយ។ ការអះអាងបែបនេះ បន្ទាប់ពីមន្ត្រីក្រសួងធម្មការ ជួបប្រជុំពិភាក្សាជាមួយគណៈកម្មការទី៧ នៃរដ្ឋសភា ដែលបានចុះទៅត្រួតពិនិត្យជាក់ស្តែងទីតាំងនៃអគារពុទ្ធសាសនបណ្ឌិត្យ នៅថ្ងៃទី៩ ខែមករា។
មន្ត្រីក្រសួងធម្មការ និងសាសនា បញ្ជាក់ជាថ្មីថា ព្រះសង្ឃ និងពលរដ្ឋដែលតែងតែសង្ស័យពីការដោះដូរដី និងអគារពុទ្ធសាសនបណ្ឌិត្យនោះ គឺត្រូវបញ្ឈប់ការសង្ស័យនេះតទៀតទៅ ព្រោះថា សម្បត្តិរដ្ឋមួយនេះនឹងមិនបាត់បង់ទៅណាឡើយ។
អ្នកនាំពាក្យក្រសួងធម្មការ និងសាសនា លោក សេង សុមុនី ឲ្យដឹងថា ក្នុងពេលជួបជាមួយប្រតិភូគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភា ក្រសួងធម្មការ និងសាសនា មានទឡ្ហីករណ៍ជាក់លាក់បង្ហាញគណៈកម្មការមួយនេះ ដែលបញ្ជាក់ថា មិនមានការលក់ដូរដីវិទ្យាស្ថានពុទ្ធសាសនបណ្ឌិត្យ ដូចដែលមានការសង្ស័យកន្លងមកនោះទេ។
លោក សេង សុមុនី ដែលតែងស្នើបណ្ដាញសារព័ត៌មាន មិនឲ្យបញ្ចេញសំឡេងរបស់លោក ឲ្យដឹងដែរថា ក្រៅពីមិនមានការដោះដូរ ឬលក់ដីរោង និងរបងដែកដែលសង់នៅលើដី នៃវិទ្យាស្ថានពុទ្ធសាសនបណ្ឌិត្យ ក៏ត្រូវបានសម្អាតផងដែរ។ លើសពីនេះ លោកថា ទ្វារដែលសង់បែរមុខទៅកាស៊ីណូណាហ្គា (Naga World) តាំងពីមុនពេលអគារកាស៊ីណូត្រូវបានសាងសង់ឡើងម្ល៉េះនោះ ក៏នឹងបិទជិតមិនឲ្យប្រើប្រាស់ក្នុងពេលឆាប់ៗខាងមុខនេះដែរ ដើម្បីកុំឲ្យពលរដ្ឋមានការសង្ស័យតទៅទៀត។
ចំណែកខ្លោងទ្វារដែលត្រូវបានវាយកម្ទេចនោះ លោក សេង សុមុនី អះអាងថា ក៏នឹងត្រូវសាងសង់ឡើងវិញដែរ បន្ទាប់ពីផ្លូវក្រោមដីរបស់ក្រុមហ៊ុនណាហ្គាត្រូវបានសាងសង់រួច។ រីឯរចនាបថនៃខ្លោងទ្វារថ្មីនោះ លោកថានឹងនៅរក្សាដូចដើមដដែល។
ក្រោយពីខ្លោងទ្វារវិទ្យាស្ថានពុទ្ធសាសនបណ្ឌិត្យ ត្រូវបានក្រុមហ៊ុនណាហ្គា វើល វាយកម្ទេច ព្រះសង្ឃ ប្រជាពលរដ្ឋ បានធ្វើការតវ៉ាជាបន្តបន្ទាប់ ដើម្បីឲ្យរដ្ឋាភិបាលបញ្ជាក់ឲ្យបានច្បាស់ពីការវាយកម្ទេចនោះ និងឲ្យក្រុមហ៊ុនសាងសង់ខ្លោងទ្វារនោះឡើងវិញ។ ពួកគេក៏បានដាក់ញត្តិតវ៉ាទៅព្រះមហាក្សត្រ និងរដ្ឋសភា ដើម្បីឲ្យជួយអន្តរាគមន៍ពីបញ្ហានេះ។ ក្រោយមក គណៈកម្មការទី៧ នៃរដ្ឋសភា ក៏បានហៅរដ្ឋមន្ត្រីក្រសួងធម្មការ និងសាសនា លោក មិន ឃិន ចូលបំភ្លឺនៅសភា។ ស្របពេលជាមួយគ្នា លោកនាយករដ្ឋមន្ត្រី ហ៊ុន សែន ក៏បានសរសេរលិខិតទូលថ្វាយព្រះមហាក្សត្រ អះអាងថា មិនមានការលក់ ឬដោះដូរដីវិទ្យាស្ថានពុទ្ធសាសនបណ្ឌិត្យ ដូចការចោទប្រកាន់នោះឡើយ។
លោក យ៉ែម បុញ្ញឫទ្ធិ តំណាងរាស្ត្រគណបក្សសង្គ្រោះជាតិ និងជាប្រធានគណៈកម្មការទី៧ នៃរដ្ឋសភា បានសរសេរបញ្ជាក់នៅលើទំព័រហ្វេសប៊ុក (Facebook) របស់លោកថា បន្ទាប់ពីការតាមដាន និងត្រួតពិនិត្យផ្ទាល់នៅវិទ្យាស្ថានពុទ្ធសាសនបណ្ឌិត្យ គឺដីវិទ្យាស្ថានមិនត្រូវបានលក់ របងខណ្ឌរោងរបស់កាស៊ីណូណាហ្គាក្នុងដីវិទ្យាស្ថានត្រូវបានវាយកម្ទេច រោងដែករបស់កាស៊ីណូណាហ្គា ត្រូវបានរុះរើចេញ ទ្វារចេញចូលរបស់កាស៊ីណូក្នុងទីតាំងវិទ្យាស្ថាន នឹងត្រូវបានបិទ ហើយខ្លោងទ្វារ និងរបង ត្រូវបានកសាងឡើងវិញតាមរចនាបថដើម។
ព្រមជាមួយគ្នានេះដែរ ប្រធានបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះតេជព្រះគុណ ប៊ុត ប៊ុនតិញ ដែលបានដឹកនាំការតវ៉ាកន្លងមកនោះ សម្ដែងការសប្បាយចិត្ត នៅពេលដែលគណៈកម្មការទី៧ និងក្រសួងធម្មការ និងសាសនា ធ្វើការជាមួយគ្នា ដើម្បីថែរក្សាពុទ្ធសាសនបណ្ឌិត្យតាមការស្នើសុំរបស់បណ្ដាញព្រះសង្ឃ។
ពុទ្ធសាសនបណ្ឌិត្យកម្ពុជា ត្រូវបានបង្កើតឡើងដំបូងបង្អស់នៅឆ្នាំ១៩៣០ ក្នុងរាជ្យព្រះបាទ ស៊ីសុវត្ថិ មុនីវង្ស។ ចំណែកអគារពុទ្ធសាសនបណ្ឌិត្យបច្ចុប្បន្ន គឺជាសំណង់ថ្មីកសាងនៅឆ្នាំ១៩៩៦ និងដាក់ឲ្យប្រើប្រាស់នៅឆ្នាំ១៩៩៨។ ពុទ្ធសាសនបណ្ឌិត្យនេះ ត្រូវដាក់ឲ្យឋិតនៅក្រោមចំណុះរបស់ក្រសួងធម្មការ និងសាសនា និងត្រូវចាត់ទុកជាអចលនទ្រព្យរបស់រដ្ឋ។
យ៉ាងណាក៏ដោយ សម្រាប់ព្រះតេជព្រះគុណ ប៊ុត ប៊ុនតិញ ព្រះអង្គយល់ថា ដី និងអគារពុទ្ធសាសនបណ្ឌិត្យ មិនគួរដាក់ឲ្យឋិតក្រោមការគ្រប់គ្រងរបស់រដ្ឋាភិបាលនោះទេ គឺគួរតែដាក់ឲ្យឋិតក្រោមការគ្រប់គ្រងរបស់សង្ឃនាយកកម្ពុជា ទៅវិញ ព្រោះព្រះតេជព្រះគុណថា វាគឺជាទ្រព្យសម្បត្តិរបស់សាសនា មិនមែនរបស់រដ្ឋាភិបាលឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។