ពលរដ្ឋរស់នៅបណ្ដោយផ្លូវរថភ្លើង សម្ដែងក្ដីព្រួយបារម្ភជាថ្មីទៀត បន្ទាប់ពីមិនឃើញមានដំណោះស្រាយណាមួយពីសាលាក្រុងភ្នំពេញដល់ពួកគាត់។ ក្ដីបារម្ភនេះ ធ្វើឲ្យពលរដ្ឋប្រមាណ ៥០នាក់ ប្រមូលផ្ដុំគ្នានៅមុខសាលាក្រុងភ្នំពេញ នៅព្រឹកថ្ងៃទី២៦ ខែមករា ដើម្បីសាកសួរដំណឹងអំពីផលប៉ះពាល់ពីការធ្វើផ្លូវបេតុងជំនួសផ្លូវរថភ្លើងនោះ។
ក្រោយពីចូលជួបមន្ត្រីសាលាក្រុងភ្នំពេញ និយាយអំពីរឿងនេះ តំណាងពលរដ្ឋនៅសហគមន៍ផ្លូវរថភ្លើង លោក ឡុង ចាន់ឌី ឲ្យដឹងថា សាលាក្រុងភ្នំពេញមិនទាន់ឆ្លើយតបយ៉ាងណាពីផលប៉ះពាល់ តម្រូវឲ្យពលរដ្ឋរង់ចាំការវាយតម្លៃផលប៉ះពាល់ជាមុនសិន៖ « នេះ បើតាម ចម្លើយរបស់យើងជួបនេះ មិនជា អភិបាលរង ឬក៏អភិបាលមកជួបយើងទេ គ្រាន់តែ ជាប្រធានរដ្ឋបាល មកជួប យើង ហើយ គាត់ក៏ គ្មានអ្វី មកឆ្លើយដែរ។ គាត់ ឆ្លើយថា ពេលដែល គេដោះស្រាយ គេថាទាល់ តែមាន ក្រុម ជំនាញមើលថា ផលប៉ះពាល់ប៉ុន្មាន ហើយនឹងសិក្សាពីជំនាញហ្នឹង ពីយន្តការដោះស្រាយហើយ បានហៅយើងជួប ហើយបង្ហាញពី អាហ្នឹង ។ បើនិយាយពីឲ្យយើង ជឿជាក់យ៉ាងណា យើងអត់ទាន់មានទេ ដូចតែមានពីមុនមកដដែល »។
មុនពេលពួកគាត់នាំគ្នាមកសាលាក្រុងភ្នំពេញ ពួកគាត់លើកស្លាកមួយផ្ទាំងដាក់នៅផ្លូវក្បែរវត្តទួលសុវណ្ណារាម ហៅវត្តទួលសង្កែ ដោយរំពឹងថា លោកអភិបាលក្រុងភ្នំពេញ គោរពសម្ដីរបស់ខ្លួន។ ក្នុងស្លាកនោះសរសេរដោយលើកប្រសាសន៍របស់លោក ប៉ា សុជាតិវង្ស ថា ការអភិវឌ្ឍ គឺមិនឲ្យប្រជាពលរដ្ឋណាទឹកភ្នែកឡើយ ផ្ដល់ដីឲ្យប្រជាពលរដ្ឋធ្វើការអភិវឌ្ឍនៅនឹងកន្លែង ដោះស្រាយសំណងឲ្យប្រជាពលរដ្ឋរួចរាល់ជាមុន ទើបធ្វើផ្លូវជាក្រោយ និងអនុវត្តយុទ្ធសាស្ត្រឈ្នះៗ គឺឈ្នះទាំងអស់គ្នា។
តាមគម្រោង សាលាក្រុងភ្នំពេញនឹងរុះរើផ្លូវរថភ្លើងដែលមានសភាពចាស់ទ្រុឌទ្រោម ជំនួសវិញធ្វើផ្លូវបេតុងប្រវែង ៤.៥១០ម៉ែត្រ ចាប់ពីសង្កាត់គីឡូម៉ែត្រលេខ៦ ដល់ទំនប់ផ្លូវ៧០ សង្កាត់ទួលសង្កែ។
តួលេខរបស់សាលាក្រុងភ្នំពេញ បានបង្ហាញថា ពលរដ្ឋដែលត្រូវទទួលរងផលប៉ះពាល់អស់ផ្ទះ និងដីទាំងស្រុងមានចំនួន ៤២៤គ្រួសារ ចំណែកពលរដ្ឋ ៩៧៧គ្រួសារទៀត មានអ្នកខ្លះត្រូវអស់ដីមួយចំនួន និងប៉ះពាល់របងផ្ទះតិចតួចប៉ុណ្ណោះ។
ពលរដ្ឋនៅតាមផ្លូវរថភ្លើងនៅតែបារម្ភថា បើសិនជាគ្មានដំណោះស្រាយពីសាលាក្រុងភ្នំពេញនោះ ពួកគាត់នឹងត្រូវប្រឈមគ្មានផ្ទះសម្បែងស្នាក់នៅ បាត់បង់មុខរបរប្រចាំថ្ងៃ ជាពិសេសកូនតូចៗនឹងត្រូវបាត់បង់ការសិក្សាផងដែរ។ ក្រោមរូបភាពការអភិវឌ្ឍនេះ ពួកគេមិនចង់ជួបបញ្ហាដូចពលរដ្ឋរស់នៅតំបន់បឹងកក់ និងបុរីកីឡានោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។