មន្ត្រីប៉ូលិសការពារព្រំដែនប្រចាំការនៅស្រុកពាមជរ ខេត្តព្រៃវែង ចោទប្រកាន់អតីតស្នងការនគរបាលម្នាក់ ថាបានយកដីបន្ទាយប៉ូលិសការពារព្រំដែន ធ្វើជាកម្មសិទ្ធិផ្ទាល់ខ្លួន។ មន្ត្រីប៉ូលិសព្រំដែនបញ្ជាក់ថា ពួកគាត់កំពុងរៀបចំធ្វើពាក្យបណ្ដឹង ដាក់ទៅអង្គភាពប្រឆាំងអំពើពុករលួយ ដើម្បីឲ្យជួយអន្តរាគមន៍រក្សាដីទុកជាសម្បត្តិរបស់រដ្ឋ។
មន្ត្រីប៉ូលិសការពារព្រំដែនមួយចំនួន កំពុងព្រួយបារម្ភខ្លាចបាត់បង់ដីបន្ទាយ ធ្លាក់ទៅជាកម្មសិទ្ធិឯកជន ហើយបានអំពាវនាវឲ្យមន្ត្រីរដ្ឋាភិបាលពាក់ព័ន្ធ ចុះស៊ើបអង្កេត និងចាត់វិធានការជាបន្ទាន់។
មន្ត្រីប៉ូលិសការពារព្រំដែនប្រចាំការនៅឃុំកោះរកា គឺលោក សូ សុភាព ថ្លែងនៅថ្ងៃទី២១ កញ្ញា ថា អតីតស្នងការនគរបាលខេត្តព្រៃវែង គឺលោក គឹម ផន បញ្ជាឲ្យកូនចៅជំនិតឈូសឆាយដីបន្ទាយប៉ូលិសការពារព្រំដែន នៅចំណុចភូមិកោះរកា ឃុំកោះរកា ស្រុកពាមជរ ខេត្តព្រៃវែង ដើម្បីកាន់កាប់ធ្វើជាកម្មសិទ្ធិផ្ទាល់ខ្លួន។
លោក សូ សុភាព៖ «គាត់មកបញ្ជាគេមកដែលជាកូនចៅនៅហ្នឹង ដែលជាជំនិតរបស់គាត់ រុះរើអាដែងប៉ុស្តិ៍ ឱអាដែងរុះរើកន្លែងជម្រកស្នាក់នៅរបស់កងកម្លាំង។ ប៉ុន្តែដល់ឃើញភ្លាម ខ្ញុំឃើញអាក្រក់ពេក ហើយមេៗគាត់អត់ហ៊ាន ដល់អ៊ីចឹងគាត់ប្រុងឲ្យរើមែនទែន។ បាទ! ដូចជាបង្គន់អីដែលកូនចៅខំកសាងហើយហ្នឹង គាត់ទៅបញ្ជាឲ្យគេរើដាច់ទុយោទឹកទុយោអីអ៊ីចឹង មានដំណើរការអីកើត»។
ផ្ទៃដីដែលមន្ត្រីប៉ូលិសការពារព្រំដែនអះអាងថា អតីតស្នងការនគរបាលខេត្តរំលោភយកនោះ ទំហំផ្ទៃដីទទឹងប្រមាណ ៨០ម៉ែត្រ និងបណ្ដោយប្រមាណ ១១០ម៉ែត្រ ស្ថិតនៅចំណុចក្បែរច្រកកោះរកា ព្រំដែនកម្ពុជាវៀតណាម។
មន្ត្រីក្រុមប្រឹក្សាស្រុកពាមជរ ដែលបានចុះអង្កេតរឿងដីនេះ គឺលោក ស្រេង ណន មានប្រសាសន៍ថា ដីបន្ទាយប៉ូលិសការពារព្រំដែន ពិតជាមានការឈូសឆាយរំលោភយកដីធ្វើជាកម្មសិទ្ធិផ្ទាល់ខ្លួនប្រាកដមែន។ លោកបន្តថា អ្នកដែលរំលោភយកដីនោះ អាស្រ័យអំណាចចាស់ដែលធ្លាប់គ្រប់គ្រងកូនចៅក្រោមបង្គាប់កន្លងមក៖ «មន្ត្រីមានអំណាចនេះ គឺបានបណ្ដេញគាត់ចេញពីកន្លែងដីដែលមានបញ្ហា ហើយយកដីហ្នឹងទៅធ្វើជាកម្មសិទ្ធិផ្ទាល់ខ្លួនវិញ។ ហើយម្សិលមិញនេះ បានពិនិត្យឃើញជាក់ស្ដែង គឺមានការហ៊ុំរបង និងគាស់ដើមប្រេងខ្យល់ចេញ និងមានការបណ្ដេញផ្ទះគាត់ចេញមែន»។
ទាក់ទងនឹងបញ្ហានេះដែរ ជំទប់ទី១ឃុំកោះរកា លោក លី សុផុន មានប្រសាសន៍ឲ្យដឹងថា លោកបានទទួលបណ្ដឹងពីមន្ត្រីប៉ូលិសការពារព្រំដែន ហើយបានទៅត្រួតពិនិត្យមើលរកឃើញថា ផ្ទៃបន្ទាយប៉ូលិសដែលជាទីតាំងការពារព្រំដែន អាចនឹងបាត់បង់ទៅជាកម្មសិទ្ធិឯកជនក្នុងពេលឆាប់ៗ៖ «បច្ចុប្បន្ននេះ គឺគេដេញសមត្ថកិច្ច ដែលជាពិសេស គឺកូនចៅ អា៣ដែលសង់ផ្ទះនៅក្នុងបន្ទាយហ្នឹងតែម្ដង ដេញឲ្យរើផ្ទះហ្នឹងចេញ ដើម្បីគេរៀបចំឈូសឆាយ។ ហើយបច្ចុប្បន្ននេះ គឺយកអាអេស្កាម៉ាទ័រហ្នឹង គឺគាស់គល់ចេញអស់ហើយ។ ហើយឲ្យរើផ្ទះហ្នឹងចេញទៀត ជាពិសេស គឺដងទង់ជាអឺ! កណ្ដាលបន្ទាយហ្នឹង និងត្រៀមបំផ្លាញប៉ុន្មានថ្ងៃខាងមុខទៀត»។
វិទ្យុអាស៊ីសេរី មិនអាចរកប្រភពទាក់ទងអតីតស្នងការនគរបាលខេត្តព្រៃវែង គឺលោក គឹម ផន ដើម្បីឆ្លើយតបនឹងការចោទប្រកាន់នេះបានទេ នៅថ្ងៃទី២១ កញ្ញា។
ចំណែកឯអនុប្រធាននគរបាលប៉ុស្តិ៍ការពារព្រំដែនឃុំកោះរកា ដែលមន្ត្រីប៉ូលិសអះអាងថា ជាមនុស្សជំនិត និងជាអ្នកបញ្ជាឲ្យគ្រឿងចក្រឈូសឆាយបន្ទាយប៉ូលិស តាមបញ្ជារបស់លោកអតីតស្នងការនគរបាលខេត្ត គឺលោក អ៊ិត សុភាព មានប្រសាសន៍ថា លោកពុំបានពាក់ព័ន្ធនឹងការឈូសឆាយដូចការចោទប្រកាន់នោះទេ៖ «អត់មែនទេៗ ខ្ញុំមិនមែនទេ អ! ចាំទៅសួរគេហ្នឹងទៅខាងស្រុក គេហ្នឹងខ្ញុំម៉េចដឹង ខ្ញុំអត់ដឹងផង»។
ទាក់ទងនឹងបញ្ហានេះ អនុប្រធានដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក (adhoc) លោក ចាន់ សុវ៉េត មានប្រសាសន៍ថា ផ្ទៃដីបន្ទាយរបស់អង្គភាពកងប្រដាប់អាវុធ ជាសម្បត្តិរបស់រដ្ឋ មិនអាចជនណាម្នាក់យកធ្វើជាកម្មសិទ្ធិផ្ទាល់ខ្លួនបាននោះទេ៖ «គាត់មានសិទ្ធិប្ដឹងទាមទារបាទ! ទាមទារហ្នឹង គឺទាមទារមិនឲ្យលក់ ឬក៏ទាមទារនូវអត្ថប្រយោជន៍។ អ៊ីចឹងក្នុងក្របខ័ណ្ឌនេះ ខ្ញុំគិតពិចារណាថា បើសិនជាគាត់ចង់ប្ដឹង គាត់អាចប្ដឹងមកក្រសួងសាមីរបស់ខ្លួន ដើម្បីបញ្ជាក់ឲ្យកាន់តែច្បាស់ថា តើដីហ្នឹងជាដីបុគ្គលឯកជន ឬជាដីរបស់ឯកជនរបស់រដ្ឋ»។
មន្ត្រីប៉ូលិសការពារព្រំដែន កំពុងរៀបចំដាក់ពាក្យប្ដឹងទៅអង្គភាពប្រឆាំងអំពើពុករលួយ ដើម្បីឲ្យជួយអន្តរាគមន៍រក្សាដីនោះទុកជាសម្បត្តិរដ្ឋ ហើយប្រសិនបើស្ថាប័នពាក់ព័ន្ធពុំមានវិធានការទាន់ពេលទេ អាចនឹងបាត់បង់ក្នុងពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។