ព្រៃឈើនៅតំបន់ជាប់ព្រំដែនខ្មែរ-វៀតណាម ក្នុងស្រុកអូរយ៉ាដាវ ខេត្តរតនគិរី កំពុងរងការកាប់បន្ថែមទៀត។ សេចក្តីរាយការណ៍របស់មន្ត្រីមូលដ្ឋាន ឲ្យដឹងថា អ្នកកាប់រានព្រៃឈើនោះសុទ្ធសឹងបុគ្គលជាមន្ត្រីកងប្រដាប់អាវុធនៅតំបន់ព្រំដែន ដោយមានបំណងយកដីនោះដាក់បញ្ចូលក្នុងផែនការវាស់វែងចេញប័ណ្ណកម្មសិទ្ធិស្របច្បាប់ ខណៈក្រុមនិស្សិតកំពុងវាស់វែងដីប្រជាពលរដ្ឋដែលកាត់ចេញពីក្រុមហ៊ុនសម្បទាន។
មន្ត្រីមូលដ្ឋានឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី អំពាវនាវសុំឲ្យស្ថាប័នពាក់ព័ន្ធនៃអាជ្ញាធរខេត្ត ចុះទប់ស្កាត់ជាបន្ទាន់សកម្មភាពកាប់រានព្រៃនៅតំបន់ព្រំដែនស្រុកអូរយ៉ាដាវ ជាប់ស្រុកដាក់កឺ ខេត្តយ៉ាឡាយ ប្រទេសវៀតណាម។
សកម្មភាពកាប់រានព្រៃឈើនេះ ធ្វើឡើងនៅចម្ងាយប្រមាណ ២០០ម៉ែត្រពីច្រកទ្វារព្រំដែនអន្តរជាតិ ស្រុកអូរយ៉ាដាវ ក្បែរចំណុចប៉ុស្តិ៍នគរបាល និងយោធាការពារព្រំដែនភ្នំក្រហម។
មេឃុំប៉ក់ញ៉ៃ លោក រចំ ហ្លឺច ឲ្យដឹងថា សហគមន៍ការពារព្រៃឈើនៅតំបន់នោះ មិនមានលទ្ធភាពទប់ស្កាត់សកម្មភាពកាប់រានព្រៃឈើបានទេ ពីព្រោះតំបន់នោះជាតំបន់ព្រំដែនហួសដែនសមត្ថកិច្ចរបស់មន្ត្រីមូលដ្ឋាន និងប្រជាពលរដ្ឋសហគមន៍ ដូច្នេះមានតែសមត្ថកិច្ចជំនាញព្រៃឈើ អាជ្ញាធរពាក់ព័ន្ធថ្នាក់ខេត្ត ទើបមានលទ្ធភាពទប់ស្កាត់ករណីនេះបាន៖ «ព្រៃនៅខាងចំណុចសូន្យគេហ្នឹង រាយការណ៍ថាគេទៅកាប់ មិនថាប្រជាជន មិនថាទាហាន អ្នកកាប់ យើងមិនដឹងដែរមិនដឹងអ្នកណាអ្នកកាប់»។
កាលពីចុងឆ្នាំ២០១២ ព្រៃឈើនៅចំណុចប៉ុស្តិ៍ភ្នំក្រហម ត្រូវមន្ត្រីកងការពារព្រំដែន កាប់រានម្តងរួចហើយ ប៉ុន្តែបានបញ្ឈប់វិញបន្ទាប់ពីក្រុមសហគមន៍បានផ្តល់ព័ត៌មាន និងសុំកិច្ចអន្តរាគមន៍ទប់ស្កាត់សកម្មភាពកាប់រានព្រៃឈើយកដីនោះទៅអាជ្ញាធរខេត្ត។
មន្ត្រីខេត្តមួយរូប សុំមិនបញ្ចេញឈ្មោះ ឲ្យដឹងថា សកម្មភាពកាប់រានព្រៃឈើថ្មីនេះ ធ្វើឡើងតាំងពីពាក់កណ្ដាលខែមីនា រហូតមក ហើយព្រៃឈើនៅតំបន់នោះប្រមាណ ៤ហិកតារ ត្រូវមន្ត្រីកងការពារព្រំដែនយោធាវរៈ១២៣ និងវរៈប៉ូលិសការពារព្រំដែនលេខ១០២ កាប់រំលំអស់ ដើម្បីរានយកដីជាកម្មសិទ្ធិ។
ស្នងការរងប៉ូលិសខេត្តរតនគិរី ទទួលបន្ទុកការងារព្រំដែន លោក ស៊ូវ៉ាន់ ខាំវ៉ាន់ មានប្រសាសន៍បញ្ជាក់ថា លោកក៏ទទួលបានព័ត៌មានទាក់ទិនសកម្មភាពកាប់រានព្រៃឈើនេះដូចគ្នា។ លោកបន្តថា កងនគរបាលនៅទីនោះទំនងកាប់រានព្រៃយកដីធ្វើកន្លែងស្នាក់នៅសម្រាប់ក្រុមគ្រួសារពួកគេ៖ «សួរត្រួសៗទៅ ឮថាពួកហ្នឹងយកគ្រួសារទៅនឹងហ្នឹង ពួកប៉ុស្តិ៍បួនដប់គ្រួសារទៅនៅជុំវិញប៉ុស្តិ៍ហ្នឹង ឮអ៊ីចឹង ប៉ុន្តែមែនឬមិនមែន ខ្ញុំអត់ទាន់ច្បាស់។ គាត់អត់បានរាយការណ៍តាមមើល»។
របាយការណ៍អង្កេតរបស់ សមាគមការពារសិទ្ធិមនុស្សអាដហុក (Adhoc) ខេត្តរតនគិរី ឲ្យដឹងថា សកម្មភាពកាប់រានព្រៃឈើ និងបទល្មើសកាប់ឈើធ្វើអាជីវកម្មខុសច្បាប់នៅជាប់តំបន់ព្រំដែនប្រទេសវៀតណាម ក្នុងស្រុកអូរយ៉ាដាវ ខេត្តរតនគិរី កើតមានច្រើនករណីនារដូវប្រាំងនេះ។
អ្នកឃ្លាំមើលបញ្ហាព្រៃឈើសមាគមអាដហុក ខេត្តរតនគិរី លោក ឆាយ ធី មានប្រសាសន៍បញ្ជាក់ថា ដីដែលមន្ត្រីប្រដាប់អាវុធកាប់រាន គឺជាដីតំបន់ច្រកទ្វារអន្តរជាតិគ្រប់គ្រង ប៉ុន្តែកងការពារព្រំដែនបានឈរជើងនៅកន្លែងនោះ ទើបមានបញ្ហាកាប់រានព្រៃយកដី។ លោកបន្តថា កន្លងទៅនេះ ក្រុមសហគមន៍ការពារព្រៃឈើភូមិឡំ បានរកឃើញឈើមូលរាប់ពាន់ដើម ត្រូវគេកាប់នៅក្នុងព្រៃក្បែរព្រំដែន ចំណុចប៉ុស្តិ៍ការពារព្រំដែនភ្នំក្រហម ហើយឈើមួយចំនួនត្រូវគេដឹកជញ្ជូនខុសច្បាប់ ឆ្លងចូលទៅប្រទេសវៀតណាម តាមច្រករបៀងប៉ុស្តិ៍ភ្នំក្រហម នេះ៖ «នៅតំបន់ហ្នឹង ពីមុនមកអត់ទាន់មានអ្នកណាអនុញ្ញាតឲ្យទៅកាប់រាន ឬកាន់កាប់ទេ ព្រោះជាតំបន់ជាប់ព្រំដែន។ ពួកគេឆ្លៀតឱកាសនៅពេលនិស្សិតមានគម្រោងវាស់វែង ស្នើសុំទៅខាងនិស្សិតវាស់វែង»។
នាយរងខណ្ឌរដ្ឋបាលព្រៃឈើខេត្តរតនគិរី លោក ផាន់ ភិន មានប្រសាសន៍បញ្ជាក់ថា លោកនឹងចាត់មន្ត្រីជំនាញទៅពិនិត្យមើលសេចក្តីរាយការណ៍ស្ដីពីការកាប់រានព្រៃនៅតំបន់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។