ចៅក្រមសាលាដំបូងខេត្តកោះកុង សម្រេចដោះលែងតំណាងពលរដ្ឋមួយរូប គឺលោក ផន ណុល ដែលមានជម្លោះដីធ្លី ជាមួយក្រុមហ៊ុន អេស អ៊ី ហ្សិត (SEZ) របស់លោកឧកញ៉ា លី យ៉ុងផាត់ នៅថ្ងៃទី១០ វិច្ឆិកាខាងមុខ បន្ទាប់ពីសហគមន៍ដីធ្លីបានតវ៉ាទាំងយប់ថ្ងៃជាង១សប្ដាហ៍ នៅមុខតុលាការ និងបិទផ្លូវជាតិ។
មន្ត្រីឃ្លាំមើលសិទ្ធិមនុស្សនៃអង្គការលីកាដូ (Licadho) លោក អ៊ិន គង់ជិត បានឲ្យដឹងនៅថ្ងៃទី ៥ វិច្ឆិកា ថាសហគមន៍ដីធ្លីប្រមាណ ៥០នាក់នៅតែបន្តទាមទារឲ្យតុលាការដោះលែងតំណាងពលរដ្ឋរបស់គាត់នៅថ្ងៃនេះ ឬថ្ងៃស្អែក ពុំចាំដល់ថ្ងៃទី១០ឡើយ។ លោកបន្តថាការដែលពលរដ្ឋនៅតែទាមទារ នៅមុខតវ៉ាតុលាការទាំងយប់ថ្ងៃដូច្នេះ ដោយសារភរិយា និងគ្រួសារលោក ផន ណុល គ្មានអ្វីទីពឹង ក្រៅពីប្ដីជាជនពិការ តែជាបង្គោលគ្រួសារនោះឡើយ៖ «តំណាងសហគមន៍ម្នាក់ហ្នឹងឲ្យបាន នៅក្រៅឃុំ ព្រោះការដោះលែងនេះ វាបញ្ជាក់នូវការយោគយល់អធ្យាស្រ័យ ចំពោះប្រជាពលរដ្ឋ ដែលគាត់ត្រូវបានឃុំខ្លួនកន្លងមក ហើយសូម្បីតែព្រះមហាក្សត្រ ក៏លោកបានប្រទានលើកលែងទោសដល់ទណ្ឌិតនានា ក្នុងពិធីបុណ្យឡើងគ្រងរាជ្យ យើងថាពេលវេលានេះ ប្រសិនជាលោកចៅក្រមបានពិចារណា ដោយមិនពន្យារពេល វាជាការសមរម្យមួយ ដែលពិតជាបានអនុគ្រោះ និងយោគយល់ ដល់ប្រជាពលរដ្ឋស្លូតត្រង់»។
វិទ្យុអាស៊ីសេរី មិនអាចទទួលបានការឆ្លើយតបរបស់លោកចៅក្រម ខាំ សុផារី បានទេដោយលោកលើកទូរស័ព្ទហើយឆ្លើយថាស្ដាប់មិនឮទៅវិញ។
លោក ផន ណុល ជាតំណាងពលរដ្ឋមានជម្លោះដី១៣៥គ្រួសារ ដែលរស់នៅក្នុងភូមិយាយសែន ឃុំព្រែកខ្សាច់ ស្រុកគិរីសាគរ ខេត្តកោះកុង ដែលត្រូវបានតុលាការឃុំខ្លួនក្នុងពន្ធនាគារកាលពីថ្ងៃទី ២៧ តុលា ពីបទចោទបំផ្លាញទ្រព្យសម្បត្តិក្រុមហ៊ុនរបស់លោកឧកញ៉ា លី យ៉ុងផាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។