តំណាងអ្នកភូមិប្រមាណ ១០នាក់ បានចូលទៅដាក់លិខិតនៅក្រសួងរៀបចំដែនដី នគរូបនីយកម្ម និងសំណង់ ដើម្បីសុំឲ្យចេញប្លង់កម្មសិទ្ធិបញ្ចប់ទំនាស់ដីធ្លីរបស់ពួកគាត់។
អ្នកស្រី ផាវ ញ៉ើង ពលរដ្ឋមកពីភូមិព្រែកជីក ឃុំជីខលើ ស្រុកស្រែអំបិល ខេត្តកោះកុង បានថ្លែងនៅថ្ងៃទី៧ ឧសភា ថា ពួកគាត់អស់ជំនឿលើអាជ្ញាធរមូលដ្ឋានក្នុងការដោះស្រាយទំនាស់ដីធ្លី ដែលកើតមានឡើងនៅតំបន់នោះ ទើបមករកដំណោះស្រាយពីក្រសួងជំនាញ៖ «ខ្ញុំមកនេះ គឺខ្ញុំសំណូមពរសុំឲ្យក្រសួងឲ្យដោះស្រាយទំនាស់នេះ ហើយនឹងធ្វើប័ណ្ណកម្មសិទ្ធិឲ្យពួកយើងខ្ញុំ។ ខ្ញុំសង្ឃឹមថា នាយករដ្ឋមន្ត្រី សម្ដេច ហ៊ុន សែន នឹងអន្តរាគមន៍ក្នុងរឿងនេះ»។
ក្នុងពេលដែលពលរដ្ឋមកដល់មុខក្រសួង គឺមានក្រុមមន្ត្រីបានអនុញ្ញាតឲ្យតំណាងពលរដ្ឋទាំងនោះចូលទៅដាក់លិខិត។
យ៉ាងណាក៏ដោយ មន្ត្រីក្នុងក្រសួងនេះមួយរូប បានចេញមកណែនាំប្រជាពលរដ្ឋឲ្យប្រជាពលរដ្ឋដាក់លិខិតនេះទៅគណៈកម្មការគ្រប់គ្រងដីធ្លីថ្នាក់ស្រុកជាមុនសិន៖ «ឲ្យតែបានកាន់កាប់ដាំដុះជាក់ស្ដែង បងប្អូនកុំបារម្ភ គ្រាន់តែយើងមុននឹងក្រោយទេ ព្រោះគេធ្វើការគេមានផែនការរបស់គេ ចូលភូមិណា ឃុំណា គេមិនអាចធ្វើតែម្ដងបានទេ។ (ប្រជាពលរដ្ឋ) អត់បារម្ភម៉េច បើក្រុមហ៊ុនយកអាត្រាក់ទៅឈូសភ្លឺស្រែដំណាំចោលហើយ ឲ្យខ្ញុំទ្រាំម៉េច? ឥឡូវឲ្យតែដឹងថាអ៊ីចឹង ហើយចាំយើងទៅជួបឧត្ដមអភិបាល ប្រហែលលោកបានជ្រាបរឿងហ្នឹង បងប្អូនអញ្ជើញទៅគណៈកម្មការគ្រប់គ្រងដីរដ្ឋថ្នាក់ស្រុកសិន»។
ពលរដ្ឋដែលមកដាក់លិខិតនោះ គឺមកពីសហគមន៍ចំនួន៧ ស្ថិតក្នុងស្រុកចំនួន៣ គឺស្រុកស្រែអំបិល ស្រុកបុទុមសាគរ និងស្រុកគីរីសាគរ នៃខេត្តកោះកុង។ ពលរដ្ឋទាំងនោះមានទំនាស់ដីធ្លីជាមួយក្រុមហ៊ុនវិនិយោគរបស់ចិន មួយឈ្មោះ ញូញៀន ឌីវឺឡុបមែន (Union Development Group) និងក្រុមហ៊ុនអភិវឌ្ឍន៍របស់លោក ហេង ហ៊ុយ។
កាលពីថ្ងៃទី៦ ឧសភា ឆ្នាំ២០១៣ ប្រជាពលរដ្ឋទាំង ៧សហគមន៍នេះ ក៏បានយកលិខិតសុំអន្តរាគមន៍សុំប្លង់កម្មសិទ្ធិដីធ្លីទៅខុទ្ទកាល័យលោកនាយករដ្ឋមន្ត្រី ហ៊ុន សែន ដែរ ប៉ុន្តែត្រូវប៉ះទង្គិចជាមួយក្រុមសមត្ថកិច្ច។ ទោះជាយ៉ាងណា ពលរដ្ឋនៅតែបានដាក់លិខិតសុំអន្តរាគមន៍នេះដដែល។ រីឯដំណោះស្រាយយ៉ាងណានោះ ពុំមានស្ថាប័នណាមួយផ្ដល់ចម្លើយតាមការស្នើសុំនេះយ៉ាងណានៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។