ប្រជាពលរដ្ឋប្រមាណ ២៥០នាក់ តំណាងឲ្យ ៣២៩គ្រួសារ នៅភូមិគ្រង និងភូមិថ្ពង ឃុំស្នួល ស្រុកស្នួល ខេត្តក្រចេះ មានជម្លោះដីធ្លីដ៏រាំរ៉ៃជាមួយក្រុមហ៊ុន ហ៊រីហ្សិន អាគ្រីខាល់ឆ័រ ឌីវឡុបមេន (Horizon Agriculture Development Co.,Ltd)កំពុងស្នាក់នៅបណ្តោះអាសន្នក្នុងវត្តសាមគ្គីរង្ស៊ី បដិសេធសំណើរបស់អភិបាលរងខេត្តនេះ ដែលចង់អោយពួកគេត្រឡប់ទៅលំនៅឋានវិញរង់ចាំដំណោះស្រាយពីខុទ្ទការល័យនាយករដ្ឋមន្រ្តី។
លោក សួន វិច្ឆិកា តំណាងពលរដ្ឋបានឲ្យដឹងកាលពីថ្ងៃទី១ ខែ សីហាថា សំណើរបស់អភិបាលរងខេត្តកើតឡើងបន្ទាប់ពីពួកគាត់នាំគ្នា ដើរដាក់ញត្តិទៅផ្ទះលោកនាយករដ្ឋមន្ត្រី ហ៊ុន សែន អោយជួយអន្តរាគមន៍ ដោះស្រាយជូនពលរដ្ឋ ដើម្បីទទួលបានប័ណ្ណកម្មសិទ្ធិកាន់កាប់ដីគ្រប់ចំនួន។ តែត្រូវបានអាជ្ញាធរខណ្ឌមានជ័យមកទទួលយកញត្តិដោយសន្យានាំយកញត្តិនោះប្រគល់ជូនខុទ្ទកាល័យលោកនាយករដ្ឋមន្ត្រី ហ៊ុន សែន ផ្ទាល់។
ជម្លោះដីធ្លីរវាងអ្នកភូមិ និងក្រុមហ៊ុន កើតឡើងតាំងពី ឆ្នាំ ២០០៨ មករហូតដល់ឆ្នាំ ២០១២ ក្រុមការងារយុវជនស្ម័គ្រចិត្តវាស់វែងដីធ្លី បានចុះវាស់វែងជូនដល់ពលរដ្ឋចប់សព្វគ្រប់ហើយ។ ប៉ុន្តែដោយសារដីនេះនៅមានជម្លោះក្រុមហ៊ុន ខាងអាជ្ញាធរបានចេញប្លង់រឹងដល់ពលរដ្ឋប្រមាណ ៦៥%។ រហូតដល់ឆ្នាំ ២០១៤នេះ ពលរដ្ឋចំនួន ៣២៩ គ្រួសារទៀតនៅមិនទាន់ទទួលបានការដោះស្រាយនៅឡើយ។
តំណាងពលរដ្ឋទាំងអស់អះអាងថានឹងមិនត្រឡប់ទៅវិញឡើយ ល្គឹកណាមានដំណោះស្រាយជាក់លាក់ ហើយទុកពេលឲ្យអាជ្ញាធរ ៣ថ្ងៃ។ បើពុំដូច្នោះទេ ពលរដ្ឋនឹងនាំគ្នាហែញត្តិទៅផ្ទះលោកនាយករដ្ឋមន្ត្រីជាថ្មីម្តងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។