យ៉ាងហោចណាស់តំណាងពលរដ្ឋ ២នាក់ត្រូវបានចាប់ខ្លួន ផ្ទះត្រូវដុតកម្ទេច នៅក្នុងសកម្មភាពឈូសឆាយដីរបស់ក្រុមពលរដ្ឋ ៣១គ្រួសារ នៅចំណុចអូរសំពុង ឃុំដំរីផុង ស្រុកឆ្លូង ខេត្តក្រចេះ។ នៅពេលដុតនោះទៀតសោត បើផ្ទះណាសសរធំ មិនងាយឆេះ គេមានរណារអាររំលំបន្ថែមទៀត។
គិតមកដល់ថ្ងៃទី៩ ខែមេសា ផ្ទះពលរដ្ឋចំនួន ៦ខ្នង ត្រូវដុតចោល និង ៤ខ្នងទៀតត្រូវគ្រឿងចក្ររុញដួលរាបដល់ដី ផលដំណាំជាច្រើនទៀត ត្រូវឈូសឆាយគ្មានសល់។ ទោះបែបនេះក្តី ក្រុមពលរដ្ឋ ៣១គ្រួសារដែលកំពុងរងគ្រោះ នៅតែមិនព្រមចាកចេញពីដីមានជម្លោះ បើទោះជាអាជ្ញាធរខេត្តចោទថា ពួកគេរស់នៅទីនោះខុសច្បាប់ក្តី។
លោកស្រី សុខ រុន ស្រែកសុំឲ្យថ្នាក់ដឹកនាំប្រទេសជួយអន្តរាគមន៍។ លោកស្រីរៀបរាប់ថា ពេលនេះលោកស្រីក្លាយជាចោរលួចរស់នៅលើដីរបស់ខ្លួន ក្នុងពេលដែលពលរដ្ឋ ៧២គ្រួសារ និងក្រុមសមត្ថកិច្ចមិននៅទីនេះ៖ «ដល់តែយប់ពេលក្រុមសមត្ថកិច្ចគេចេញពីដីបានខ្ញុំហ៊ានចូលមកលើដីវិញ មិនបានធ្វើអ្វីក្រៅពីអង្គុយយំទេ»។
រយៈពេល ៤ថ្ងៃដែលអាជ្ញាធរខេត្តក្រចេះ បានផ្តល់ដីឲ្យក្រុមពលរដ្ឋ ៧២គ្រួសារ ដែលចាប់ផ្ដើមកាលពីថ្ងៃទី៦ ខែមេសា គឺមានសកម្មភាពដុតផ្ទះ យកគ្រឿងចក្រឈូសឆាយផ្ទះ និងផលដំណាំក្រុមពលរដ្ឋ ៣១គ្រួសារ ដែលកំពុងរស់នៅអាស្រ័យផលលើដីនោះ។ ការធ្វើដូចនេះ ដោយ លោក សរ ចំរុង អភិបាលខេត្តក្រចេះ ទទួលស្គាល់ពលរដ្ឋ ៧២គ្រួសារជាអ្នកមានសិទ្ធិរស់នៅលើដីនោះ និងប្រាប់ឲ្យក្រុមពលរដ្ឋ ៣១គ្រួសារចាកចេញពីដីនោះ។ ប៉ុន្តែក្រុមពលរដ្ឋ ៣១គ្រួសារ នៅតែមិនព្រមចេញពីដីនោះ ហើយបានស្វែងរកអន្តរាគមន៍ពីស្ថាប័ននានា។ រហូតដល់ថ្ងៃទី៩ ខែមេសា ពលរដ្ឋមួយចំនួនបាននាំគ្នាទៅភ្នំពេញ ដើម្បីប្ដឹងអាជ្ញាធរខេត្តក្រចេះ ទៅស្ថាប័នមួយចំនួន។
តំណាងពលរដ្ឋ ៣១គ្រួសារ ពីរនាក់ ដែលត្រូវកងកម្លាំងចាប់ខ្លួនកាលពីថ្ងៃទី៨ ខែមេសា ព្រោះចេញមកតវ៉ាប្រឆាំងសកម្មភាពនេះ គិតមកដល់ថ្ងៃទី៩ ខែមេសា នៅតែជាប់ឃុំដដែល។
លោកស្រី យស សាអែម ដែលកំពុងជាប់ឃុំស្នងការដ្ឋាននគរបាល ឲ្យដឹងថា លោកស្រីត្រូវសមត្ថកិច្ចចោទប្រកាន់ថា រារាំងការបំពេញបេសកកម្មរបស់សមត្ថកិច្ច។ លោកស្រីឲ្យដឹងទៀតថា លោក ភន់ សុវណ្ណ ដែលជាប់ឃុំដែរនោះ ត្រូវសមត្ថកិច្ចចោទប្រកាន់ថា ប្រើហិង្សាលើសមត្ថកិច្ច។ ទោះបែបនេះក្តី លោកស្រី យស អាអែម នៅតែអះអាងថា ពួកគេទាំងពីរនាក់គ្មានកំហុស និងស្នើសុំរកយុត្តិធម៌៖ «ខ្ញុំសុំឲ្យសម្ដេចនាយករដ្ឋមន្ត្រីនៅពេលដឹងឮរឿងពួកខ្ញុំ ផ្តល់យុត្តិធម៌ដល់យើងខ្ញុំផង ដែលជាអ្នកចូលរស់នៅលើដីមានជម្លោះនេះមុនក្រុមពលរដ្ឋ ៧២គ្រួសារ»។
សកម្មភាពដុតផ្ទះពលរដ្ឋនៅពេលនេះ ក៏មិនខុសពីថ្ងៃទី៨ ខែមេសា ដែរ គឺក្រុមពលរដ្ឋ ៧២គ្រួសារជាអ្នកធ្វើសកម្មភាព ចំណែកកម្លាំងសមត្ថកិច្ចជាអ្នកការពារ ហើយពួកគេនៅតែមិនទាន់ពន្យល់អំពីការបណ្ដេញពលរដ្ឋចេញពីដីនេះនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។