ប្រជាពលរដ្ឋចំនួនបីសង្កាត់ គឺសង្កាត់ព្រែកតាសេក សង្កាត់ព្រែកលៀប និងសង្កាត់ជ្រោយចង្វារ ក្នុងខណ្ឌឫស្សីកែវ អះអាងថា ពួកគាត់កំពុងរងនូវភាពអយុត្តិធម៌ពីគម្រោងអភិវឌ្ឍន៍មួយនេះ និងបានស្វែងរកកិច្ចអន្តរាគមន៍ពីស្ថានប័នពាក់ព័ន្ធ និងតាមផ្លូវច្បាប់ អស់រយៈពេលជាច្រើនឆ្នាំមកហើយ ប៉ុន្តែពុំទាន់មានលទ្ធផលនៅឡើយ។
សាលាដំបូងរាជធានីភ្នំពេញនឹងបើកការសាកសួរបឋមទៅលើភាគីពាក់ព័ន្ធក្នុងជម្លោះដីនៅតំបន់ស្ថិតនៅក្នុងគម្រោងអភិវឌ្ឍន៍ទីក្រុងរណបទំនើបនេះ នៅថ្ងៃព្រហស្បតិ៍ ទី១៣ ខែធ្នូ ឆ្នាំ២០១៣។
ក្រុមមេធាវីការពារក្តីឲ្យប្រជាពលរដ្ឋបានឲ្យដឹងថា ភាគីពាក់ព័ន្ធនឹងមកតទល់គ្នា ដើម្បីថ្លែងការណ៍បង្ហាញភស្តុតាងរៀងៗខ្លួនជុំវិញសុំណុំរឿងសុំឲ្យតុលាការចេញដីកាសម្រេចរក្សាការពារ ដែលស្នើដោយភាគីប្រជាពលរដ្ឋតាមរយៈមេធាវី។
ប្រជាពលរដ្ឋជាច្រើនរយគ្រួសារ ក្នុងសង្កាត់ព្រែកតាសេក សង្កាត់ព្រែកលៀប និងសង្កាត់ជ្រោយចង្វារ បានរងគ្រោះដោយសារមានជម្លោះជាមួយក្រុមហ៊ុន ដែលទទួលបានសិទ្ធិពីរដ្ឋាភិបាលវិយោគអភិវឌ្ឃតំបន់នោះធ្វើជាក្រុងរណប តាំងពីអាណត្តិទីមួយនៃរដ្ឋាភិបាល ក្នុងអំឡុងឆ្នាំ១៩៩៤។ ហើយចុងក្រោយនេះ កំពុងមានជម្លោះជាមួយក្រុមហ៊ុន អូ.ស៊ី.អាយ.ស៊ី រហូតមានការប្តឹងផ្តល់គ្នាដល់តុលាការ។
មេធាវីការពារក្តីខាងប្រជាពលរដ្ឋ លោក ពេជ្យ សូរិយា បានឲ្យដឹងនៅថ្ងៃទី១២ ធ្នូថា សាលាដំបូងរាជធានីភ្នំពេញគ្រោងនឹងបើកនីតិវិធីត្រៀមមួយ ទាក់ទងសុំណុំរឿងនេះតាមបណ្តឹងរបស់ប្រជាពលរដ្ឋ មុននឹងចេញសេចក្តីសម្រេចនានា ឬមុននឹងបើកសវនាការកាត់ក្តីរឿងនេះ៖ « នៅក្នុងនីតិវិធីស្អែកនេះ គឺចូលក្នុងសំណុំរឿងមួយ គេហៅថារក្សាការពារ រក្សាការពារហ្នឹងមានន័យថាហាមឃាត់មិនឲ្យក្រុមហ៊ុនហ្នឹងបូមដីដាក់ទៅលើក្រុមហ៊ុនហ្នឹងទៀតទេ ហ្នឹងខ្លឹមសារសំខាន់ទាក់ទងនឹងការបូមដី ឬក៏ការសាងសង់សំណង់អីផ្សេងៗ ឬក៏ផ្ទេរសិទ្ធិ ឬវិធានការអីផ្សេងៗ នៅលើដីហ្នឹង មានន័យថា វិធានការបណ្តោះអាសន្ន »។
វិទ្យុអាស៊ីសេរី ពុំទាន់អាចទាក់ទងតំណាងខាងក្រុមហ៊ុន អូ.ស៊ី.អាយ.ស៊ី ដើម្បីបញ្ជាក់ពីដំណើរការអភិវឌ្ឍ និងការដោះស្រាយជម្លោះជាមួយប្រជាពលរដ្ឋនៅតំបន់នោះបានទេ នៅថ្ងៃព្រហស្បតិ៍ ទី១២ ធ្នូ។
ចំណែកប្រជាពលរដ្ឋនៅតំបន់នោះមួយចំនួនធំបានអះអាងថា ពួកគាត់ភាគច្រើនពុំទាន់ទទួលបានសំណងសមរម្យពីក្រុមហ៊ុននៅឡើយ ហើយក្រុមហ៊ុននៅតែធ្វើសកម្មភាពបូមខ្សាច់ពន្លិចដីរបស់ពួកគាត់ដោយគ្មានការព្រមព្រៀង។ អ្នកភូមិទាមទារឲ្យមានការស៊ើបអង្កេត ដោះស្រាយផ្តល់យុត្តិធម៌ជូនពួកគាត់ទៅតាមផ្លូវច្បាប់។
នាយកលេខាធិការដ្ឋាន ក្រុមការងារពិសេសសិទ្ធិលំនៅឋាន លោក សៀ ភារម្យ មានប្រសាសន៍ថា ក្រុមការងារលោកនឹងតាមដានអង្កេតករណីនេះ និងត្រៀមផ្តល់ជំនួយផ្នែកច្បាប់បន្ថែមទៀតជូនប្រជាពលរដ្ឋ បើសិនជាពួកគាត់ត្រូវការចាំបាច់។
អ្នកភូមិដើមគរ នៃសង្កាត់ជ្រោយចង្វារ លើកឡើងថា ការអភិវឌ្ឍដែលធ្វើឲ្យពលរដ្ឋទឹកភ្នែក គឺកំពុងឈានដល់តំបន់របស់ពួកគាត់ទៀតហើយ បន្ទាប់ពីតំបន់បឹងកក់ និងតំបន់ដទៃទៀត។ តាមការអះអាងរបស់អ្នកភូមិ ឲ្យដឹងថា តម្លៃដីនៅតំបន់ដែលពួកគាត់កំពុងរស់នៅនេះ មានតម្លៃមិនតិចជាង ៣០០ដុល្លារក្នុងមួយម៉ែត្រក្រឡានោះទេ ប៉ុន្តែនៅមុនការបោះឆ្នោតឆ្នាំ២០១៣ នេះ មន្ត្រីសាលារាជធានីភ្នំពេញ បានកំណត់តម្លៃដីនៅតំបន់នោះត្រឹមតែ ៣ដុល្លារទៅ ៥ដុល្លារប៉ុណ្ណោះក្នុង១ម៉ែត្រក្រឡា។ ពលរដ្ឋឲ្យដឹងទៀតថា ដោយមានការតវ៉ាពីប្រជាពលរដ្ឋប្រឆាំងនឹងការកំណត់ថ្លៃទាបបែបនេះ ទើបក្រោយការបោះឆ្នោត សាលាក្រុង និងក្រុមហ៊ុនបានដំឡើងថ្លៃដល់ ១៥ដុល្លារក្នុងមួយម៉ែត្រការ៉េ។ តម្លៃនេះមានប្រជាពលរដ្ឋដែលមានដីតិចតួចខ្លះបានយល់ព្រម ប៉ុន្តែអ្នកដែលមានដីច្រើន និងផ្ទះធំសមល្មមភាគច្រើមិនយល់ព្រមឡើយ។
រដ្ឋាភិបាលបានសម្រេចផ្ដល់ដីទំហំជាង ៣០០ហិកតារ ឲ្យក្រុមហ៊ុន អូ.ស៊ី.អាយ.ស៊ី ដើម្បីធ្វើការអភិវឌ្ឍតំបន់នេះទៅជាទីក្រុងរណប។
ប្រជាពលរដ្ឋភាគច្រើនមិនជំទាស់នឹងគម្រោងអភិវឌ្ឍន៍នោះទេ ប៉ុន្តែពួកគាត់សូមឲ្យរដ្ឋាភិបាលផ្តល់លទ្ធភាពឲ្យប្រជាពលរដ្ឋបានចូលរួមធ្វើការអភិវឌ្ឍនៅតំបន់នោះផង ឬហៅថាការអភិវឌ្ឍនៅនឹងកន្លែង ឬផ្តល់សំណងសមរម្យចំពោះការខូចខាតដំណាំ ផ្ទះសម្បែង និងផ្តល់តម្លៃដីទៅតាមទីផ្សារសេរី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។