គណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា ស្នើលោកនាយករដ្ឋមន្ត្រី ហ៊ុន សែន អន្តរាគមន៍ឲ្យក្រុមហ៊ុន អូស៊ីអាយស៊ី (OCIC) ផ្អាកការអភិវឌ្ឍទីក្រុងរណបជ្រោយចង្វារជាបណ្ដោះអាសន្ន។
សំណើរបស់គណៈកម្មការទី១ ធ្វើឡើងតាមរយៈលិខិតមួយតាមរយៈប្រធានរដ្ឋសភា ហើយលិខិតនោះត្រូវបាន លោក ហេង សំរិន ផ្ញើទៅកាន់ លោក ហ៊ុន សែន រួចហើយ កាលពីថ្ងៃទី២១ ខែតុលា។
ក្នុងលិខិតផ្ញើទៅ លោក ហ៊ុន សែន ប្រធានគណៈកម្មការទី១រដ្ឋសភា លោក អេង ឆៃអ៊ាង យល់ថា បើទុកឲ្យក្រុមហ៊ុនបូមខ្សាច់ចាក់លើដីទំនាស់បន្តទៀត ដោយពុំមានដំណោះស្រាយ នោះនឹងជំរុញឲ្យមានទំនាស់កាន់តែធ្ងន់ធ្ងរ និងស្មុគស្មាញពិបាកដោះស្រាយថែមទៀត។
គណៈកម្មការទី១រដ្ឋសភា ក៏ស្នើឲ្យ លោក ហ៊ុន សែន ជំរុញឲ្យអាជ្ញាធរមានសមត្ថកិច្ច ដោះស្រាយឲ្យបានឆាប់រហ័សតាមច្បាប់រដ្ឋធម្មនុញ្ញ លិខិតបទដ្ឋាននានា និងគោលការណ៍របស់រដ្ឋាភិបាល។
មិនទាន់ឃើញមានការឆ្លើយតបយ៉ាងណាពីលោកនាយករដ្ឋមន្ត្រី ហ៊ុន សែន នៅឡើយទេ ចំពោះការស្នើសុំនេះ។ ចំណែកមន្ត្រីខុទ្ទកាល័យរបស់លោក ក៏មិនអាចទាក់ទងបានដែរ។
កាលពីថ្ងៃទី១៦ ខែតុលា ឆ្នាំ២០១៤ តំណាងប្រជាពលរដ្ឋរងផលប៉ះពាល់ដោយសារគម្រោងអភិវឌ្ឍន៍ក្រុងរណបរបស់ក្រុមហ៊ុន អូស៊ីអាយស៊ី បានដាក់ពាក្យបណ្ដឹងទៅកាន់គណៈកម្មការទី១រដ្ឋសភា ដើម្បីឲ្យគណៈកម្មការនេះជួយដោះស្រាយបញ្ហាទំនាស់ដីធ្លីរបស់ពួកគេ។
ក្នុងពេលជាមួយគ្នានេះដែរ ពលរដ្ឋបានបន្តប្ដឹងទៅកាន់សាលាឧទ្ធរណ៍ ដើម្បីឲ្យតុលាការចេញសេចក្តីសម្រេចរក្សាការពារ មិនឲ្យក្រុមហ៊ុនធ្វើការអភិវឌ្ឍរហូតទាល់តែមានការស្វែងរកដំណោះស្រាយជាមុនសិន។ បណ្ដឹងទៅកាន់សាលាឧទ្ធរណ៍នេះ ធ្វើឡើងក្រោយពីសាលាដំបូងរាជធានីភ្នំពេញ បានចេញដីកាសម្រេចលើកចោលបណ្ដឹងរក្សាការពាររបស់ពលរដ្ឋ កាលពីខែមីនា ឆ្នាំ២០១៤ ដោយសំអាងហេតុផលថា តាមកិច្ចសន្យាជួលដីរវាងសាលារាជធានីភ្នំពេញ និងក្រុមហ៊ុន អូស៊ីអាយស៊ី បញ្ជាក់ថា សាលារាជធានីភ្នំពេញ ជាអ្នកមានកាតព្វកិច្ចដោះស្រាយគោលនយោបាយឲ្យប្រជាពលរដ្ឋ។ យ៉ាងណា ចៅក្រមជំនុំជម្រះសាលាឧទ្ធរណ៍ លោក ប៉ុល សំអឿន ប្រកាសកាលពីថ្ងៃទី២២ តុលា ថា តុលាការនឹងចេញសេចក្តីសម្រេចនៅថ្ងៃទី២៧ តុលា ខាងមុខ។
ក្រុមហ៊ុន អូស៊ីអាយស៊ី ទទួលបានសិទ្ធិវិនិយោគ ៩៩ឆ្នាំ ក្នុងការអភិវឌ្ឍក្រុងរណបជ្រោយចង្វារ បន្ទាប់ពីគម្រោងទី១របស់ខ្លួននៅកោះពេជ្រ។ ក្រុងរណបជ្រោយចង្វារនេះ មានទំហំដីជិត ៤០០ហិកតារ (៣៨៧ហិកតារ) គ្របដណ្ដប់លើភូមិ៥ ក្នុងសង្កាត់ចំនួន៣ គឺសង្កាត់ជ្រោយចង្វារ ព្រែកតាសេក និងព្រែកលៀប ក្នុងខណ្ឌជ្រោយចង្វារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។