សកម្មជនដីធ្លី និងជាអ្នកដែលទទួលរងនូវការគំរាមកំហែងទាំង ៤នាក់ រួមមាន អ្នកស្រី អ៊ុំ សុំភី លោក ផេង រុំ លោក រាជ សីម៉ា និងលោក ញឹម ញឿន បានបញ្ជាក់នៅថ្ងៃទី១៦ ខែតុលា ថា ពួកគាត់កំពុងតែរស់នៅក្នុងភាពភ័យខ្លាច ដោយសារតែសមត្ថកិច្ចនៅមិនទាន់រកឃើញជនល្មើសដែលបានសរសេរលិខិតអនាមិក មកគំរាមកំហែងពួកគាត់។
សកម្មជនដីធ្លីទាំង ៤នាក់នោះ បានទទួលរងនូវការជេរប្រមាថ និងគំរាមកំហែងដល់អាយុជីវិត តាមរយៈលិខិតអនាមិក កាលពីព្រឹកថ្ងៃទី៦ ខែតុលា កន្លងទៅ ដោយសារពួកគាត់មានទំនាស់ដីធ្លីដ៏រ៉ាំរ៉ៃជាមួយក្រុមហ៊ុន ខេ.ឌី.ស៊ី (KDC) នៅភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង។
អ្នកស្រី អ៊ុំ សុភី មានប្រសាសន៍ថា ករណីគំរាមកំហែងបានកើតឡើងជាបន្តបន្ទាប់មកលើរូបអ្នកស្រី និងតំណាងអ្នកភូមិឡពាង ផ្សេងទៀត៖ «សំណូមពរខាងតុលាការក្ដី ខាងអាជ្ញាធរក្ដី សូមឲ្យជួយរកអ្នកដែលគំរាមកំហែងដល់ក្រុមគ្រួសារពួកខ្ញុំ ដើម្បីការពារសុវត្ថិភាពពួកខ្ញុំផង ខ្ញុំស្ថិតនៅក្នុងសភាពមួយដែលគេគំរាមកំហែងមកបន្តបន្ទាប់អ៊ីចឹងណា»។
បន្ថែមលើនេះ លោក រាជ សីម៉ា មានប្រសាសន៍ថា លោកបានដាក់ពាក្យបណ្ដឹងចូលទៅកាន់តំណាងអយ្យការអមសាលាដំបូងខេត្តកំពង់ឆ្នាំង នៅថ្ងៃទី៨ ខែតុលា ក៏ប៉ុន្តែមកដល់ថ្ងៃនេះ លោកនៅមិនទាន់ទទួលបានដំណឹងអ្វីថ្មីជុំវិញករណីនេះ ពីខាងតំណាងអយ្យការនៅឡើយទេ៖ «នៅតែមានការភ័យខ្លាច និងព្រួយបារម្ភ ព្រោះថាគំរាមកំហែងផ្ទាល់មុខ គឺខ្ញុំអត់សូវខ្លាចទេ កាលណាដែលគំរាមកំហែងជាសំបុត្រ អ៊ីចឹងខ្ញុំភ័យខ្លាចជាងអាការគំរាមកំហែងផ្ទាល់មុខ បើខ្ញុំស្លាប់មានការចាប់អ្នកហ្នឹងឯងបណ្ដោយ»។
លោកបញ្ជាក់ថា ករណីគំរាមកំហែងមកលើពួកគាត់ទាំង ៤នាក់ គឺអាចបណ្ដាលពីរឿងទំនាស់ដីធ្លីច្រើនជាងរឿងនយោបាយ។ លោកបន្តថា ក្រុមប្រជាពលរដ្ឋកំពុងប្រឈមទៅនឹងបញ្ហាចំនួន ៣សំខាន់ៗ គឺការគំរាមកំហែង ការបាត់បង់ដីធ្លី និងបញ្ហាជីវភាពរស់នៅប្រចាំថ្ងៃ។ ហើយបច្ចុប្បន្ន ដោយមានជីវភាពខ្វះខាត ក្រុមអ្នកភូមិបានដើរកាប់ដីយកជន្លេនទៅលក់ និងគ្រួសារខ្លះទៀតត្រូវបង្ខំចិត្តធ្វើចំណាកស្រុក ទៅធ្វើការនៅប្រទេសថៃ ដើម្បីយកប្រាក់មកផ្គត់ផ្គង់ជីវភាពគ្រួសារ។
ទាក់ទងនឹងបញ្ហានេះ នាយកក្រឡាបញ្ជីព្រះរាជអាជ្ញា លោក ហ៊ឹម ពុទ្ធាសុរិយៈ មានប្រសាសន៍ថា លោកបានទទួល និងបញ្ជូនពាក្យបណ្ដឹងនោះទៅកាន់តំណាងអយ្យការរួចហើយ ក៏ប៉ុន្តែ ដំណើរការនៃនីតិវិធីដល់ណានោះ លោកមិនបានជ្រាបទេ។
វិទ្យុអាស៊ីសេរី មិនអាចទាក់ទងព្រះរាជអាជ្ញាអមសាលាដំបូងខេត្តកំពង់ឆ្នាំង លោក ពេញ វិបុល ដើម្បីសុំការអត្ថាធិប្បាយបន្ថែមជុំវិញបញ្ហានេះបានទេ នៅរសៀលថ្ងៃទី១៦ ខែតុលា។
មន្ត្រីសម្របសម្រួលសមាគមអាហុក (Adhoc) ប្រចាំខេត្តកំពង់ឆ្នាំង លោក សំ ច័ន្ទគា ថ្លែងថា ទុក្ខលំបាក ឬក្ដីបារម្ភរបស់ប្រជាពលរដ្ឋនៅភូមិឡពាង មិនមែនទើបតែកើតមានក្នុងពេលថ្មីៗនេះទេ។ ដូច្នេះ រដ្ឋាភិបាលអាណត្តិថ្មី ឬសមត្ថកិច្ចពាក់ព័ន្ធទាំងអស់ ត្រូវតែគិតគូរ និងដោះស្រាយបញ្ហាដែលកើតមានជូនពួកគាត់ឲ្យបានឆាប់៖ «រដ្ឋាភិបាលអាណត្តិថ្មីនេះ បើខ្លួនអះអាងថា ខ្លួនកែទម្រង់ ត្រូវចាប់ផ្ដើមយករឿងឡពាង នេះ មកដោះជាមុន រកជនល្មើសដែលធ្វើការគំរាមកំហែងកន្លងមកនេះយកមកផ្ដន្ទាទោស និងបង្កើតគណៈកម្មការធ្វើការដោះស្រាយជម្លោះដីធ្លីនេះឲ្យបានចប់ទៅ»។
តំណាងអ្នកភូមិឡពាង បានបញ្ជាក់ថា ប្រជាពលរដ្ឋក្នុងភូមិភាគច្រើនបានរងទុក្ខ និងកំពុងជួបវិបត្តិសេដ្ឋកិច្ចក្នុងគ្រួសារធ្ងន់ធ្ងរ ក្រោយពីមានទំនាស់ដីធ្លីជាមួយក្រុមហ៊ុន ខេ.ឌី.ស៊ី របស់លោកជំទាវ ជា ខេង ភរិយាអតីតរដ្ឋមន្ត្រីក្រសួងឧស្សាហកម្ម រ៉ែ និងថាមពល លោក ស៊ុយ សែម តាំងពីឆ្នាំ២០០៧ ហើយរហូតមកទល់នឹងពេលនេះ នៅមានប្រជាពលរដ្ឋរងគ្រោះចំនួន ៥២គ្រួសារទៀត នៅមិនទាន់ដោះស្រាយចប់នៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។