តុលាការខេត្តកោះកុង កោះហៅប្រជាពលរដ្ឋ ៤ នាក់ ទៅសាកសួរពីករណីទំនាស់ដី ជាមួយក្រុមហ៊ុន អេស អ៊ី ហ្សេដ្ស (SEZ) របស់លោកឧកញ៉ា លី យ៉ុងផាត់ នៅព្រឹកថ្ងៃទី ២៣ខែមិថុនា។
ក្នុងពេលមានការកោះហៅសាកសួរនោះដែរប្រជាពលរដ្ឋប្រមាណ ៦០នាក់ បានប្រមូលផ្តុំគ្នានៅមុខសាលាដំបូងខេត្តកោះកុង ដើម្បីទាមទារឲ្យតំណាងក្រុមហ៊ុនធ្វើការដោះស្រាយជាមួយពលរដ្ឋ ហើយជាលទ្ធផលគឺមិនមានការឃាត់ខ្លួនអ្វីទេ។
លោក រួន សុផល តំណាងពលរដ្ឋម្នាក់ក្នុងចំណោមអ្នកទាំង ៤ ដែលតុលាការកោះហៅចូលទៅសាកសួរពីព្រឹកថ្ងៃទី២៣ខែមិថុនា បានអំពាវសុំឲ្យតំណាងក្រុមហ៊ុន ជជែកដោះស្រាយដោយសន្តិវិធី ផ្ទាល់មាត់ជាមួយពលរដ្ឋម្ចាស់ដី កុំឲ្យមានជម្លោះត្បិតដីនោះជាដីចម្ការ ដូច្នេះពលរដ្ឋមិនចង់ឲ្យឃ្វាល ឬវៀងដីឡើយ៖ «បាទ ! ខ្ញុំចង់ជួបមែនទែនជាមួយតំណាងក្រុមហ៊ុន និងក្រុមហ៊ុនទាំងអស់ ចង់ជួបដើម្បីចរចាគ្នា យើងគ្មានបញ្ហាទេ យើងចង់តែដោះស្រាយ ព្រោះដីជាដីចម្ការ មិនមែនដីភូមិករ ដូច្នេះហើយយើងមិនចង់ឲ្យឃ្វាល ឬវៀងទេ យើងសុំឲ្យមានការដោះស្រាយ»។
ពលរដ្ឋមានជម្លោះជាមួយក្រុមហ៊ុន អេស អ៊ី ហ្សេដ្ស (SEZ) របស់លោកឧកញ៉ា លី យ៉ុងផាត់ មានចំនួន បីភូមិគឺ ភូមិព្រែកខ្សាច់ ភូមិសំរុងតាកែវ និងភូមិយាយស៊ែន ឃុំព្រែកខ្សាច់ ស្រុកគីរីសាគរ ខេត្តកោះកុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។