អាជ្ញាធរខេត្តមណ្ឌលគិរី ប្រើប្រាស់កងកម្លាំងប្រដាប់អាវុធ ដណ្ដើមគ្រឿងចក្រដែលអ្នកភូមិជនជាតិព្នង ចាប់ជាចំណាប់ខ្មាំងដើម្បីទាមទារឲ្យក្រុមហ៊ុន ប៊ិញ ភឿក បញ្ឈប់ឈូសឆាយដីចម្ការវិលជុំអ្នកភូមិ។ មន្ត្រីឃ្លាំមើលសិទ្ធិមនុស្ស សម្ដែងការបារម្ភចំពោះការប្រើកងកម្លាំង ដើម្បីដោះស្រាយបញ្ហាតវ៉ារបស់ពលរដ្ឋ។
ប្រជាពលរដ្ឋភូមិចក់ចារ ឃុំស្រែឈូក ស្រុកកែវសីមា ខេត្តមណ្ឌលគិរី ឲ្យដឹងថា កងកម្លាំងចម្រុះរបស់អាជ្ញាធរខេត្តប្រមាណ ៤០នាក់ ត្រូវបានបញ្ជូនទៅកាន់កន្លែងអ្នកភូមិរឹបអូសគ្រឿងចក្រក្រុមហ៊ុន ប៊ិញ ភឿក នៅព្រឹកថ្ងៃទី៣ ខែមករា។
តំណាងអ្នកភូមិ លោក យ៉ាន ម៉ៅ ថ្លែងថា កងកម្លាំងមានទាហាន ប៉ូលិស និងកងរាជអាវុធហត្ថឯកសណ្ឋានប្រដាប់ដោយអាវុធ គំរាមអ្នកភូមិមិនឲ្យតបត ខណៈកងកម្លាំងដាក់ពង្រាយធ្វើរបាំងការពារឲ្យបុគ្គលិកក្រុមហ៊ុន បើកគ្រឿងចក្រឈូសដីចាកចេញពីកន្លែងអ្នកភូមិរឹបអូសទុកជាចំណាប់ខ្មាំង។ លោកបន្តថា កងកម្លាំងបានដកចេញវិញ បន្ទាប់ពីគ្រឿងចក្រត្រូវបានរំដោះចេញពីពលរដ្ឋ។ ជាមួយនោះដែរ ក្រុមប្រដាប់អាវុធទាំងនោះគំរាមឲ្យអ្នកភូមិចាកចេញពីដីតវ៉ា បើមិនដូច្នេះទេ ពួកគេនឹងប្រើកងកម្លាំងបង្ក្រាបជាថ្មី មិនឲ្យប្រជាពលរដ្ឋមកតាំងទីលំនៅលើដីនោះបានឡើយ៖ «នាំគ្នាមកយកអាត្រាក់ពីប្រជាពលរដ្ឋ មិនសុំពីប្រជាពលរដ្ឋ បាទ! ១៧ឡានប្រដាប់ដោយអាវុធទៀត។ គេគំរាមប្រជាពលរដ្ឋទៀត អ្នកណាហ៊ានតវ៉ាគេចាប់បោះដាក់ឡាន»។
កាលពីថ្ងៃទី១ ខែមករា អ្នកភូមិប្រមាណ ៧០នាក់ បានរឹបអូសគ្រឿងចក្រក្រុមហ៊ុន ប៊ិញ ភឿក ១ កំពុងឈូសឆាយដីដែលអ្នកភូមិអះអាងថា ជាអតីតដីចម្ការវិលជុំពួកគាត់ ប៉ុន្តែក្រុមហ៊ុនបានឈូសឆាយយកដោយសំអាងថា រដ្ឋបានផ្តល់ដីតំបន់នោះសម្រាប់សម្បទានសេដ្ឋកិច្ចរបស់ក្រុមហ៊ុន។
ទាក់ទិនករណីនេះដែរ អភិបាលស្រុកកែវសីមា លោក ស៊ិន វណ្ណវុឌ្ឍ មានប្រសាសន៍បញ្ជាក់ថា អាជ្ញាធរសម្រេចដាក់កងកម្លាំងដកហូតគ្រឿងចក្រពីប្រជាពលរដ្ឋវិញ ចៀសវាងកុំឲ្យប្រជាពលរដ្ឋប្រើអំពើហិង្សាដុតបំផ្លាញគ្រឿងចក្រ ដែលជាហេតុនាំឲ្យអ្នកភូមិត្រូវប្រឈមមុខនឹងកំហុស។ លោកបន្តថា វិធានការច្បាប់នឹងត្រូវយកទៅអនុវត្តជាថ្មី ប្រសិនអ្នកភូមិនៅតែបន្តនាំគ្នាសង់រោងលើដីសម្បទានរបស់ក្រុមហ៊ុន៖ «ប្រជាពលរដ្ឋមួយចំនួនគាត់យករបស់គេទៅ បើមានបញ្ហាអ្វីទៅនរណាទទួលខុសត្រូវ? សមត្ថកិច្ចអស់សម្របសម្រួលហើយ មានតែវិធានការច្បាប់»។
មន្ត្រីឃ្លាំមើលសិទ្ធិមនុស្សសមាគមអាដហុក (adhoc) ខេត្តមណ្ឌលគិរី ចាត់ទុកការប្រើកម្លាំងប្រដាប់អាវុធគំរាមបង្ក្រាបស្មារតីពលរដ្ឋទន់ខ្សោយ ថាជាការរំលោភសិទ្ធិមនុស្សធ្ងន់ធ្ងរ។ លោកអំពាវនាវឲ្យក្រុមអាជ្ញាធរ ព្យាយាមដោះស្រាយការតវ៉ារបស់ពលរដ្ឋដោយសន្តិវិធី ស្របតាមគោលនយោបាយដោះស្រាយដីធ្លីរបស់រាជរដ្ឋាភិបាល៖ «សម័យនេះហើយគេមិនដែលយកកងកម្លាំងប្រដាប់អាវុធ មានអាវុធគ្រប់ដៃទៅបង្ក្រាបប្រជាពលរដ្ឋគ្មានអ្វីក្នុងដៃទេ។ អ៊ីចឹងមានន័យថា ចុះទៅសម្លាប់ប្រជាពលរដ្ឋ មិនមែនចុះទៅរកដំណោះស្រាយជូនពលរដ្ឋទេ»។
កាលពីថ្ងៃសុក ទី២ ខែមករា អ្នកភូមិចក់ចារ ជាង ៧០នាក់ បានរៀបចំពិធីសែនព្រេនដាក់បណ្ដាសាជនទាំងឡាយណាដែលរំលោភយកដីធ្លីពលរដ្ឋ ជាពិសេសក្រុមហ៊ុន ប៊ិញ ភឿក ១ ដែលអ្នកភូមិចោទថាបានរំលោភយកដីអ្នកភូមិជនជាតិដើមភាគតិចប្រមាណ ៥០០ហិកតារ។
តំណាងអ្នកភូមិ លោក យ៉ាន ម៉ៅ អះអាងថា អ្នកភូមិសម្រេចចិត្តមិនចាកចេញពីដីដែលអ្នកភូមិកំពុងទាមទារនោះទេ បើទោះបីក្រុមសមត្ថកិច្ចប្រើកម្លាំងបង្ក្រាបអ្នកភូមិយ៉ាងណាក្តី។ នៅរសៀលថ្ងៃដដែលនេះ អ្នកភូមិបាននាំគ្នាសង់រោងប្រក់សំពត់កៅស៊ូបានជិត ១០រោងជាថ្មីទៀត ដើម្បីបញ្ជាក់ថា ពួកគាត់ក្រាញននៀលមិនខ្លាចស្លាប់ តស៊ូទាមទារដីពួកគាត់មកវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។