ពលរដ្ឋ​ខេត្ត​មណ្ឌលគិរី​អំពាវនាវ​ឲ្យ​ទប់ស្កាត់​ការ​កាត់​ដី​ព្រៃ​សហគមន៍​ឲ្យ​ក្រុមហ៊ុន

សហគមន៍​ការពារ​ព្រៃ​ឈើ​ជន​ជាតិ​ដើម​ភាគ​តិច​ព្នង នៅ​ខេត្ត​មណ្ឌលគិរី ចោទ​ប្រកាន់​ប្រធាន​សហគមន៍​របស់​ខ្លួន​ថា​បាន​គំរាម​សមាជិក​សហគមន៍​ឲ្យ​យល់​ព្រម​កាត់​ដី​ព្រៃ​សហគមន៍​មួយ​ផ្នែក ទៅ​ឲ្យ​ក្រុមហ៊ុន​សម្បទាន​សេដ្ឋកិច្ច ផ្ទុយ​ពី​គោលការណ៍​សហគមន៍​ជា​អ្នក​ការពារ​ព្រៃ​ឈើ។
ដោយ រដ្ឋា វីសាល
2013-02-27
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

សមាជិក​សហគមន៍​ការពារ​ព្រៃ​ឈើ ភូមិ​ស្រែអំពិល ឃុំ​ស្រែខ្ទុំ ស្រុក​កែវសីមា ខេត្ត​មណ្ឌលគិរី នៅ​ថ្ងៃ​ពុធ ទី២៧ ខែ​កុម្ភៈ ឆ្នាំ​២០១៣ អំពាវនាវ​ឲ្យ​អាជ្ញាធរ​ពាក់ព័ន្ធ​ខេត្ត ចាត់​វិធានការ​ទប់ស្កាត់​ការ​ប៉ុនប៉ង​កាត់​ដី​ព្រៃ​សហគមន៍​ទៅ​ឲ្យ​ក្រុមហ៊ុន​សម្បទាន ដោយ​បំពាន​ច្បាប់។

សេចក្តី​អំពាវនាវ​នេះ ធ្វើ​ឡើង​បន្ទាប់​ពី​ប្រធាន​សហគមន៍​ការពារ​ព្រៃ​ឈើ​ភូមិ​ស្រែអំពិល កាល​ពី​ដើម​សប្ដាហ៍ បាន​កោះ​ប្រជុំ​សមាជិក​របស់​ខ្លួន ហើយ​ចលនា​ឲ្យ​សមាជិក​សហគមន៍​យល់​ព្រម​ប្រគល់​ដី​តំបន់​ព្រៃ​ឈើ​មួយ​ផ្នែក ដែល​សហគមន៍​អភិរក្ស​ទៅ​ឲ្យ​ក្រុមហ៊ុន​សម្បទាន​មួយ​ឈ្មោះ សុវណ្ណ​រាជសី។

សមាជិក​សហគមន៍​មួយ​រូប​សុំ​មិន​ឲ្យ​បញ្ចេញ​ឈ្មោះ មាន​ប្រសាសន៍​បញ្ជាក់​ថា ប្រធាន​សហគមន៍​បាន​ចលនា​ឲ្យ​អ្នក​ភូមិ​ប្រគល់​ដី​មួយ​ផ្នែក ដែល​សហគមន៍​គ្រប់គ្រង​អាស្រ័យ​ផល​តាម​ប្រពៃណី​ជន​ជាតិ​ដើម​ភាគ​តិច​ព្នង ដោយ​សំអាង​ថា ដី​នោះ​ស្ថិត​ក្នុង​ផែនទី​ដី​សម្បទាន​របស់​ក្រុមហ៊ុន​សុវណ្ណ​រាជសី។

សមាជិក​សហគមន៍​ដដែល​បន្ត​ថា ប្រធាន​សហគមន៍​បាន​ព្រមាន​អ្នក​ភូមិ​ថា ប្រសិន​មិន​យល់​ព្រម​កាត់​ដី​នោះ​ឲ្យ​ក្រុមហ៊ុន​ទេ ក្រុមហ៊ុន​នឹង​ធ្វើ​ការ​ឈូស​ឆាយ​យក​ដី​នោះ​ដោយ​គ្មាន​ការ​ទទួល​ខុស​ត្រូវ៖ «មេ​សហគមន៍​បាន​ទៅ​ជួប​ខាង​ក្រុមហ៊ុន​មេៗ​ហ្នឹង មក​វិញ​គេ​ឲ្យ​យោបល់​អ៊ីចឹង គេ​ថា​ឥឡូវ​ក្រុមហ៊ុន​គេ​សុំ​យើង តើ​យើង​ឲ្យ​ឬ​អត់? បើ​សិន​យើង​មិន​ឲ្យ គេ​ត្រូវ​តែ​ឈូស​ដែរ ព្រោះ​ដី​នេះ​គេ​អារ​កាត់​ឲ្យ​ពី​ថ្នាក់​លើ​មក​អស់​ហើយ។ ប្រធាន​សហគមន៍​ហ្នឹង ម្សិលមិញ​ថា បើ​សិន​ក្រុមហ៊ុន​ចូល​ឈូស ប្រធាន​សហគមន៍​លែង​ដឹង​ឮ​ហើយ ប្រជាពលរដ្ឋ​ណា​ខ្លាំង​ឲ្យ​ទៅ​ទប់ទល់​ទៅ»

សេចក្តី​រាយការណ៍​របស់​ប្រជាពលរដ្ឋ​សហគមន៍​ភូមិ​ស្រែអំពិល ក៏​ឲ្យ​ដឹង​ថា កាល​ពី​ខែ​មករា កន្លង​ទៅ ក្រុមហ៊ុន​សុវណ្ណ​រាជសី បាន​ដាក់​គ្រឿងចក្រ​បម្រុង​ឈូស​ឆាយ​ដី​ព្រៃ​សហគមន៍ ប៉ុន្តែ​ក្រុម​សហគមន៍​បាន​នាំ​គ្នា​ទៅ​រារាំង​មិន​ឲ្យ​ក្រុមហ៊ុន​ឈូស​ឆាយ​បាន។

ប្រធាន​សហគមន៍ លោក ភួង សី មាន​ប្រសាសន៍​ទទួល​ស្គាល់​ថា លោក​ពិត​ជា​បាន​ពន្យល់​អ្នក​ភូមិ​ឲ្យ​យល់​ព្រម​ប្រគល់​ដី​នោះ​មែន តែ​លោក​មិន​បាន​គំរាម ឬ​បង្ខិត​បង្ខំ​អ្នក​ភូមិ​នោះ​ទេ។ លោក​បន្ត​ថា ព្រៃ​ដែល​សហគមន៍​អភិរក្ស​នេះ មិន​ទាន់​មាន​ការ​កំណត់​ផ្ទៃដី​ប៉ុនណា​នៅ​ឡើយ ហេតុ​នេះ​លោក​សុំ​ឲ្យ​អ្នក​ភូមិ​កាត់​ដី​មួយ​ផ្នែក​ប្រគល់​ឲ្យ​ក្រុមហ៊ុន​តាម​សំណូមពរ​ក្រុមហ៊ុន ដើម្បី​បញ្ចប់​បញ្ហា។

លោក ភួង សី៖ «ខ្ញុំ​ថា បើ​យើង​កាត់​ឲ្យ​គេ យើង​ស្រួល​ជាង កុំ​ឲ្យ​មាន​បញ្ហា តែ​បើ​យើង​នៅ​តែ​ជម្លោះ​អ៊ីចឹង ពិបាក​ដោះស្រាយ។ ខាង​ក្រុមហ៊ុន​គេ​មិន​ឲ្យ គេ​មាន​ទាហាន គេ​មិន​ឲ្យ​យើង​ធ្វើ​វា​ខក​អ្នក​ណា?»

អភិបាល​ស្រុក​កែវសីមា លោក ស៊ិន វណ្ណវុឌ្ឍ មាន​ប្រសាសន៍​បញ្ជាក់​ថា លោក​មិន​ទាន់​បាន​ទទួល​សេចក្តី​រាយការណ៍​ណា​មួយ​ស្ដីពី​ករណី​នេះ​ទេ។ លោក​បន្ត​ថា ដី​ព្រៃ​ឈើ​សហគមន៍​អភិរក្ស គឺ​ជា​ទ្រព្យ​សម្បត្តិ​រដ្ឋ ហេតុ​នេះ យន្តការ​ដោះស្រាយ​ទំនាស់​ទាក់​ទិន​ដី​សម្បទាន​សេដ្ឋកិច្ច និង​ដី​សហគមន៍ ជា​សមត្ថកិច្ច​របស់​អាជ្ញាធរ​ពាក់ព័ន្ធ​ថ្នាក់​ខេត្ត និង​ថ្នាក់​ជាតិ។

លោក ស៊ិន វណ្ណវុឌ្ឍ៖ «គឺ​លោក​មេ​ឃុំ គាត់​ចូល​ប្រជុំ​ជាមួយ​ខ្ញុំ ក៏​គាត់​មិន​បាន​រាយការណ៍​ពី​បញ្ហា​នេះ​ដែរ។ ករណី​នេះ ប្រហែល​ជា​បុគ្គល​ទេ​មិន​មែន​សហគមន៍​ទាំង​មូល​ទេ។ សហគមន៍​ឲ្យ​ដី​ទៅ​ក្រុមហ៊ុន សហគមន៍​នោះ​គ្មាន​សិទ្ធិ​ទេ»

អ្នក​សម្របសម្រួល​សមាគម​ការពារ​សិទ្ធិ​មនុស្ស​អាដហុក (ADHOC) ខេត្ត​មណ្ឌលគិរី លោក សុក រដ្ឋា មាន​ប្រសាសន៍​បញ្ជាក់​ថា លោក​បាន​ទទួល​សេចក្តី​រាយការណ៍​ពី​សមាជិក​សហគមន៍​ស្ដីពី​ករណី​នេះ ក៏ប៉ុន្តែ​លោក​មិន​ទាន់​ធ្វើ​ការ​អង្កេត​នៅ​ឡើយ។ លោក​បន្ត​ថា ព្រៃ​ការពារ​សហគមន៍ ទោះ​បី​ចុះ​បញ្ជី​ទទួល​ស្គាល់​តាម​ផ្លូវ​ច្បាប់ ឬ​មិន​ទាន់​ចុះ​បញ្ជី​ក្តី សមាជិក​សហគមន៍​មាន​សិទ្ធិ​ថែ​រក្សា និង​អាស្រ័យ​ផល​តាម​លក្ខណៈ​ប្រពៃណី៖ «ក្នុង​នាម​ជា​ប្រធាន​សហគមន៍ គាត់​ត្រូវ​តែ​ការពារ​ដី​សហគមន៍​ដែល​ជា​ទ្រព្យ​សម្បត្តិ​ជាតិ។ យន្តការ​នៃ​ការ​ដោះស្រាយ អាស្រ័យ​ទៅ​លើ​សមត្ថកិច្ច​ដែល​គាត់​មាន​ជំនាញ​ដោះស្រាយ​ហ្នឹង»

នាយ​ខណ្ឌ​រដ្ឋបាល​ព្រៃ​ឈើ​ខេត្ត​មណ្ឌលគិរី លោក កែប តក់ នៅ​ថ្ងៃ​ពុធ ទី២៧ ខែ​កុម្ភៈ បដិសេធ​មិន​ធ្វើ​អត្ថាធិប្បាយ​សំណួរ​វិទ្យុ​អាស៊ីសេរី ទេ ដោយ​ហេតុផល​ជាប់​ប្រជុំ។

យ៉ាង​នេះ​ក្តី ប្រជាពលរដ្ឋ​សហគមន៍​ភូមិ​ស្រែអំពិល ឲ្យ​ដឹង​ថា ដី​ដែល​ក្រុមហ៊ុន​ប៉ុនប៉ង​ឈូស​ឆាយ មួយ​ផ្នែក​ធំ​ជា​តំបន់​ព្រៃ​ស្រោង​មាន​ដើម​ឈើ​ផលិត​ជ័រ​ទឹក​អ្នក​ភូមិ​រាប់​រយ​ដើម មួយ​ផ្នែក​ជា​ដី​ចម្ការ​ចាស់​ត្រៀម​បម្រុង និង​ដី​មួយ​ផ្នែក​ទៀត ជា​ដី​ស្រែ​ចម្ការ​ប្រជាពលរដ្ឋ​បាន​ដាំ​ដុះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល