សង្គមស៊ីវិលនិងពលរដ្ឋស្នើលោក ហ៊ុន សែន ជួយបើករបងហ៊ុមព័ទ្ធឆ្នេរបន្ថែមទៀត
2017.01.03
អ្នកឃ្លាំមើលការអភិវឌ្ឍសង្គម និងភ្ញៀវទេសចរ ស្នើឲ្យប្រមុខដឹកនាំរាជរដ្ឋាភិបាល ជួយអន្តរាគមន៍បើករបងហ៊ុមព័ទ្ធតំបន់ឆ្នេរសមុទ្រមួយចំនួន ដែលត្រូវបានគេបិទទុកចោល យកមកដាក់ជាសម្បត្តិរដ្ឋ និងអភិវឌ្ឍឆ្នេរទាំងនេះផ្តល់ជូនសាធារណជនចូលទៅកម្សាន្តឲ្យបានទូលំទូលាយជាងពេលបច្ចុប្បន្ន។
សំណូមពរនេះ កើតឡើងនៅគ្រាប្រមុខដឹកនាំ កំពុងបង្ហាញវត្តមាននៅខេត្តព្រះសីហនុ ក្នុងឱកាសអមព្រះរាជដំណើរយាងទតមូលដ្ឋាននេះរបស់ព្រះមហាក្សត្រ និងសម្ដេចម៉ែ កាលពីថ្ងៃទី៣០ ខែធ្នូ។
មន្ត្រីសង្គមស៊ីវិល និងសាធារណជន បានស្នើឲ្យលោកនាយករដ្ឋមន្ត្រី ហ៊ុន សែន ត្រូវចុះពិនិត្យមើលនៅតាមតំបន់ឆ្នេរនានាក្នុងខេត្តព្រះសីហនុ ដើម្បីឲ្យប្រាកដថា ខេត្តទេសចរណ៍មួយនេះមានឆ្នេរសមុទ្រគ្រប់គ្រាន់សម្រាប់បម្រើតម្រូវការរបស់ភ្ញៀវទេសចរជាតិ និងអន្តរជាតិ ឲ្យបានទូលំទូលាយ។
អ្នកសម្របសម្រួលអង្គការលីកាដូ (LICADHO) ប្រចាំខេត្តព្រះសីហនុ លោក ប៊ួន ណារិទ្ធិ សំណូមពរដល់ប្រមុខដឹកនាំ ឲ្យចុះពិនិត្យផ្ទាល់នៅតាមឆ្នេរ នឹងឃើញរបងហ៊ុមព័ទ្ធឆ្នេរដែលត្រូវបានបុគ្គលឯកជន មន្ត្រីមានអំណាច និងឈ្មួញមានទ្រព្យ ហ៊ុមព័ទ្ធរបងថ្ម និងរបងដែកទុកចោលគ្មានការអភិវឌ្ឍទាល់តែសោះ។
អ្នកឃ្លាំមើលសង្គមរូបនេះ ស្នើឲ្យប្រមុខដឹកនាំរដ្ឋាភិបាល ជួយពិចារណាបើករបងដែក ឬថ្មដែលត្រូវគេហ៊ុមព័ទ្ធតំបន់ឆ្នេរសមុទ្រទុកចោល គ្មានការអភិវឌ្ឍ មកអភិវឌ្ឍបម្រើដល់វិស័យទេសចរណ៍ឲ្យបានទូលំទូលាយឡើងវិញនាថ្ងៃអនាគត៖ «ខ្ញុំជាសង្គមស៊ីវិលគ្រាន់តែសំណូមពរសុំឲ្យសម្ដេចចុះពិនិត្យគ្រប់ឆ្នេរទាំងអស់ គឺចាប់ពីឆ្នេរនៅមុខសាលាខេត្ត ឆ្នេរហាវ៉ៃ ឆ្នេរឯករាជ្យ ឆ្នេរសុខា រហូតដល់អូរឈើទាល និងឆ្នេរអូរត្រេះ ស្នើឲ្យសម្ដេចជួយពិនិត្យមើល តើឆ្នេរទាំងអស់ហ្នឹងគួរតែបិទរបងទុកចោលមិនធ្វើការអភិវឌ្ឍ ទុកឲ្យស្មៅដុះទ្រុបទ្រុល និងសាងសង់សំណង់ផ្សេងៗដែលធ្វើឲ្យឆ្នេរសមុទ្រខេត្តព្រះសីហនុ ធ្លាប់តែទូលំទូលាយ ប្រែជាតូចចង្អៀតជាបន្តបន្ទាប់ ហើយជាក់ស្តែងឃើញថា ការអភិវឌ្ឍតែឆ្នេរមួយចំនួនប៉ុណ្ណោះ»។
លោក ប៊ួន ណារិទ្ធិ រិះគន់ថា ផែនការអភិវឌ្ឍន៍តំបន់ឆ្នេររបស់រដ្ឋាភិបាល ហាក់មិនមានការរីកចម្រើនបានច្រើនទេ ព្រោះសង្កេតឃើញថា មានតំបន់ឆ្នេរសមុទ្រភាគច្រើនដែលត្រូវគេហ៊ុមព័ទ្ធរបងទុកចោលគ្មានការអភិវឌ្ឍ និងបិទមិនឲ្យទេសចរដើរឆ្លងកាត់ ឬចូលទៅងូតទឹកកម្សាន្តកន្លងមក គឺមិនមានការផ្លាស់ប្ដូរទេ ហើយរដ្ឋាភិបាលក៏គ្មានប្រតិកម្មអ្វីដែរ។
ត្រង់ចំណុចនេះ លោក ប៊ួន ណារិទ្ធិ សំណូមពរដល់លោកនាយករដ្ឋមន្ត្រី ហ៊ុន សែន ឲ្យអន្តរាគមន៍ធ្វើយ៉ាងណាឲ្យផែនការអភិវឌ្ឍន៍តំបន់ឆ្នេរសមុទ្រ ត្រូវផ្តល់លទ្ធភាពឲ្យបានស្មើភាពរវាងក្រុមអាជីវករមានលទ្ធភាពតិចតួច ក៏អាចឲ្យពួកគេមានលទ្ធភាពចូលរួមអភិវឌ្ឍតំបន់ឆ្នេរសមុទ្រជាមួយរដ្ឋាភិបាល ដូចឈ្មួញ ឬក្រុមហ៊ុនសម្បូរទ្រព្យ ទៅតាមលទ្ធភាពជាក់ស្តែងដូចគ្នាដែរ។
មន្ត្រីសិទ្ធិមនុស្សរូបនេះកត់សម្គាល់ថា កន្លងមក ឈ្មួញមានទ្រព្យ និងមន្ត្រីមានអំណាច គឺពួកគេមានសិទ្ធិក្នុងការសាងសង់សំណង់រឹងមាំធំស្កឹមស្កៃតាមការចង់បានរបស់ពួកគេ នៅតាមតំបន់ឆ្នេរ ឬដីចំណីឆ្នេរសមុទ្របានដោយរលូនថែមទៀត។ ប៉ុន្តែសម្រាប់ប្រជាពលរដ្ឋ ឬក្រុមអាជីវករតូចតាចវិញ ត្រូវរដ្ឋបាលខេត្ត និងគណៈកម្មការជាតិអភិវឌ្ឍន៍តំបន់ឆ្នេរសមុទ្រ តែងគាបសង្កត់ពួកគេជាបន្តបន្ទាប់ និងតម្រូវឲ្យអនុវត្តទៅតាមការចង្អុលបង្ហាញរបស់អាជ្ញាធរ ជាដើម៖ «ប្រជាជនក៏សំណូមពរដែរថា បើសិនជាសម្ដេចនាយករដ្ឋមន្ត្រី លោកអភិវឌ្ឍឆ្នេរទាំងអស់ហ្នឹងបើកឲ្យទូលំទូលាយ ដូចពីដើមមកវិញ គឺពួកគេអាចចូលរួមប្រកបមុខរបរលក់ដូរ និងសម្អាតឆ្នេរទាំងអស់ហ្នឹងឲ្យមានសោភណភាព និងទាក់ទាញភ្ញៀវទេសចរជាតិ អន្តរជាតិ ឲ្យមកកម្សាន្តកាន់តែច្រើននាថ្ងៃខាងមុខទៀត»។
ចំណែកអ្នកស្រី ជៀប សុធារី អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ បង្ហាញទស្សនៈថា សកម្មភាព ឬផែនការអភិវឌ្ឍន៍តំបន់ឆ្នេរសមុទ្ររបស់រដ្ឋាភិបាល ហាក់មិនទាន់មានតម្លាភាពរវាងឈ្មួញ ឬក្រុមហ៊ុនមានទ្រព្យ និងអាជីវករតូចតាចនោះទេ។ អ្នកស្រីបន្តថា ឈ្មួញ ឬក្រុមហ៊ុនធំៗ ពួកគេមានឱកាសអាចសាងសង់សំណង់អគារធំស្កឹមស្កៃរាប់សិបជាន់នៅតាមតំបន់ឆ្នេរសមុទ្រ ឬនៅជាប់ដីចំណីឆ្នេរសមុទ្រដោយរលូន ប៉ុន្តែសម្រាប់ប្រជាពលរដ្ឋ ឬក្រុមអាជីវករខ្វះលទ្ធភាព គឺគ្មានឱកាសដូចនេះទេ៖ «សម្ដេចនាយករដ្ឋមន្ត្រី លោកបានអញ្ជើញមកមូលដ្ឋានខេត្តព្រះសីហនុ ជាញឹកញាប់។ ដូច្នេះលោកបានឃើញស្រាប់ហើយថា អ្វីដែលជាការនិយាយ ឬលើកឡើងហ្នឹង គឺលោកមិនបានឃើញទៅចុះនាពេលកន្លងមក ប៉ុន្តែពេលនេះ លោកមកញឹកញាប់ លោកក៏បានឃើញហើយនូវការបិទរបងថ្មី ឬដែកហ៊ុមព័ទ្ធឆ្នេរមួយចំនួន។ ប៉ុន្តែបើក្រុមហ៊ុនទាំងនោះនឹងធ្វើការអភិវឌ្ឍ ត្រូវជំរុញឲ្យមានសកម្មភាពអភិវឌ្ឍឲ្យបានឆាប់រហ័សនៅក្នុងឆ្នាំ២០១៧ នេះ»។
អ្នកស្រី សុធារី បន្តថា បច្ចុប្បន្ន សំណង់រឹងមាំមួយចំនួនត្រូវក្រុមហ៊ុនសាងសង់នៅតាមតំបន់ឆ្នេរសមុទ្របានដោយរលូន មានដូចជាសំណង់កំពុងសាងសង់នៅតាមឆ្នេរឯករាជ្យ ឆ្នេរសុខា និងឆ្នេរពយកំពេញ ជាដើម។ ជាងនេះទៀត ឆ្នេរមួយចំនួននៅបន្តបិទរបងថ្ម និងដែក គ្មានការអភិវឌ្ឍនៅបន្តហ៊ុមព័ទ្ធរបងមិនឲ្យទេសចរដើរឆ្លងកាត់ដដែល។ បញ្ហានេះ អ្នកស្រី សុធារី បានស្នើឲ្យរដ្ឋាភិបាលពិចារណាឈានដល់ដកហូតឆ្នេរពីឯកជន ដែលគ្មានសកម្មភាពអភិវឌ្ឍ មកធ្វើការអភិវឌ្ឍដោយខ្លួនឯងសម្រាប់បម្រើដល់វិស័យទេសចរណ៍ឲ្យខេត្តព្រះសីហនុ មានទីធ្លាធំទូលាយ។
អ្នកឃ្លាំមើលសង្គមរូបនេះ ស្នើដល់ប្រមុខដឹកនាំរដ្ឋាភិបាលដែលកំពុងមានវត្តមាននៅខេត្តព្រះសីហនុ នាឱកាសពិធីបុណ្យឆ្លងឆ្នាំសកលឆ្នាំថ្មី២០១៧ សូមជួយអន្តរាគមន៍បើករបងហ៊ុមព័ទ្ធឆ្នេរដែលក្រុមហ៊ុន និងឈ្មួញហ៊ុមព័ទ្ធរបងទុកចោល គ្មានការអភិវឌ្ឍ យកមកដាក់ជាសម្បត្តិរដ្ឋគ្រប់គ្រង និងអភិវឌ្ឍបម្រើដល់វិស័យទេសចរណ៍ឲ្យបានទូលំទូលាយជាងពេលបច្ចុប្បន្ន៖ «ហើយបើក្រុមទាំងនោះមិនបានធ្វើសកម្មភាពអភិវឌ្ឍនៅលើដី ដែលហ៊ុមព័ទ្ធរបងបិទឆ្នេរសមុទ្រទាំងនោះទេ គួរតែដកហូតអាជ្ញាប័ណ្ណ ហើយប្រគល់ទីតាំងនោះមកឲ្យអាជ្ញាធរខេត្ត ក៏ដូចជាប្រជាពលរដ្ឋនៅក្នុងខេត្តព្រះសីហនុ ដើម្បីរៀបចំតំបន់នេះឲ្យក្លាយទៅជារមណីយដ្ឋាន ឬឲ្យក្លាយទៅជាសួនច្បារជាដើម ដើម្បីឲ្យតំបន់ឆ្នេរនេះមានទីកន្លែងច្រើនសម្រាប់ការចូលមកកម្សាន្តលេងរបស់ភ្ញៀវទេសចរ»។
ទាក់ទិនបញ្ហានេះ លោកនាយករដ្ឋមន្ត្រី ហ៊ុន សែន នៅក្នុងឱកាសចូលរួមបើកពិធីបុណ្យសមុទ្រលើកទី៥ ជុំទី២ កាលពីថ្ងៃទី២៤ ខែធ្នូ នាខេត្តព្រះសីហនុ លោកបានរំឭកដល់រដ្ឋបាលខេត្តនេះ និងផ្នែកពាក់ព័ន្ធ ឲ្យស្វែងរកទីតាំងសម្រាប់ផ្តល់ជូនភ្ញៀវទេសចរ ឬប្រជាពលរដ្ឋចូលមកកម្សាន្តនាខេត្តព្រះសីហនុ ឲ្យបានទូលំទូលាយសម្រាប់ការសម្រាកលំហែកាយ ឬងូតទឹកកម្សាន្ត ជាដើម។
បន្ថែមលើនេះ ប្រមុខដឹកនាំនាឱកាសអមដង្ហែព្រះមហាក្សត្រ និងសម្ដេចម៉ែសម្ដេចយាយ សម្ដេចយាយទួត យាងទតខេត្តព្រះសីហនុ តាមព្រះទីន័ងរថភ្លើង។ លោកនាយករដ្ឋមន្ត្រី ហ៊ុន សែន ក្រោយពីបានឆ្លៀតពេលចុះជួបសួរសុខទុក្ខលោកគ្រូអ្នកគ្រូ និងសិស្សានុសិស្ស និងបានជួយដោះស្រាយសំណូមពរផ្តល់ជូនអគារសិក្សា និងសម្ភារសម្រាប់ប្រើប្រាស់ក្នុងការិយាល័យ និងសម្ភារសិក្សាជាច្រើនមុខមានកុំព្យូទ័រជាដើម ជូនលោកគ្រូអ្នកគ្រូ និងសិស្សានុសិស្សបំពេញតាមតម្រូវការភ្លាមៗនៅតាមសាលាចំនួន ៦ទីតាំងផ្សេងគ្នា កាលពីថ្ងៃសៅរ៍ ទី៣១ ខែធ្នូ។ លោកក៏ឆ្លៀតពេលចេញទៅលំហែនៅតាមតំបន់ឆ្នេរមួយចំនួនជាមួយភរិយា ហើយបានថតរូបបង្ហោះនៅលើបណ្ដាញសង្គមហ្វេសប៊ុកផ្ទាល់ខ្លួនរបស់លោកថែមទៀត។ នាឱកាសនោះ ប្រមុខដឹកនាំបានសរសេរសារបញ្ជាក់ខ្លីថា «សល់ពេលបន្តិចមិនភ្លេចឆ្នេរសមុទ្រដែលជាតារារះនៅទិសនិរតី»។
ត្រង់ចំណុចនេះ សាធារណជន និងអ្នកឃ្លាំមើលសង្គម បានទទូចដល់ប្រមុខដឹកនាំឲ្យជួយបើកតំបន់ឆ្នេរដែលត្រូវគេហ៊ុមព័ទ្ធរបងទុកចោល គ្មានការអភិវឌ្ឍជាយូរឆ្នាំមក ដើម្បីធ្វើការអភិវឌ្ឍបម្រើដល់វិស័យទេសចរណ៍ ឬផ្តល់ជូនភ្ញៀវទេសចរជាតិ និងអន្តរជាតិ ចូលទៅកម្សាន្តឲ្យបានទូលំទូលាយនាថ្ងៃអនាគត៕