មន្ត្រីអង្គការក្រៅរដ្ឋាភិបាលធ្វើការលើវិស័យសិទ្ធិមនុស្សប្រចាំខេត្តពោធិ៍សាត់ គាំទ្រគម្រោងអភិវឌ្ឍន៍មាត់ស្ទឹងពោធិ៍សាត់ ប៉ុន្តែទាមទារឲ្យអាជ្ញាធរខេត្តនេះអនុវត្តឲ្យមានតម្លាភាព ក្នុងការបណ្ដេញពលរដ្ឋចេញពីលំនៅឋាន។ ការលើកឡើងនេះ បន្ទាប់ពីមានប្រជាពលរដ្ឋប្រមាណជា ៥០គ្រួសារ នាំគ្នាទៅតវ៉ានៅខាងមុខសាលាខេត្តពោធិ៍សាត់ ជំទាស់ទៅនឹងសេចក្ដីជូនដំណឹងរបស់សាលាខេត្តដែលតម្រូវឲ្យពួកគាត់រុះរើផ្ទះចេញដោយគ្មានសំណង កាលពីព្រឹកថ្ងៃទី៣១ ខែមីនា។
ក្រុមប្រជាពលរដ្ឋឲ្យដឹងនៅថ្ងៃទី១ ខែមេសា ថា ពួកគាត់នឹងមិនរុះរើផ្ទះសម្បែងរបស់ខ្លួនចេញឡើយ ប្រសិនបើគ្មានសំណងសមរម្យ និងមានការអនុវត្តមិនស្មើភាពគ្នារវាងសណ្ឋាគារ និងផ្ទះថ្មធំៗរបស់អ្នកមានលុយ ឬមានអំណាចសង់នៅជាប់មាត់ស្ទឹងដែរនោះ មិនត្រូវបានអាជ្ញាធរបង្គាប់ឲ្យរុះរើចេញ។
ប្រជាពលរដ្ឋម្នាក់រស់នៅភូមិក្បាលហុង ក្បែរមាត់ស្ទឹងពោធិ៍សាត់ អ្នកស្រី សេង ហួច មានប្រសាសន៍ថា ប្រជាពលរដ្ឋជាច្រើនគ្រួសារនៅក្នុងមូលដ្ឋានអ្នកស្រីរស់នៅ កំពុងតែបារម្ភខ្លាចបាត់បង់ផ្ទះសម្បែង និងទុក្ខលំបាកមួយចំនួនទៀត ប្រសិនបើអាជ្ញាធរបណ្ដេញពួកគាត់ដោយបង្ខំក្នុងពេលឆាប់ៗនេះ។ អ្នកស្រីបន្តថា អ្នកភូមិបានទទួលព័ត៌មានក្រៅផ្លូវការពីអាជ្ញាធរភូមិថា ពួកគាត់អាចនឹងទទួលប្រាក់ចំនួន ៣០០ដុល្លារក្នុង១គ្រួសារ ជាថ្នូរនឹងការចាកចេញ ប៉ុន្តែសំណងនេះអ្នកស្រីគិតថា នឹងមិនអាចទៅរកទិញដីកន្លែងផ្សេងរស់នៅបានឡើយ៖ «ពួកខ្ញុំនេះវានៅតាំងពីឆ្នាំ១៩៨៩-១៩៩០ ម្ល៉េះ ហើយដល់គេឲ្យមករុះរើហ្នឹង គេគ្រាន់តែប្រាប់ភ្លាមឲ្យរើភ្លាមប្អូនឯងមើល។ មុខស្ទឹងពោធិ៍សាត់ អីហ្នឹងគេអត់រើទេ គេមកជូនដំណឹងតែក្បាលហុង នេះទេ ហើយដល់អ៊ីចឹងទៅ ពីក្បាលហុង ទៅពោធិ៍កំបោរ វាច្រើនគ្រួសារ ៣០ ទៅ ៤០គ្រួសារឯណោះមិនតិចអី»។
ក្រុមប្រជាពលរដ្ឋឲ្យដឹងថា នៅថ្ងៃទី២៤ ខែមេសា ឆ្នាំ២០១៤ ផ្ទះរបស់ប្រជាពលរដ្ឋចំនួន ២ខ្នងនៅចំណុចភូមិដូងជ្រុំ នៃឃុំព្រៃញី នឹងត្រូវបង្ខំឲ្យរុះរើ។ ចំណែកផ្ទះជាង ៣០ខ្នងផ្សេងទៀតនៅចំណុចភូមិក្បាលហុង នៃឃុំវាល ក៏នឹងត្រូវបង្ខំឲ្យរុះរើដែរនៅថ្ងៃទី១៥ ខែឧសភា ឆ្នាំ២០១៤។ ពួកគាត់បញ្ជាក់ថា សណ្ឋាគារ និងផ្ទះមួយចំនួនទៀត បានសង់នៅជាប់មាត់ស្ទឹងពីចំណុចស្ពានថ្មផ្លូវជាតិលេខ៥ ទៅក្រោមជាច្រើនខ្នង មិនទាន់ឃើញអាជ្ញាធរមានវិធានការអ្វីនៅឡើយ។
ទាក់ទងបញ្ហានេះ មន្ត្រីនៃសមាគមអាដហុក (Adhoc) លោក ភួង សុធា និងមន្ត្រីនៃអង្គការសិទ្ធិមនុស្សលីកាដូ (Licadho) ប្រចាំខេត្តពោធិ៍សាត់ លោក អេង ឈុនហាន សុទ្ធតែបានសម្ដែងការគាំទ្រចំពោះវិធានការរបស់អាជ្ញាធរ ប៉ុន្តែបានអំពាវនាវឲ្យមានការដោះស្រាយបញ្ហាចំពោះមុខនេះឲ្យបានត្រឹមត្រូវ និងមានតម្លាភាព៖ «យើងគាំទ្រតើ! ឲ្យតែការអនុវត្តច្បាប់ឲ្យវាស្មើមុខគ្នាចំពោះមុខច្បាប់ កុំឲ្យអនុវត្តបានតែប្រជាពលរដ្ឋតូចតាច ឬអ្នកទន់ខ្សោយ ជាពិសេសយើងចង់សុំឲ្យប្រទេសខ្មែរហ្នឹងកុំឲ្យវាចូលក្នុង គេហៅថាប្រទេសមួយមានស្តង់ដារច្បាប់ពីរ។ យើងឃើញមានសណ្ឋាគារធំមួយ និងផ្ទះវីឡាមួយយ៉ាងធំដែលទើបតែសាងសង់ ប្រសិនត្រូវបណ្ដេញប្រជាពលរដ្ឋ អ៊ីចឹងសណ្ឋាគារ ហើយនិងលំនៅឋានដ៏ស្កឹមស្កៃហ្នឹង ក៏ត្រូវតែបណ្ដេញដើម្បីឲ្យមានភាពស្មើគ្នាចំពោះមុខច្បាប់»។
វិទ្យុអាស៊ីសេរី មិនអាចទាក់ទងអភិបាលនៃគណៈអភិបាលខេត្តពោធិ៍សាត់ លោក ខួយ សុខា ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី១ ខែមេសា។ ចំណែកប្រធានក្រុមប្រឹក្សាខេត្ត លោក ឆាយ សារ៉េត មានប្រសាសន៍យ៉ាងខ្លីថា លោកទើបតែចេញពីពេទ្យព្យាបាលជំងឺ ដូច្នេះរឿងរ៉ាវទាក់ទងនឹងករណីនេះ លោកមិនអាចធ្វើអត្ថាធិប្បាយអ្វីបានឡើយ។
នៅក្នុងសេចក្ដីជូនដំណឹងរបស់សាលាខេត្តពោធិ៍សាត់ ចុះហត្ថលេខាដោយអភិបាលខេត្ត លោក ខួយ សុខា នៅថ្ងៃទី២៥ ខែមីនា បញ្ជាក់ថា ប្រជាពលរដ្ឋដែលកំពុងរស់នៅ និងធ្វើអាជីវកម្មលើដីចំណីស្ទឹងត្រើយខាងលិច ចាប់ពីទំនប់ក្បាលហុង ក្នុងភូមិក្បាលហុង រហូតដល់ផ្លូវក្រវាត់ក្រុងនៃភូមិពោធិ៍កំបោរ ឃុំវាល ស្រុកកណ្ដៀង ខេត្តពោធិ៍សាត់ ត្រូវរុះរើផ្ទះសម្បែង និងផលដំណាំផ្សេងៗចេញឲ្យអស់នៅមុនថ្ងៃទី១៥ ខែឧសភា ឆ្នាំ២០១៤។ រដ្ឋបាលសាលាខេត្តមានផែនការសាងសង់ជើងទេរច្រាំងស្ទឹង រៀបចំសួនច្បារ និងដាំបង្គោលភ្លើងបំភ្លឺនៅទីសាធារណៈក្នុងពេលឆាប់ៗខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។