អ្នកភូមិជនជាតិដើមភាគតិចព្នង នៅភូមិពូលុ ឃុំប៊ូស្រា ស្រុកពេជ្រាដា ខេត្តមណ្ឌលគិរី ព្រមានថានឹងនាំគ្នាធ្វើបាតុកម្មប្រឆាំងក្រុមហ៊ុនវិនិយោគលើដីសម្បទានសេដ្ឋកិច្ចមួយកន្លែង ដែលកំពុងបង្កផលប៉ះពាល់ច្រើនផ្នែកដល់ពលរដ្ឋ។
អ្នកភូមិអះអាងថា មន្ត្រីអាជ្ញាធរព្រងើយកន្តើយមិនចូលរួមដោះស្រាយជម្លោះតាមពាក្យប្ដឹងរបស់អ្នកភូមិឡើយ។ ហេតុនេះ ពួកគាត់គ្រោងនឹងរៀបចំបាតុកម្មតវ៉ាជំរុញឲ្យមានការដោះស្រាយរឿងនេះបន្ថែមទៀត។
អ្នកភូមិពូលុ អះអាងថា ក្រុមហ៊ុនឈ្មោះ ខេហ្វើស (K-First) កំពុងបំពានឈូសឆាយព្រៃតំបន់សក្ការៈ ដីចម្ការវិលជុំ និងដីចម្ការគ្រួសារសហគមន៍កាន់តែធ្ងន់ធ្ងរឡើង។ ក្រៅពីនោះ ក្រុមហ៊ុននេះបានធ្វើរបាំងបិទផ្លូវដាក់បម្រាមហាមចូលទៅកាន់តំបន់ភ្នំយុប្រាណ ដែលជាតំបន់ទេសចរណ៍ប្រវត្តិសាស្ត្ររបស់អ្នកភូមិទៀតផង។
តំណាងសហគមន៍ លោក ឃុត ចាន់រ៉ា នៅថ្ងៃទី១៩ ខែមីនា អះអាងថា អ្នកភូមិកំពុងរៀបចំផែនការធ្វើបាតុកម្មប្រឆាំងការរំលោភបំពាននេះ ប្រសិនមន្ត្រីអាជ្ញាធរនៅតែមិនដោះស្រាយបញ្ហាជូនអ្នកភូមិ។ លោកកត់សម្គាល់ថា អ្នកភូមិបានផ្ដិតមេដៃដាក់ពាក្យប្ដឹងជូនអាជ្ញាធរមូលដ្ឋាន និងថ្នាក់ជាតិប្រមាណ ២ខែកន្លងទៅ ប៉ុន្តែមិនឃើញមានដំណោះស្រាយ។ ដោយឡែកក្រុមហ៊ុន បានបន្តឈូសឆាយពង្រីកយកដី បិទផ្លូវធ្វើដំណើរ និងប្រើគ្រឿងផ្ទុះបំបែកថ្មបំពានទៅលើសិទ្ធិរស់នៅរបស់ពលរដ្ឋ៖ «យើងបានប្រាប់យូរហើយថា កុំឲ្យធ្វើការឈូសឆាយបន្ត ប៉ុន្តែជាក់ស្តែងក្រុមហ៊ុននៅតែឈូសឆាយព្រៃត្រណម ដីចម្ការវិលជុំ ដីចម្ការប្រជាពលរដ្ឋដដែល»។
ក្រុមហ៊ុន ខេហ្វើស ដែលអ្នកភូមិនិយមហៅឈ្មោះថា ក្រុមហ៊ុន ៥០០ហិកតារ ទទួលបានដីសម្បទាន ៥០០ហិកតារនៅឃុំប៊ូស្រា។ កាលពីខែតុលា ឆ្នាំ២០១៤ អ្នកភូមិពូលុ បានដាក់ពាក្យប្ដឹងទៅអាជ្ញាធរខេត្ត និងអាជ្ញាធរថ្នាក់ជាតិ ឲ្យបញ្ឈប់សកម្មភាពឈូសឆាយព្រៃ ឬលុបចោលអាជ្ញាប័ណ្ណក្រុមហ៊ុននេះ ដោយសារតែក្រុមហ៊ុនបានបង្កផលប៉ះពាល់ប្រជាពលរដ្ឋ។
វិទ្យុអាស៊ីសេរី នៅថ្ងៃទី១៩ ខែមីនា មិនអាចទាក់ទងតំណាងក្រុមហ៊ុនសុំបញ្ជាក់ពីការចោទប្រកាន់នេះបានទេ។
ចំណែកអភិបាលស្រុកពេជ្រាដា លោក នួន សារ៉ន អះអាងថា អាជ្ញាធរស្រុកបានចាត់ក្រុមការងារចុះសម្របសម្រួលបញ្ហាជូនពលរដ្ឋហើយ៖ «កំពុងតែចាត់ចែងហើយ បាទ! កំពុងតែចាត់ក្រុមការងារចុះសម្របសម្រួល»។
ទាក់ទិនករណីនេះដែរ មន្ត្រីសម្របសម្រួលសមាគមការពារសិទ្ធិមនុស្សអាដហុក (adhoc) លោក សុក រដ្ឋា ថ្លែងថា អ្នកភូមិបានផ្តល់ដំណឹងបឋមស្ដីពីគម្រោងធ្វើបាតុកម្មមកសមាគមលោករួចហើយ កាលពីថ្ងៃទី១៨ ខែមីនា។ លោកថា អ្នកភូមិមានសិទ្ធិធ្វើបាតុកម្ម ប៉ុន្តែអ្នកភូមិគួររៀបចំលិខិតជូនដំណឹងដល់អាជ្ញាធរ ដើម្បីការពារសុវត្ថិភាពទាក់ទិនការតវ៉ារបស់ពលរដ្ឋ៖ «អាជ្ញាធរខេត្តក៏ដូចជាអាជ្ញាធរស្រុក រួមទាំងថ្នាក់ជាតិ មិនទាន់មានដំណោះស្រាយណាមួយសមរម្យតាមការទាមទាររបស់ពលរដ្ឋ។ រាល់ការប្រជុំរាល់ការកោះហៅប្រជាជនមកដោះស្រាយនៅថ្នាក់ឃុំមានដែរ ក៏ប៉ុន្តែដំណោះស្រាយនោះមិនទាន់មានការឯកភាពពីសហគមន៍ផង បណ្ដែតបណ្តោយអនុគ្រោះឲ្យភាគីអ្នកមានអំណាច ក៏ដូចជាក្រុមហ៊ុន ធ្វើអ្វីបានតាមអំពើចិត្ត»។
កាលពីពាក់កណ្ដាលខែកញ្ញា ឆ្នាំ២០១៤ សហគមន៍ជនជាតិដើមភាគតិចព្នង នៅឃុំប៊ូស្រា ចេញសេចក្តីថ្លែងការណ៍រួមគ្នា ជំរុញឲ្យរាជរដ្ឋាភិបាលអន្តរាគមន៍ដោះស្រាយជម្លោះដីធ្លី ការបាត់បង់ធនធានធម្មជាតិ ពង្រឹងការអនុវត្តច្បាប់ និងការគោរពសិទ្ធិជនជាតិដើមភាគតិចនៅភូមិចំនួន៧ រួមមាន ភូមិពូលុ ពូចារ ពូទឺត ឡាំមេះ ប៊ូស្រា ពូរាំង និងភូមិពូទឹល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។