ប្រជាពលរដ្ឋមានបញ្ហាទំនាស់ដីធ្លីប្រមាណជា១៥០នាក់ នាំគ្នាដាក់ញត្តិចូលសាលាស្រុកភ្នំក្រវាញ និងសាលាខេត្តពោធិ៍សាត់ នៅព្រឹកថ្ងៃទី២០ ខែតុលា។ ប្រជាពលរដ្ឋមានពីរក្រុមផ្សេងគ្នា គឺមួយក្រុមមានគ្នាប្រហែល១០០នាក់ បានតវ៉ាដាក់ញត្តិនៅខាងមុខសាលាស្រុកទាក់ទងនឹងរឿងដីធ្លីជាមួយមណ្ឌលកែប្រែម៤ ស្ថិតនៅឃុំផ្ទះរុង ស្រុកភ្នំក្រវាញ និងមួយក្រុមទៀតមានគ្នាប្រហែល៥០នាក់ បានតវ៉ាដាក់ញត្តិនៅខាងមុខសាលាខេត្តពោធិ៍សាត់ ទាក់ទងនឹងរឿងដីធ្លីជាមួយក្រុមហ៊ុនឯកជន និងដីសហគមន៍នៅស្រុកក្រគរ។
ក្រុមពលរដ្ឋបានតវ៉ាដាក់ញត្តិជូនអាជ្ញាធរព្រមៗគ្នា ក្នុងគោលបំណងពន្លឿនការដោះស្រាយវិវាទដីធ្លីរបស់ពួកគាត់ជាមួយក្រុមហ៊ុនឯកជនដែលទទួលបានដីសម្បទានសេដ្ឋកិច្ចពីរដ្ឋ និងរឿងខ្លះទៀតទាក់ទងនឹងដីសហគមន៍។ បញ្ហាទាំងនេះនៅកន្លែងខ្លះបានអូសបន្លាយអស់រយៈពេល១០ឆ្នាំមកហើយ ប៉ុន្តែគ្មានដំណោះស្រាយអ្វីទាំងអស់ក្រៅពីការសន្យារបស់អាជ្ញាធរ។
អភិបាលរងខេត្តពោធិ៍សាត់ និងជាអ្នកទទួលបន្ទុកដោះស្រាយវិវាទដីធ្លីលោក ខូយ រីដា បានចេញមកទទួលញត្តិ និងអះអាងនៅចំពោះមុខក្រុមអ្នកតវ៉ាថា លោកនឹងទទួលយកនូវទុក្ខកង្វល់ និងពាក្យបណ្ដឹងនានាពីគ្រប់ស្រុកទាំងអស់ ដើម្បីធ្វើការដោះស្រាយ ប៉ុន្តែស្រុកខ្លះលោកចង់ឲ្យអាជ្ញាធរស្រុកចុះសិក្សា និងដោះស្រាយជូនពលរដ្ឋជាជំហានដំបូងសិន។
លោកថាកន្លងទៅអាជ្ញាធរខេត្តគ្រាន់តែទទួលឯកសារ និងការពន្យល់របស់អាជ្ញាធរថ្នាក់មូលដ្ឋាន ប៉ុន្តែលើកនេះរូបលោក និងអភិបាលខេត្តផ្ទាល់នឹងចុះពិនិត្យមើល រួចដោះស្រាយជូនប្រជាពលរដ្ឋក្នុងមួយឃុំម្ដងៗចាប់ពីថ្ងៃទី២៣ ខែតុលា ឆ្នាំ២០១៤ និងនៅក្រោយថ្ងៃបុណ្យអុំទូក អកអំបុក និងសំពះព្រះខែជាបន្តបន្ទាប់ទៀត៖ «ឥឡូវមកដល់ពេលនេះគាត់ជជែកគ្នាយល់ព្រមហើយថ្ងៃទី២៣ គាត់ចាំទទួលហើយមានលេខទូរស័ព្ទ មានឯកសារ មានផែនទីអស់ហើយដែលយើងត្រូវចុះចំណុចគោលដៅហ្នឹង។ ក្នុងនាមអាជ្ញាធរឲ្យបងប្អូនប្រជាពលរដ្ឋរបស់យើងទាំងអស់គ្នាឲ្យយល់ពីគោលការណ៍ជៀសវាងផលប៉ះពាល់ពិសេសគឺបងប្អូនប្រជាពលរដ្ឋ និងប្រជាពលរដ្ឋ ទី១ ទី២ជៀសវាងផលប៉ះពាល់អាជ្ញាធរជាមួយប្រជាពលរដ្ឋ ទី៣គឺប៉ះពាល់ជាមួយការអភិវឌ្ឍន៍របស់ក្រុមហ៊ុន គឺយើងធ្វើម៉េចឲ្យមានគោលការណ៍ច្បាប់ទាំងអស់គ្នា»។
បើទោះជាមានការសន្យា និងអះអាងរបស់អាជ្ញាធរបែបនេះ មានពលរដ្ឋខ្លះរង់ចាំមើលការអនុវត្ត និងខ្លះទៀតគ្មានជំនឿតែម្ដង ដោយសារតែការសន្យារបស់អាជ្ញាធរមានច្រើនស្ទើររាប់ភ្លេចទៅហើយ ប៉ុន្តែគ្មានការអនុវត្តម្ដងណាឡើយ។
តំណាងពលរដ្ឋម្នាក់មកពីឃុំអន្លង់រាប ស្រុកវាលវែងលោក ជុំ សារ៉ាត មានប្រសាសន៍ថា លោកគ្មានជំនឿលើការសន្យារបស់អាជ្ញាធរនាពេលនេះឡើយ ដោយលោកលើកឧទាហរណ៍ករណីវិវាទដីធ្លីក្រុមហ៊ុន អឹម.ឌី.អេស (MDS) របស់លោកឧកញ៉ា ទ្រី ភាព នៅស្រុកវាលវែង ដែលបានឈូសឆាយប៉ះពាល់ដល់ដីអាស្រ័យផល និងដីធ្លាប់កាន់កាប់របស់អ្នកភូមិជាង១០០គ្រួសារ នៅឃុំថ្មដា និងឃុំអន្លង់រាបជាច្រើនឆ្នាំមកហើយ ប៉ុន្តែគ្មានដំណោះស្រាយអ្វីទាំងអស់ បើទោះបីជាមានការស្បថសច្ចានៅចំពោះមុខព្រះពុទ្ធបដិមារបស់អតីតអភិបាលស្រុកថានឹងជួយដោះស្រាយបញ្ចប់រឿងដីធ្លីនេះជូនពលរដ្ឋឲ្យបានឆាប់យ៉ាងណាក៏ដោយ៖ «អាការស្បថក៏ដោយទាំងវេទិកាសាធារណៈថ្នាក់ខេត្តទៅសន្យាទៀតក៏អត់មានដែរ ( អត់ដំណោះស្រាយ ) បើអីចឹងខ្ញុំដូចជាអត់មានសង្ឃឹមជឿជាក់ទាល់តែអភិបាលខេត្តមានលក្ខខណ្ឌអីមួយដែលគួរឲ្យខ្ញុំកត់សម្គាល់ថាខ្ញុំជឿបាន បើអីចឹងគាត់អត់មានលក្ខខណ្ឌអីឲ្យខ្ញុំផង។ គាត់គ្រាន់តែសន្យាថានឹងទៅដោះស្រាយតែសន្យាដោះស្រាយហ្នឹងគាត់បានផ្ទេរទៅឲ្យអភិបាលស្រុកចុះទៅមើល ហើយនឹងធ្វើការដោះស្រាយ»។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តពោធិ៍សាត់លោក ភួង សុធា ថ្លែងថា ការដោះស្រាយវិវាទដីធ្លីនឹងមិនងាយធ្វើទៅរួចឡើយ ប្រសិនបើអាជ្ញាធរមិនព្រមបង្កើតគណៈកម្មការដោះស្រាយ ឬមានយន្តការច្បាស់លាស់ទេនោះ។ លោកថាការឆ្លើយតបរបស់អាជ្ញាធរទៅកាន់ប្រជាពលរដ្ឋនាពេលនេះ គឺហាក់មិនទាន់មានឆន្ទៈពិតប្រាកដក្នុងការដោះស្រាយបញ្ចប់រឿងដីធ្លីដែលបានអូសបន្លាយជាច្រើនឆ្នាំនៅក្នុងខេត្តពោធិ៍សាត់ ជូនប្រជាពលរដ្ឋនៅឡើយទេ៖ «ប្រសិនបើមានការបង្កើតគណៈកម្មការមួយដោយពេញលេញ យើងជឿជាក់ថាយន្តការនៃការដោះស្រាយគឺអាចនឹងមានការកើតឡើង ប៉ុន្តែបើសិនជាគ្មានយន្តការ ឬមួយបង្កើតគណៈកម្មការឲ្យបានច្បាស់លាស់ទេ បញ្ហាដីធ្លីគឺមិនអាចបញ្ចប់បានទេនៅពេលនេះ»។
ក្រុមពលរដ្ឋដែលប្រមូលផ្ដុំគ្នានៅមុខសាលាខេត្តពោធិ៍សាត់ បានរំសាយការតវ៉ា និងដាក់ញត្តិរបស់ខ្លួននៅម៉ោងជិត១១ ព្រឹកថ្ងៃទី២០ ខែតុលា ដោយមិនដង្ហែញត្តិបន្តទៅកាន់រដ្ឋសភាជាតិ និងផ្ទះរបស់នាយករដ្ឋមន្ត្រី ហ៊ុន សែន នៅរាជធានីភ្នំពេញតាមការគ្រោងទុករបស់ខ្លួននោះទេ ដោយសារតែចំនួនអ្នកចូលរួមតិចពេក ម្យ៉ាងរង់ចាំមើលការអនុវត្តនូវអ្វីដែលអាជ្ញាធរបានសន្យាជាមួយប្រជាពលរដ្ឋ។ ចំណែកក្រុមពលរដ្ឋដែលជួបជុំគ្នានៅសាលាស្រុកភ្នំក្រវាញវិញ ក៏បានរំសាយនៅម៉ោងប្រហែល១២ព្រឹក បន្ទាប់ពីបំពេញ និងកែតម្រូវលើឯកសារ និងញត្តិទាមទាររបស់ខ្លួន ដែលអាជ្ញាធរស្រុកតម្រូវឲ្យធ្វើ មុននឹងឈានដល់ការដោះស្រាយរឿងដីធ្លីពាក់ព័ន្ធជាមួយដីរបស់មណ្ឌលកែប្រែម៤ ស្ថិតនៅភូមិព្រហស្ថក្បាល ឃុំផ្ទះរុង ស្រុកភ្នំក្រវាញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។