មន្ត្រីឃ្លាំមើលសិទ្ធិមនុស្ស នៅថ្ងៃអង្គារ ទី៩ ខែកក្កដា អំពាវនាវឲ្យអាជ្ញាធរខេត្តរតនគិរី ស៊ើបអង្កេតទៅលើសកម្មភាពក្រុមហ៊ុនសម្បទានរំលោភសិទ្ធិរស់នៅជនជាតិដើមភាគតិច ផ្ទុយពីគោលការណ៍ស្ដីពីដីសម្បទានសេដ្ឋកិច្ច។
សេចក្តីអំពាវនាវនេះធ្វើឡើងបន្ទាប់ពីជនជាតិដើមគ្រឹង ៥គ្រួសារ នៅភូមិកាំ ឃុំល្អក់ ស្រុកអូរជុំ កាលពីចុងសប្ដាហ៍មុននេះ បាននាំគ្នាមកកាន់ការិយាល័យសមាគមអាដហុក (Adhoc) ដើម្បីសុំឲ្យមន្ត្រីការពារសិទ្ធិមនុស្ស ជួយអន្តរាគមន៍ទៅស្ថាប័នពាក់ព័ន្ធនៃអាជ្ញាធរខេត្ត ចាត់វិធានការទៅលើក្រុមហ៊ុន ស៊ី.អ.ឌី ដែលបានរំលោភដីពួកគាត់ និងដុតចម្ការស្វាយចន្ទី ពួកគាត់កាលពីខែមីនា កន្លងទៅនេះ។
មន្ត្រីសម្របសម្រួលសមាគមអាដហុក ខេត្តរតនគិរី លោក ឆាយ ធី មានប្រសាសន៍បញ្ជាក់ថា ប្រជាពលរដ្ឋបានរាយការណ៍ករណីនេះជូនមន្ត្រីមូលដ្ឋានភូមិជួយដោះស្រាយ ប៉ុន្តែច្រើនខែកន្លងទៅនេះ មិនឃើញមានដំណោះស្រាយអ្វីឲ្យអ្នកភូមិទទួលយកបានឡើយ។ លោកបន្តថា សមាគមលោកបានអន្តរាគមន៍ឲ្យអ្នកភូមិដាក់ពាក្យប្ដឹងទៅស្ថាប័នអយ្យការបន្ថែមទៀត ដើម្បីចាត់វិធានការផ្លូវច្បាប់ក្នុងបញ្ហានេះ៖ «វាជារឿងក្រុមហ៊ុនឈូសឆាយប៉ះពាល់ទ្រព្យសម្បត្តិអ្នកដទៃ។ ស្ថាប័នអយ្យការបានទទួលពាក្យ ហើយរង់ចាំចាត់វិធានការតាមផ្លូវច្បាប់»។
វិទ្យុអាស៊ីសេរី នៅថ្ងៃអង្គារ ទី៩ ខែកក្កដា មិនអាចទាក់ទងតំណាងក្រុមហ៊ុន ស៊ី.អ.ឌី សុំបំភ្លឺសេចក្តីចោទប្រកាន់នេះបាននៅឡើយ។
ទាក់ទិនករណីនេះដែរ មេឃុំល្អក់ លោក យ៉ាម ប៉ាន មានប្រសាសន៍បញ្ជាក់ថា លោកមិនបានទទួលសេចក្តីរាយការណ៍ ឬពាក្យប្ដឹងណាមួយពីករណីនេះទេ។ ចំណែកអភិបាលស្រុកអូរជុំ លោក សាក់ សុន បានបញ្ជាក់ដែរថា មិនមានមន្ត្រីមូលដ្ឋានភូមិឃុំ រាយការណ៍មកអាជ្ញាធរស្រុកពីករណីនេះដូចគ្នា។ លោកសំណូមពរឲ្យអ្នកភូមិដាក់ពាក្យប្ដឹងមកអាជ្ញាធរស្រុក ដើម្បីមន្ត្រីស្រុកដោះស្រាយបញ្ហានេះជូនពលរដ្ឋ៖ «ឲ្យគាត់មកជួបខ្ញុំមើល ម៉េចបានជាក្រុមហ៊ុនណាទៅធ្វើអ៊ីចឹង។ ឲ្យគាត់ជួបខ្ញុំមើលនៅឯណា អត់ដឹងសោះ គាត់អត់ដែលប្រាប់ខ្ញុំសោះអ៊ីចឹងៗ មានកំហុសអ្វីទៅបំពានអ៊ីចឹងតែខ្វៀលហើយ កម្មសិទ្ធិរបស់គាត់ហើយទៅរំលោភកម្មសិទ្ធិរបស់គាត់ម្ដេចកើត»។
ទោះជាយ៉ាងនេះក៏ដោយ តំណាងប្រជាពលរដ្ឋ ៥គ្រួសារ លោក មាំង ចាងវ៉ាង មានប្រសាសន៍បញ្ជាក់ថា កន្លងទៅនេះ មន្ត្រីក្រុមហ៊ុនបានសន្យាថានឹងដោះស្រាយបញ្ហាជូនអ្នកភូមិ ប៉ុន្តែការសន្យានេះមិនត្រូវបានអនុវត្តឡើយ។ លោកបន្តថា ទង្វើរបស់ក្រុមហ៊ុន គឺជាការរំលោភសិទ្ធិរស់នៅរបស់ក្រុមជនជាតិដើមភាគតិច៖ «ដីបងរ៉ៃហ្នឹង គេឈូសឆាយដាំកៅស៊ូហើយ ៤ហិកតារ។ ហើយចន្ទីខ្ញុំវាឆេះហ្នឹង ១ហិកតារកន្លះ។ តាគៀង ១ហិកតារកន្លះ។ អាគង់ ២ហិកតារ។ អាកាថិន ១ហិកតារ។ វាស្មុគស្មាញបើក្រុមហ៊ុនវាយក ជួយដោះស្រាយឲ្យពូផង»។
យោងពាក្យប្ដឹងរបស់ប្រជាពលរដ្ឋដែលវិទ្យុអាស៊ីសេរី ទទួលបានពីមន្ត្រីសមាគមអាដហុក បុគ្គលិកក្រុមហ៊ុន ស៊ី.អ.ឌី ខេត្តរតនគិរី ពីរនាក់ឈ្មោះ សាំង ចន្ថា ភេទប្រុស និងឈ្មោះ វក់ វក់ ភេទប្រុស បានដុតបំផ្លាញដើមចន្ទីធំៗរបស់ពលរដ្ឋ ២គ្រួសារ អស់ ៩៣០ដើម និងបានរំលោភយកដីពលរដ្ឋចំនួន ៣គ្រួសារ អស់ទំហំសរុប ៨ហិកតារ និង ១គ្រួសារទៀតមិនទាន់បានមកប្ដឹងនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។