ប្រជាពលរដ្ឋរស់នៅភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ បានអោយដឹងនៅថ្ងៃទី១១ ខែតុលា ឆ្នាំ២០១៣ ថា តុលាការខេត្តព្រះសីហនុ បានចេញលិខិតបង្គាប់អោយពួកគាត់ចំនួន ៨៨គ្រួសារ ទៅជួបនៅថ្ងៃទី១៧ ខែតុលា ឆ្នាំ២០១៣ ដើម្បីដោះស្រាយករណីបណ្ដឹងដែលចោទថា ពួកគាត់រស់នៅលើដីកម្មសិទ្ធិរបស់អ្នកដទៃ។
អ្នកភូមិម្នាក់ឈ្មោះ នួន សុខុន បាននិយាយថា លោកបានរស់នៅលើដីសព្វថ្ងៃតាំងពីឆ្នាំ១៩៩៦ មិនដែលមានបញ្ហាអ្វី ឬមានអ្នកណាមកអះអាងថា ដីនេះជារបស់គេឡើយ ទើបនៅថ្ងៃទី១០ ខែតុលា ឆ្នាំ២០១៣ ស្រាប់តែមានលិខិតកោះហៅរបស់តុលាការ ដែលធ្វើអោយលោក និងអ្នកភូមិឯទៀតទាំង ៨៨គ្រួសារ ភ្ញាក់ផ្អើលយ៉ាងខ្លាំង។
លោក សុខុន មិនដឹងថា អ្នកដែលអះអាងថា ខ្លួនគេជាម្ចាស់ដីនោះមកពីណា ឬមានតួនាទីអ្វីទេ តែគ្រាន់តែដឹងតាមរយៈលិខិតរបស់តុលាការថា ពួកគេមានឈ្មោះ ចាន់ ហេង សួ ស៊ូហ្វាង និង លឹម ជូ៖ «គេហៅទៅហ្នឹង ដែលដាក់ក្នុងហ្នឹងគេអោយរុះរើចេញពីដី ៣៧ហិកតារ ហើយគេដាក់ផ្សះផ្សា។ បើតុលាការកោះហៅ ខ្ញុំត្រូវតែទៅទាំង ៨៨នាក់ហ្នឹង ទៅកន្លែងតុលាការចាំមើលមានដីកាម៉េចអីម៉េច»។
ពលរដ្ឋរូបនេះបន្តថា សព្វថ្ងៃគាត់ពុំមានប្លង់រឹងបញ្ជាក់កម្មសិទ្ធិដីឡើយ ប៉ុន្តែដោយសំអាងថា លោកបានរស់នៅលើដីនេះជិត ២០ឆ្នាំមកហើយនោះ លោកនឹងមិនរុះរើចេញទៅណានោះទេ។ លោកថា ពលរដ្ឋទាំង ៨៨គ្រួសារ ប្ដេជ្ញាចិត្តហើយថា មិនចាកចេញឡើយ បើទោះជាក្រុមហ៊ុនផ្តល់សំណងយ៉ាងណាក៏ដោយ។
លោក នួន សុខុន៖ «ខ្ញុំនៅហ្នឹងយូរហើយ ខ្ញុំអត់មានឃើញម្ចាស់ដីហ្នឹងណា ព្រោះសម្ដេចតេជោ គាត់និយាយគាត់ថានៅត្រឹមតែ ៥ឆ្នាំអត់មានការអភិវឌ្ឍអី គឺដីរបស់យើងហើយ ហើយឥឡូវខ្ញុំមិនមែននៅត្រឹម ៥ឆ្នាំឯណា ខ្ញុំនៅជិត ២០ឆ្នាំហើយ ការរស់នៅរបស់ប្រជាពលរដ្ឋ គាត់នៅបង្កបង្កើតបានជាភូមិដាំដំណាំមានផ្លែបេះហូបហើយ ដើមឈើដើមអី»។
កន្លងមក ពលរដ្ឋខ្មែរជាច្រើនត្រូវបានបណ្ដេញចេញពីដីលំនៅឋានរបស់ពួកគេ ដើម្បីយកដីអោយក្រុមហ៊ុនធ្វើវិនិយោគ។ ការបណ្ដេញពលរដ្ឋចេញដោយអយុត្តិធម៌ បានធ្វើអោយពលរដ្ឋមួយចំនួនត្រូវបាត់បង់ដីធ្លីរបស់ខ្លួន។ ការបណ្ដេញចេញដោយអយុត្តិធម៌ ក៏តែងបណ្ដាលអោយកើតជាអំពើហិង្សារាប់មិនអស់ រវាងសមត្ថកិច្ច និងពលរដ្ឋដែលជាជនរងគ្រោះ។
លោក ពិន សេន មេឃុំអូរបាក់រទេះ បាននិយាយថា ពលរដ្ឋទាំង ៨៨គ្រួសារ ដែលតុលាការកោះហៅនោះ បានរស់នៅលើដីពួកគេតាំងពីយូរមកហើយ មិនដែលមានអ្នកណាមករំខានប្ដឹងទាមទារដីរបស់គេឡើយ។ លោក ពិន សេន ក៏មិនដឹងថា អ្នកដែលអះអាងថាជាម្ចាស់ដីនោះ ជានរណា ហើយមកពីខាងណានោះដែរ។
លោក ពិន សេន៖ «ប៉ាន់ស្មានទេ ប្រហែលគេសំអាងថាគេមានប្លង់រឹងអ៊ីចឹងទៅណា។ ខ្ញុំអត់ដែលទទួលប្លង់រឹងអីទេ អត់ដែលបានឃើញទេ ប៉ុន្តែខ្ញុំមេឃុំ ខ្ញុំអត់បានទទួលស្គាល់ អត់បានទទួលដឹងទេ ព្រោះគេអត់ដែលធ្វើសេចក្តីជូនដំណឹង ឬក៏ដាក់ប្ដឹងសាលាឃុំអោយបានដឹងថា ដីហ្នឹងជាដីរបស់គេពីកាលណាកាលណីមក ខ្ញុំអត់បានដឹង ដាច់ខាត គឺខ្ញុំឈរខាងប្រជាពលរដ្ឋ ហើយតាំងពីដើមមក គឺយើងរស់នៅជាមួយពួកគាត់ទៅខាងណាទៀត»។
លោក ស្វាយ តុញ ចៅក្រមសាលាដំបូងខេត្តព្រះសីហនុ ដែលជាអ្នកទទួលបន្ទុកករណីបណ្ដឹងនេះបាននិយាយថា ពលរដ្ឋទាំងនោះត្រូវបានប្ដឹងពីបទរស់នៅលើដីអ្នកដទៃ។ លោកថា ដើមបណ្ដឹងជាក្រុមហ៊ុនដែលតាមលោកដឹង គឺជាកម្មសិទ្ធិរបស់ខ្មែរ និងបរទេស។ លោកបន្ថែមថា ក្នុងនាមជាអ្នកដោះស្រាយ លោកត្រូវតែដោះស្រាយនៅពេលមានបណ្ដឹង ប៉ុន្តែដំណើរការយ៉ាងណានោះ វាអាស្រ័យលើមូលដ្ឋានច្បាស់លាស់។
លោក ស្វាយ តុញ៖ «អាហ្នឹងខ្ញុំនឹងធ្វើការអង្កេតបន្តទៀត ប្រសិនបើខាងក្រុមហ៊ុនគេមិនមានលក្ខណៈអីត្រឹមត្រូវទេ ក៏យើងច្រានបណ្ដឹងគេចោល ប៉ុន្តែគោលការណ៍របស់ក្រុមហ៊ុនដែលគេមានដីហ្នឹង គឺគេមានគោលការណ៍អោយគាត់ទៅដើម្បីដោះស្រាយអោយគាត់ទេ ចង់និយាយថា គាត់មានឯកសារអីខ្លះ បើគាត់មានដោះស្រាយអោយ»។
ពលរដ្ឋនឹងរង់ចាំមើលថា តើតុលាការខេត្តព្រះសីហនុ ដោះស្រាយយ៉ាងណាចំពោះករណីបណ្ដឹងនេះ ក្នុងពេលដែលពលរដ្ឋប្ដេជ្ញាថា ពួកគេនឹងមិនទទួលសំណងសម្រាប់ការបណ្ដេញចេញនោះឡើយ ហើយស្របពេលដែលអាជ្ញាធរមូលដ្ឋានក៏គាំទ្រពលរដ្ឋទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។