តុលាការខេត្តតាកែវ នៅថ្ងៃទី២៧ ខែមីនា បានសាកសួរបុរសខ្មែរកម្ពុជាក្រោមម្នាក់នៅស្រុកបូរីជលសារ ដែលពាក់ព័ន្ធពីបទឈូសឆាយដីព្រៃលិចទឹកខុសច្បាប់។
ពលរដ្ឋខ្មែរកម្ពុជាក្រោមម្នាក់ក្នុងចំណោម ៣នាក់ គឺលោក វី ម៉ាយ រស់នៅភូមិសង្គមមានជ័យ ឃុំកំពង់ក្រសាំង ដែលត្រូវចូលខ្លួនតាមដីកាកោះ បានថ្លែងថា ចៅក្រមស៊ើបសួរសាលាដំបូងខេត្តតាកែវ លោក វ៉ាន់ សែនវិសុទ្ធ បានសាកសួររូបលោកជុំវិញបញ្ហាពាក់ព័ន្ធនឹងការកាប់ទន្ទ្រានឈូសឆាយដីព្រៃលិចទឹក នៅចំណុចឡូលេខ១ ហៅបឹងព្រៃល្ពៅ ដែលពលរដ្ឋខ្មែរកម្ពុជាក្រោម ៦៨គ្រួសារ បានចូលទៅចែកគ្នាធ្វើស្រែប្រាំងលើដីដែល លោកឧកញ៉ា ម៉ៅ ញ៉ន បានកាប់រាន និងបោះបង្គោលស្រាប់ តាំងពីឆ្នាំ២០១២។
លោកថា បន្ទាប់ពីពលរដ្ឋបានធ្វើស្រែបានមួយរដូវនោះ ពួកគេចំនួន ៣នាក់ ក៏ត្រូវមន្ត្រីជលផលប្ដឹងទៅតុលាការតែម្ដង។ លោក វី ម៉ាយ អះអាងថា បន្ទាប់ពីសាកសួរជិត ៣ម៉ោង ជុំវិញបញ្ហានេះ ចៅក្រមបានឲ្យគាត់ធ្វើកិច្ចសន្យាឈប់កាន់កាប់ដីតំបន់នោះទេ៖ «សួរថា ហេតុម៉េចបានយើងទៅរុករានទន្ទ្រានដីព្រៃ ហើយខ្ញុំក៏លើកហេតុផលប្រាប់គេ។ ហើយក៏គាត់សួរខ្ញុំថា កូនចៅប៉ុន្មានៗ ហើយខ្ញុំថាខ្ញុំក្រអ៊ីចឹងទៅ ហើយក្រឡាបញ្ជីគេថា បើសិនណាយើងនៅជាប់ទាក់ទិនទៀត គេឃាត់ខ្លួនទុក គេរកដំណោះស្រាយ ហើយបានគេឲ្យយើងចេញ។ ហើយខ្ញុំខ្លាចពេក ខ្ញុំថាឥឡូវខ្ញុំឈប់ធ្វើហើយ ខ្ញុំប្រគល់ដីជូនរដ្ឋវិញហើយ»។
ពលរដ្ឋខ្មែរកម្ពុជាក្រោមចំនួន ៣នាក់ ក្នុងចំណោមពលរដ្ឋ ៦៨គ្រួសារ ត្រូវបានមន្ត្រីជលផលខេត្តតាកែវ ប្ដឹងនោះ ឈ្មោះ វី ម៉ាយ លោក សុន រុំ និងលោក វី ចាន់ ពួកគេនឹងត្រូវតុលាការកោះហៅសាកសួរនៅថ្ងៃបន្ទាប់។ ចំណែកមន្ត្រីជលផលខេត្តជាដើមបណ្ដឹង គឺឈ្មោះ ឃិន វ៉េង និងឈ្មោះ ប៉ៃ លិន។ យ៉ាងណាក៏ដោយ ពលរដ្ឋទាំង ៣នាក់ នៅពុំទាន់មានមេធាវីការពារក្ដីឲ្យពួកគេនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។