សមាគមការពារសិទ្ធិមនុស្សអាដហុក(Adhoc) ព្រួយបារម្ភចំពោះបញ្ហាទាហាន ដែលរំលោភដីធ្លី និងគំរាមកំហែងប្រជាពលរដ្ឋ ខ្លះនៅក្នុងខេត្តឧត្ដរមានជ័យ។
ការរំលោភដីធ្លី និងគំរាមកំហែងមកលើប្រជាពលរដ្ឋ ដែលបង្កឡើងដោយក្រុមទាហាន ទាំងនោះ ភាគច្រើនគឺអាជ្ញាធរនិងតុលាការ ហាក់មិនសូវហ៊ានដោះស្រាយនិងចាត់វិធានការផ្លូវច្បាប់ ដើម្បីរកយុត្តិធម៌ទេ។
ប្រជាពលរដ្ឋ១១គ្រួសារ នៅភូមិថ្នល់កែង ឃុំត្រពាំងប្រាសាទស្រុកត្រពាំងប្រាសាទព្រមានថា ពួកគេនឹងធ្វើដំណើរទៅទីក្រុងភ្នំពេញ ដើម្បីតវ៉ាប្រឆាំងនិងមេបញ្ជាការរងយោធា នៃកងពលលេខ៦ ម្នាក់ ពីបទប្រើអំណាច និងគំរាមកំហែងរំលោភយកដីចម្ការជាច្រើនហិកតារ។
ការព្រមាននេះ បានធ្វើឡើងបន្ទាប់ក្រុមអ្នកភូមិបានដាក់ពាក្យបណ្ដឹងចំនួន៤លើក ទៅសាលាខេត្តឧត្ដរមានជ័យ ព្រមទាំងតុលាការ ជាច្រើនខែមកហើយ ក៏ប៉ុន្តែនៅមិនទាន់ឃើញមានការដោះស្រាយយ៉ាងណានៅឡើយ។
តំណាងអ្នកភូមិថ្នល់កែង១១គ្រួសារ គឺលោក មាង លីហួ មានប្រសាសន៍ថា រូបគាត់ និងអ្នកភូមិ១០គ្រួសារទៀត មានទំនាស់ដីចម្ការជាង៦០ហិកតារ ជាមួយទាហាន រយៈពេល៥ឆ្នាំមកហើយ។ បុរសដដែលបញ្ជាក់ថា កាលពីក្រុមនិស្សិតស្ម័គ្រចិត្តចុះវាស់វែង ធ្វើប័ណ្ណកម្មសិទ្ធិជូនប្រជាពលរដ្ឋ គឺទាហាននៃកងពលលេខ៦ បានអះអាងថា ដីចម្ការរបស់ពួកលោក បានប៉ះពាល់លើដីបន្ទាយយោធា ដោយសារទាហានអះអាងដូច្នេះប្រជាពលរដ្ឋ ក៏សុខចិត្តប្រគល់ដីមួយផ្នែកទៅឱ្យទាហាន ឯមួយផ្នែកទៀតដែលនៅសេសសល់ គឺត្រូវបានក្រុមនិស្សិតចុះវាស់វែង ដើម្បីធ្វើប័ណ្ណកម្មសិទ្ធិ ក៏ប៉ុន្តែនៅពេលដែលគេបិទផ្សាយទិន្នន័យ មុនពេលចេញប្លង់រឹងស្រាប់តែប្រជាពលរដ្ឋទាំងអស់បាត់ឈ្មោះ ហើយប្លង់ដីរបស់គាត់ត្រូវបានឈ្មោះ ណាក់ សុខា ជាម្ចាស់ទៅវិញ។
លោក មាង លីហួ បញ្ជាក់ទៀតថា ចាប់តាំងពីពេលនោះមក រូបលោកនិងអ្នកភូមិ១០គ្រួសារទៀតក៏ធ្វើការតវ៉ា ដោយដាក់ពាក្យប្ដឹងទៅអាជ្ញាធរជាច្រើនកន្លែង រហូតដល់ពេលខ្លះមេបញ្ជាការរងនៃកងពលលេខ៦ គំរាមកំហែង គាបសង្កត់ ព្រមទាំងប្រើគ្រឿងចក្រកាយផ្ដាច់ផ្លូវ មិនឱ្យចេញចូលដឹកជញ្ជូនកសិផលទៀតផង៖ «ថ្មីៗហ្នឹងគេកាយបិទអាផ្លូវចាស់ ហើយយើងខ្ញុំក៏ជិះតាមផ្លូវថ្មីកាត់វរៈ២៦១ដែរ តែកាត់នៅខាងក្រោយ។ ដល់ឥឡូវគេបិទអាផ្លូវខាងក្រោយនោះទៀតមិនឱ្យចេញទេ ដោយគេឱ្យវាងទៅឆ្ងាយធ្វើឱ្យប្រជាពលរដ្ឋពិបាកអីចឹង ហើយបើថាចង់ស្រួលគឺបរកាត់បន្ទាយ ឱ្យលុយគេៗឱ្យទៅ។ ឱ្យទាហានហ្នឹងម្នាក់១០០០ - ២០០០រៀលក៏ឱ្យគេទៅ។ ហើយមួយទៀតខ្ញុំចង់បញ្ជាក់ថា ឥឡូវដីហ្នឹងត្រូវបានលោក ណាក់ សុខា មកគំរាមកំហែងយើងខ្ញុំទាំង១៣គ្រួសារថាជាដីរបស់ទាហាន ឥឡូវគាត់យកលក់ឱ្យឯកជន។ ហើយលោក សេង សាន ជាទាហានមកកាងថាជាដីរបស់កងពល»។
ទោះយ៉ាងណាវិទ្យុអាស៊ីសេរីមិនអាចទាក់ទង អភិបាលខេត្តឧត្ដរមានជ័យ លោក ស ថាវី និងមេបញ្ជាការរងនៃកងពលលេខ៦ ដើម្បីសុំការពន្យល់ បានថាយ៉ាងណានៅឡើយ។
ចំណែកអភិបាលស្រុកត្រពាំងប្រាសាទ លោក នៅ សំដារារិទ្ធិ បានឆ្លើយតបថាលោកមិនអាចអធិប្បាយរឿងនេះ បាននៅឡើយទេ ពីព្រោះលោកមិនដឹងថាវានៅតំបន់ណាច្បាស់លាស់ ដោយសារទំនាស់ដីធ្លី ជាមួយទាហាន ក្នុងស្រុកត្រពាំងប្រាសាទមានច្រើនករណី៖ «ឥឡូវខ្ញុំសុំសួរវិញតើវានៅក្នុងចំណុច ក្នុងវរៈលេខប៉ុន្មាន ? នៅចំណុចណាព្រោះកងពលលេខ៦ ខ្ញុំមានសំណុំរឿងច្រើនណាស់។ ខ្ញុំសុំឱ្យគាត់មកដាក់ពាក្យបណ្ដឹងនៅសាលាស្រុកមកដើម្បីសាលាស្រុកគេចុះទៅមើល ព្រោះអីបើសិនជាអត់ដឹងចំណុចត្រង់ណាអីត្រង់ណា ខ្ញុំអត់ដឹងឆ្លើយជាមួយថាយ៉ាងម៉េចអីយ៉ាងម៉េចទេ។អីចឹងចង់ឱ្យគាត់មកថ្ងៃច័ន្ទព្រឹកស្អែក»។
កាលពីថ្ងៃទី១២ខែវិច្ឆិកាកន្លងទៅ ក្រុមអ្នកភូមិថ្នល់កែង ទាំង១១គ្រួសារ បានដាក់ពាក្យបណ្ដឹងទៅសមាគមការពារសិទ្ធិមនុស្សអាដហុក ខេត្តឧត្តរមានជ័យ ឱ្យជួយដោះស្រាយបញ្ហាដីចម្ការ៦២ហិកតារ។ ពួកគេចោទប្រកាន់បុរសឈ្មោះ ណាក់ សុខា ថាបានឃុបឃិតជាមួយមេបញ្ជាការរងនៃកងពលលេខ៦ ព្រមទាំងមន្ត្រីរៀបចំដែនដី នគរូបនីយកម្ម និងសំណង់របស់ខេត្តឧត្តរមានជ័យខ្លះទៀត ដើម្បីរំលោភយកដីនោះ។
អ្នកសម្របសម្រួល សមាគមការពារសិទ្ធិមនុស្សអាដហុក ខេត្តឧត្តរមានជ័យ លោក ស្រី ណារ៉េន មានប្រសាសន៍ថា យោងតាមបណ្ដឹងរបស់អ្នកភូមិ គឺទាហានមិនត្រឹមតែរំលោភយកដី និងគំរាមកំហែងលើប្រជាពលរដ្ឋប៉ុណ្ណោះទេ ថែមទាំងផ្ដាច់ផ្លូវមិនឱ្យអ្នកភូមិចេញចូល ទៅចម្ការទៀតផង។
លោក ស្រី ណារ៉េន បញ្ជាក់ថា កន្លងទៅអភិបាលរងខេត្តឧត្តរមានជ័យ លោក វ៉ាត ប៉ារ៉ានីន ក៏ធ្លាប់ចុះទៅដោះស្រាយដែរ ក៏ប៉ុន្តែទាហាន មិនបានស្ដាប់តាមអាជ្ញាធរទេ៖ «វាដូចជាមិនមានអ្នកណាគោរពអ្នកណាទេ សូម្បីតែអភិបាលរងខេត្តលោក វ៉ាត ប៉ារ៉ានីន ចុះទៅសម្របសម្រួលនៅសាលាស្រុកត្រពាំងប្រាសាទហ្នឹង ហាមឱ្យស្ងៀមស្ងាត់សិន ប៉ុន្តែខាងទាហាននៅតែធ្វើសកម្មភាពមកលើប្រជាពលរដ្ឋដដែល។ ដីហ្នឹងមួយចំនួនគាត់បានថតជាមួយនិស្សិតរួចហើយក៏ប៉ុន្តែពេលចេញឈ្មោះ កម្មសិទ្ធិ គឺឱ្យទៅអ្នកផ្សេងទៀត។បញ្ហាមែនទែនទៅវាមកពីខាងមន្ត្រីសុរិយោដីខេត្តហ្នឹងផង ដែលបានឃុបឃិតគ្នាចេញប្លង់ទៅឱ្យអ្នកផ្សេងទៀត»។
កាលពីឆ្នាំមុនទំនាស់ដីចម្ការរវាងប្រជាពលរដ្ឋ និងទាហាននោះគឺមានការបំផ្លាញដំណាំរបស់ប្រជាពលរដ្ឋ មានការរារាំងអ្នកភូមិមិនឱ្យចូលទៅដាំដុះទៀត ព្រមទាំងគំរាមកំហែង ដោយតាមរកចាប់ខ្លួនតំណាងអ្នកភូមិដែលតវ៉ាផង។
ចាប់តាំងពីកើតទំនាស់ដីធ្លីជាមួយមេបញ្ជាការរង នៃកងពលលេខ៦មក អ្នកភូមិ១១គ្រួសារបានដាក់ពាក្យប្ដឹងទៅសាលាខេត្តឧត្តរមានជ័យ ចំនួន៤លើកមកហើយ ក៏ប៉ុន្តែអាជ្ញាធរខេត្តហាក់មិនបង្ហាញ ឱ្យប្រជាពលរដ្ឋមានក្ដីសង្ឃឹមលើការដោះស្រាយនោះទេ។
ក្រុមអ្នកភូមិថ្នល់កែង ១១គ្រួសារ ព្រមានថា ពួកគេនឹងឡើងទៅតវ៉ានៅទីក្រុងភ្នំពេញ ដើម្បីប្រឆាំងនិងទាហាន ដែលរំលោភដីធ្លីនេះ ក្នុងពេលឆាប់ៗ ពីព្រោះតែគេអស់ជំនឿ លើមន្ត្រីខេត្តឧត្ដរមានជ័យទៅហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។