អង្គការសិទ្ធិមនុស្សក្រៅរដ្ឋាភិបាល នៅខេត្តឧត្តរមានជ័យ ចោទប្រកាន់ថា មន្ត្រីប៉ូលិស និងអាជ្ញាធរមួយចំនួន ថាបានតាមរារាំង និងរំខានក្រុមការងាររបស់អង្គការសមធម៌អាមេរិកាំង មិនឱ្យចុះជួបក្រុមអ្នកភូមិអូរបាត់មាន់ ដែលបាត់បង់ដីធ្លីដោយសារតែក្រុមហ៊ុនស្ករអំពៅអង្គរស៊ូហ្គើ (Angkor Sugar)។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ គឺលោក ស្រី ណារ៉េន។ លោកមានប្រសាសន៍កាលពីរសៀលថ្ងៃសៅរ៍ ទី១១ ខែតុលា ថា ក្រុមប៉ូលិសដែលដឹកនាំដោយ លោក ញ៉ុល វុធ ស្នងការរងនគរបាលទទួលបន្ទុកចរាចរណ៍ បានកាក់ទុករថយន្តរបស់អង្គការសមធម៌ ១គ្រឿង ក្រោមលេសត្រួតពិនិត្យឯកសារផ្សេងៗកាលពីរសៀលថ្ងៃទី១១ ខែតុលា។
លោក ស្រី ណារ៉េន បញ្ជាក់ថា អង្គការសមធម៌ បានចុះទៅខេត្តឧត្តរមានជ័យ ក្នុងបំណងជួបជាមួយប្រជាពលរដ្ឋភូមិអូរបាត់មាន់ ជាច្រើនគ្រួសារ ដែលបាត់បង់ដីធ្លីដោយសារក្រុមហ៊ុនអង្គរស៊ូហ្គើ យកទៅដាំអំពៅ។ ក៏ប៉ុន្តែ ទាំងអាជ្ញាធរ និងសមត្ថកិច្ច បានរារាំងមិនឱ្យអង្គការនោះបានជួបប្រជុំជាមួយអ្នកភូមិទេ។ ដោយសារបញ្ហានេះ សមាគមការពារសិទ្ធិមនុស្សអាដហុក បានហៅអ្នកភូមិឱ្យមកជួបនៅទីស្នាក់ការរបស់ខ្លួនក្នុងទីរួមខេត្តឧត្តរមានជ័យ។ លុះដល់ពេលប្រជុំចប់ រថយន្តរបស់អង្គការសមធម៌ បានដឹកអ្នកភូមិទាំងនោះត្រឡប់ទៅផ្ទះវិញ ក៏ប៉ុន្តែត្រូវក្រុមប៉ូលិសកាក់កណ្ដាលផ្លូវ។
លោក ស្រី ណារ៉េន៖ «ដល់ពេលត្រូវចេញទៅវិញ ឥឡូវមកដល់ដីថ្មីជិតកន្លែងកងរាជអាវុធហត្ថក្រុងសំរោង ត្រូវបានប៉ូលិសគេកាក់គេឆែករកឯកសារឡាន ហើយមានទូរទស្សន៍អីចាំថត ហើយឡានមានស្លាកលេខ អ៊ិនជីអូ (NGO) អីត្រឹមត្រូវ ប៉ុន្តែគេកាក់តែឡានអង្គការសមធម៌ហ្នឹងតែ១ទេ។ មើលទៅហាក់ដូចជាបិទសិទ្ធិសេរីភាពប្រជាពលរដ្ឋ ដែលគាត់ឡើងមកស្នាក់ការខ្ញុំហ្នឹង។ វាចេតនាមែនទែនរឿងដីអូរបាត់មាន់ហ្នឹង ខ្ញុំឆ្ងល់ហេតុអ្វីគាត់យកចិត្តទុកដាក់ជាមួយក្រុមហ៊ុនហ្នឹងម្ល៉េះ?»។
ទោះយ៉ាងណា វិទ្យុអាស៊ីសេរី មិនអាចទាក់ទងស្នងការរងនគរបាលខេត្តឧត្តរមានជ័យ លោក ញ៉ុល វុធ ដើម្បីសុំការបំភ្លឺជុំវិញការចោទប្រកាន់នោះបានថាយ៉ាងណានៅឡើយ ដោយសារតែលោកមិនទទួលទូរស័ព្ទ។
នេះជាលើកទី២ហើយដែលសមត្ថកិច្ចខេត្តឧត្តរមានជ័យ បានរារាំងសកម្មភាពរបស់អង្គការសមធម៌។
កាលពីថ្ងៃទី៩ ខែកញ្ញា កន្លងទៅ ប៉ូលិសខេត្តឧត្តរមានជ័យ ធ្លាប់នាំខ្លួនស្ត្រីជនជាតិអាមេរិកាំងម្នាក់ ជាបុគ្គលិកអង្គការនេះ ទៅសាកសួរ និងឆែកលិខិតឆ្លងដែន ដោយបញ្ជូនទៅទីក្រុងភ្នំពេញវិញ ឱ្យនាយកដ្ឋានជនបរទេសនៃក្រសួងមហាផ្ទៃ ត្រួតពិនិត្យម្ដងរួចមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។