អ្នកភូមិជាច្រើនគ្រួសារ បានទាមទារយកដីដែលជាទ្រព្យសម្បត្តិសាធារណៈមួយកន្លែង ឋិតក្នុងភូមិផ្កាស្លា សង្កាត់ចម្ការសំរោង មករក្សាទុកជាទ្រព្យសម្បត្តិរួមវិញ។ ដីទំហំជាង ១០០ម៉ែត្រការ៉េនោះ ត្រូវបានអាជ្ញាធរមូលដ្ឋានឃុបឃិតគ្នាលក់ និងធ្វើប្លង់កម្មសិទ្ធិទៅឲ្យបុគ្គលផ្សេងដោយពុំមានការឯកភាពពីក្រុមអ្នកភូមិនោះឡើយ។
អ្នកភូមិចំនួន ៦៦នាក់ បានផ្ដិតមេដៃលើញត្តិរួមគ្នាដាក់ទៅអភិបាលខេត្តបាត់ដំបង ស្នើឲ្យជួយអន្តរាគមន៍លើករណីមេភូមិផ្កាស្លា ដែលបានយកដីទីស្នាក់ការភូមិលក់ និងបានធ្វើប្លង់កម្មសិទ្ធិទៅបុគ្គលម្នាក់ រស់នៅសង្កាត់អូរចារ ក្រុងបាត់ដំបង ខេត្តបាត់ដំបង។
ញត្តិចុះកាលបរិច្ឆេទកាលពីថ្ងៃទី២៨ កុម្ភៈ ឆ្នាំ២០១៤ ដែលវិទ្យុអាស៊ីសេរី ទទួលបាននៅថ្ងៃទី១៥ មីនា នេះបញ្ជាក់ថា អ្នកភូមិកើតទុក្ខមិនសុខចិត្តចំពោះមេភូមិផ្កាស្លា ឈ្មោះ សួន សោភ័ណ្ឌ ដែលបានយកដីជាទ្រព្យសម្បត្តិសាធារណៈទៅលក់។
ប្រជាពលរដ្ឋក្នុងមូលដ្ឋានសុំយកដីនោះមកទុកធ្វើជាទីស្នាក់ការភូមិ ដើម្បីផ្ដល់ភាពងាយស្រួលដល់ការបម្រើផលប្រយោជន៍សាធារណៈ និងការអភិវឌ្ឍក្នុងមូលដ្ឋាន។
តំណាងអ្នកភូមិផ្កាស្លា លោក តី អាន បញ្ជាក់ថា ទង្វើរបស់លោកមេភូមិនេះ ពុំមែនជាលើកទីមួយនោះទេ។ កន្លងទៅ មេភូមិរូបនេះធ្លាប់បានកាត់ដីជាទ្រព្យសម្បត្តិរបស់ទីស្នាក់ការភូមិ លក់ម្ដងរួចទៅហើយ៖ «មេភូមិហ្នឹងកាត់ ៦ម៉ែត្រគុណ ១៧,៧០ម៉ែត្រ ដើម្បីបញ្ជូនទៅឈ្មោះ បុល នៅភូមិអូរចារ។ ប្រជាពលរដ្ឋដែលគេបានដឹងមក គឺវាមានជាង ៣០០ម៉ែត្រការ៉េ ទាំងចាស់ទាំងថ្មី។ ដីថ្មីវា ២១២ម៉ែត្រការ៉េ ដែលនៅសល់ពីការលក់លើកទី១។ អ៊ីចឹង គាត់ថតទៅទាំងអស់ ប៉ុន្តែប្រជាពលរដ្ឋអត់ដឹងថាលោកមេឃុំឃុបឃិតគ្នាយ៉ាងណា កាត់ចំនួនពាក់កណ្ដាលទៅឲ្យឈ្មោះ បុល នោះទេ ប្រជាពលរដ្ឋអត់បានដឹងទេ»។
ការលក់ដីដែលជាទ្រព្យសម្បត្តិទីស្នាក់ការភូមិ និងការចុះធ្វើប្លង់កម្មសិទ្ធិដោយមន្ត្រីសុរិយោដីនេះ បានកើតមានឡើងកាលពីអំឡុងខែមករា ឆ្នាំ២០១៤។ ក្រោយមក បុគ្គលឈ្មោះ បុល រស់នៅសង្កាត់អូរចារ ក៏បានដឹកគ្រឿងសំណង់បញ្ជូនមនុស្សចុះទៅរៀបចំធ្វើរបងព័ទ្ធហ៊ុមដីនោះ ធ្វើជាកម្មសិទ្ធិរបស់ខ្លួន ប៉ុន្តែសកម្មភាពនោះត្រូវបានក្រុមអ្នកភូមិហាមឃាត់។
លោក សួន សោភ័ណ្ឌ ជាមេភូមិផ្កាស្លា បានបដិសេធចំពោះការចោទប្រកាន់នេះ។ លោកបានទម្លាក់ការទទួលខុសត្រូវនៃការលក់ដូរដីនេះទៅ លោក ឃិន ផាត ជាចៅសង្កាត់ចម្ការសំរោង។ លោកបន្តថា ដីទុកសម្រាប់ធ្វើទីស្នាក់ការភូមិផ្កាស្លា គឺខាងរដ្ឋបាលសង្កាត់ចម្ការសំរោង រក្សាទុកទំហំដីតែ ១០០ម៉ែត្រការ៉េប៉ុណ្ណោះ៖ «ដីហ្នឹងមិនមែនជាកម្មសិទ្ធិរបស់ខ្ញុំទេ ហើយក៏មិនមែនខ្ញុំជាអ្នកលក់ដែរ។ ដីនោះជាដីទីស្នាក់ការភូមិ ឋិតក្រោមការគ្រប់គ្រងរបស់ចៅសង្កាត់។ ដីហ្នឹងដែលត្រូវធ្វើអាំងវង់ទ័រភូមិហ្នឹងវា ១០០ម៉ែត្រការ៉េ។ រឿងលក់ដីយ៉ាងម៉េច ចៅសង្កាត់បានដឹង ខ្ញុំអត់ដឹងរឿងទាំងអស់»។
ទោះយ៉ាងណា លោក សួន សោភ័ណ្ឌ ទទួលស្គាល់ថា នៅពេលក្រុមមន្ត្រីសុរិយោដីចុះធ្វើប្លង់កម្មសិទ្ធិកាលពីខែមករា កន្លងមកនេះ គឺរូបលោកជាអ្នកសរសេរបំពេញសំណុំឯកសារដីធ្លីឲ្យឈ្មោះ បុល ដែលគេដឹងថា បានទិញដីទីស្នាក់ការភូមិនោះដោយស្ងាត់ជាមួយរដ្ឋអំណាចមូលដ្ឋាន។
វិទ្យុអាស៊ីសេរី មិនអាចសុំការបញ្ជាក់ពី លោក ឃិន ផាត ជាចៅសង្កាត់ចម្ការសំរោង ជុំវិញបញ្ហាលក់ដីទីស្នាក់ការភូមិនៅភូមិផ្កាស្លា នេះបានទេ ប៉ុន្តែ លោក ច័ន្ទ សុផល ជាអភិបាលខេត្តបាត់ដំបង បញ្ជាក់ថា ការលក់ដីទីស្នាក់ការភូមិដោយរដ្ឋអំណាចមូលដ្ឋានស្ងាត់ៗនោះ គឺជារឿងខុសច្បាប់។ លោកនឹងពិនិត្យបញ្ហានេះឡើងវិញ។ ក្នុងរយៈពេលកន្លងមក លោកពុំបានដឹង និងពុំទាន់បានឃើញញត្តិស្នាមមេដៃរបស់អ្នកភូមិ ដែលបញ្ជូនទៅសាលាខេត្តនោះឡើយ៖ «មិនទាន់បានឃើញលិខិត បើឃើញនឹងដោះស្រាយជូនគាត់បួនដប់ម្ភៃថ្ងៃហើយ។ ខ្ញុំអត់ដឹង មិនដឹងគាត់ដាក់កន្លែងណា អ្នកណាទទួលអី ចាំមើលខ្ញុំសួរនាំមើលសិន ដីតូចធំអីគាត់ធ្វើការងារមិនត្រូវ ក៏ខុសច្បាប់ មិនត្រូវទៅធ្វើអ៊ីចឹង»។
មន្ត្រីអង្គការសិទ្ធិមនុស្សលីកាដូ (Licadho) ប្រចាំខេត្តបាត់ដំបង លោក ហេង សាយហុង ថ្លែងថា ករណីមេភូមិផ្កាស្លា យកដីទីស្នាក់ការភូមិលក់ដូរនេះ ទាមទារឲ្យមានការពិនិត្យដោះស្រាយឡើងវិញ ព្រោះជាទង្វើខុសច្បាប់។ លោកបន្តថា ការលក់ដូរទ្រព្យសាធារណៈនៅក្នុងមូលដ្ឋានភូមិផ្កាស្លា នេះ មេភូមិគួរធ្វើឡើងដោយមានការវាយតម្លៃជាសាធារណៈ និងមានការចូលរួមពីមន្ត្រីគណៈកម្មការចម្រុះថ្នាក់ខេត្តក្រុង៖ «ថាតើយើងលក់របរយកទៅសាងសង់អីធ្វើអី ជាប្រយោជន៍ ត្រូវបង្កើតគណៈកម្មការមួយត្រួតពិនិត្យឲ្យបានច្បាស់លាស់ ហើយប្រាប់ទៅប្រជាពលរដ្ឋថា យើងធ្វើនេះ គឺយើងធ្វើដើម្បីផលប្រយោជន៍សាធារណៈឲ្យប្រជាពលរដ្ឋគាត់បានយល់ផង»។
លោកបន្តថា ករណីមេភូមិផ្កាស្លា យកដីទីស្នាក់ការភូមិលក់នេះ ពុំមែនជាលើកទី១នោះទេ។ ពីមុនមក មេភូមិធ្លាប់បានលក់ដីទីស្នាក់ការភូមិអស់មួយចំនួនរួចហើយ ប៉ុន្តែថវិកាដែលទទួលបានពីការលក់ដីនោះ ពុំបានដាក់ចូកក្នុងផលប្រយោជន៍ក្នុងមូលដ្ឋាននោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។