ផ្ទះសង់ពីឈើប្រក់ស័ង្កសីចំនួន ១០ខ្នង ត្រូវសមត្ថកិច្ចចម្រុះខេត្តមណ្ឌលគិរី អារជើងសសរ ហើយយករថយន្តទាញរំលំចោល ព្រមទាំងចាប់ខ្លួនអ្នកភូមិម្នាក់នៅក្នុងហេតុការណ៍នោះ។ ក្រុមសមត្ថកិច្ចចោទប្រកាន់ថា អ្នកភូមិទាំងនោះថា រឹងរូសមកតាំងទីលំនៅក្នុងតំបន់ព្រៃអភិរក្ស។
នេះ គឺជាលើកទី២ហើយ ដែលសមត្ថកិច្ចចម្រុះបានរុះរើផ្ទះប្រជាពលរដ្ឋ បន្ទាប់ពីមន្ត្រីអាជ្ញាធរបានផ្សព្វផ្សាយ និងដាក់វិធានការឲ្យប្រជាពលរដ្ឋរុះរើផ្ទះចាកចេញពីចំណុចផ្លូវក្រុមហ៊ុនសម្បទានមួយ ឋិតក្នុងដែនជីវចម្រុះសីមា ក្នុងឃុំស្រែឈូក ស្រុកកែវសីមា។
ប្រជាពលរដ្ឋឋិតក្នុងហេតុការណ៍ ឈ្មោះ អាត ខុម ហៅទង្វើរបស់ក្រុមសមត្ថកិច្ចថាជាអំពើឃោរឃៅ ព្រៃផ្សៃ រំលោភសិទ្ធិពលរដ្ឋក្រីក្រ។ គាត់បញ្ជាក់ថា ប្រជាពលរដ្ឋរស់នៅតំបន់ព្រៃភ្នំគ្មានផ្លូវគមនាគមន៍ធ្វើដំណើរ ហេតុនេះអ្នកភូមិឃើញរាជរដ្ឋាភិបាលផ្តល់ដីឲ្យក្រុមហ៊ុន ហើយធ្វើផ្លូវភ្ជាប់តំបន់នោះមកផ្លូវជាតិ ទើបអ្នកភូមិចាកចេញពីភូមិមកតាំងទីលំនៅតាមដងផ្លូវនេះវិញ៖ «ចាប់មនុស្សគេចាប់ដាក់ខ្នោះ ហើយវាយគ្នាឡើងខៀវមុខខៀវមាត់។ សាហាវណាស់ណា! គំរាមកំហែងឲ្យផ្ដិតមេដៃចាប់មេដៃគ្នាឲ្យផ្ដិតទៀត»។
ចំណែកអ្នកភូមិ ឈ្មោះ ង៉ុយ ខាច មានប្រសាសន៍ថា ក្រុមសមត្ថកិច្ចបានចាប់រឹបអូសម៉ូតូប្រជាពលរដ្ឋ បង្ខំឲ្យប្រជាពលរដ្ឋផ្ដិតមេដៃចាកចេញ។ គាត់អំពាវនាវសុំឲ្យប្រមុខរាជរដ្ឋាភិបាលចាត់វិធានការបញ្ឈប់សកម្មភាពរំលោភនេះ និងរៀបចំតំបន់នោះឲ្យប្រជាពលរដ្ឋរស់នៅមានផ្លូវគមនាគមន៍ធ្វើដំណើរ ស្របតាមគោលនយោបាយអភិវឌ្ឍន៍របស់រាជរដ្ឋាភិបាល៖ «ម្សិលមិញគេមកចាប់ប្រពន្ធខ្ញុំ ដើម្បីបង្ខំឲ្យខ្ញុំផ្ដិតមេដៃកាលពីមកលើកទីមួយ បង្ខំខ្ញុំដែរ តែខ្ញុំអត់ផ្ដិតឲ្យ។ ចាប់គ្រៀកដៃខ្ញុំទាំងអស់ ដើម្បីឲ្យខ្ញុំផ្ដិតមេដៃឲ្យបានគេលែងខ្ញុំវិញ។ លែងដោយសារប្រពន្ធកូនខ្ញីហ្នឹងបានលែងណា!»។
ឆ្លើយតបបញ្ហានេះ អភិបាលស្រុកកែវសីមា លោក ស៊ិន វណ្ណវុធ បញ្ជាក់យ៉ាងខ្លីថា នេះគឺជាការអនុវត្តន៍ភារកិច្ចការពារតំបន់អភិរក្សរបស់អាជ្ញាធរពាក់ព័ន្ធ។
កាលពីចុងខែតុលា កន្លងទៅ អាជ្ញាធរចម្រុះស្រុកកែវសីមា បានប្រើប្រាស់វិធានការក្តៅអារជើងសសរ ហើយយករថយន្តទាញរំលំ និងដុតបំផ្លាញផ្ទះអ្នកភូមិចោលអស់ប្រមាណ ៣៧ផ្ទះ បន្ទាប់ពីអ្នកភូមិបាននាំគ្នាបោះបង់ចោលភូមិចាស់នៅក្នុងព្រៃ ហើយនាំគ្នាមកតាំងទីលំនៅតាមបណ្តោយផ្លូវលំ ដែលក្រុមហ៊ុនសម្បទាននៅតំបន់នោះបានកសាងសម្រាប់ការធ្វើដំណើរភ្ជាប់ទៅកាន់ផ្លូវជាតិបានងាយស្រួល។
ប្រធានភូមិអូរព្រះ លោក វន សុខជា មានប្រសាសន៍បញ្ជាក់ថា យុវជនម្នាក់ឈ្មោះ ផល ល័ក្ខ អាយុ ១៩ឆ្នាំ ត្រូវសមត្ថកិច្ចចាប់ខ្លួននៅក្នុងហេតុការណ៍រុះរើលំនៅឋាននោះ។ លោកបន្តថា សមត្ថកិច្ចចម្រុះមានមន្ត្រីខណ្ឌរដ្ឋបាលព្រៃឈើ កងរាជអាវុធហត្ថ និងមន្ត្រីអយ្យការឋិតក្នុងហេតុការណ៍បង្ក្រាប កាលពីថ្ងៃពុធ ទី២៧ វិច្ឆិកា។ ករណីនេះលោកនឹងស្វែងរកកិច្ចអន្តរាគមន៍ពីអ្នកតំណាងរាស្ត្រជួយប្រជាពលរដ្ឋ៖ «គេធ្វើរបស់គេហ្នឹងជាងជំនាន់បីឆ្នាំប្រាំបីខែទៀត គេធ្វើដូចជាហួសហេតុ។ ឃើញប្រជាពលរដ្ឋឲ្យតែឃើញមនុស្សប្រុសៗរកចាប់ដាក់ឡាន»។
នាយខណ្ឌរដ្ឋបាលព្រៃឈើខេត្តមណ្ឌលគិរី លោក កែប តក់ នៅថ្ងៃព្រហស្បតិ៍ ទី២៨ ខែវិច្ឆិកា បដិសេធមិនធ្វើអត្ថាធិប្បាយអ្វីទេ ដោយលោកកំពុងចូលរួមសិក្ខាសាលា។
ទាក់ទិនករណីនេះដែរ មន្ត្រីសម្របសម្រួលសមាគមអាដហុក (Adhoc) ខេត្តមណ្ឌលគិរី លោក សុក រដ្ឋា អំពាវនាវឲ្យក្រុមអាជ្ញាធរប្រើមធ្យោបាយសន្តិវិធីក្នុងការដោះស្រាយបញ្ហាតាំងទីលំនៅរបស់ពលរដ្ឋនោះ។ លោកបញ្ជាក់ថា មិនទាន់មានប្រភពសមត្ថកិច្ចណាបញ្ជាក់ថា យុវជនដែលចាប់ខ្លួនត្រូវបញ្ជូនទៅទីណាទេ។ ករណីនេះ លោកកំពុងស្រាវជ្រាវអង្កេតបន្តទៀត៖ «ការបង្ក្រាបនេះ ហាក់បីដូចជាប្រើអំពើហិង្សាគំរាមបំបាក់ស្មារតីប្រជាពលរដ្ឋនៅក្នុងហ្នឹងណា! យើងកំពុងតាមដានរឿងហ្នឹង ព្រោះរឿងហ្នឹងយើងយកមកធ្វើជាសំណុំរឿង ដើម្បីស៊ើបអង្កេតដែរ។ មិនដឹងថា បច្ចុប្បន្នគេឃុំខ្លួនគាត់នៅកន្លែងណានៅឡើយទេ អ៊ីចឹងណា!»។
ប្រជាពលរដ្ឋនៅតំបន់រងការបង្ក្រាប ឲ្យដឹងថា មានផ្ទះប្រជាពលរដ្ឋប្រមាណ ២០ខ្នងទៀត នៅតំបន់នោះ ត្រូវបានក្រុមសមត្ថកិច្ចកំណត់ពេលមួយសប្ដាហ៍ឲ្យរុះរើ។ បើមិនដូច្នេះ សមត្ថកិច្ចនឹងបង្ខំរុះរើម្តងទៀត។ ទោះជាយ៉ាងនេះក៏ដោយ អ្នកភូមិនិយាយថា ពួកគាត់មិនចាកចេញពីតំបន់នោះទេ ហើយប្រជាពលរដ្ឋដែលត្រូវសមត្ថកិច្ចរុះផ្ទះ ពួកគាត់បានសង់រោងប្រក់សំពត់កៅស៊ូស្នាក់នៅទីនោះបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។