បន្ទាប់ពីបានជួបប្រជុំគ្នា និងថ្លែងសុន្ទរកថារៀបរាប់អំពីការលំបាកផ្សេងៗអស់ជាច្រើនម៉ោង នៅទីធ្លារូបសំណាកលោកយាយដូនពេញរួចមក ពួកគេបាននាំគ្នាដើរហែក្បួនឆ្ពោះទៅសាលារាជធានីភ្នំពេញ ដើម្បីដាក់ញត្តិ។
ស្របគ្នានេះ កម្លាំងសមត្ថកិច្ចជាច្រើនរយនាក់ ក៏ត្រូវដាក់ពង្រាយជាហូរហែចាប់តាំងរមណីយដ្ឋានវត្តភ្នំ បន្តរហូតដល់សាលារាជធានីភ្នំពេញ។ ពួកគេបានរារាំងពលរដ្ឋជាច្រើនលើកច្រើនសា មិនឲ្យហែក្បួន ហើយក៏មានការប៉ះទង្គិចមួយបានកើតឡើង នៅពេលដែលក្រុមអ្នកហែក្បួនបានទៅដល់ខាងមុខសាលារាជធានីភ្នំពេញ។
ប្រជាពលរដ្ឋដែលមានជម្លោះដីធ្លី បានតតាំងគ្នាមួយប្រាវជាមួយកម្លាំងសមត្ថកិច្ចដែលឈរជាជួរបិទផ្លូវ និងរុញច្រានពលរដ្ឋអោយចេញពីផ្លូវព្រះមុនីវង្ស នៅពេលពួកគេព្យាយាមនាំគ្នាហែក្បួនទៅដាក់ញត្តិនៅសាលារាជធានីភ្នំពេញ។
ក្នុងការប៉ះទង្គិចនោះ ពលរដ្ឋបាននាំគ្នាគប់ដបទឹកសុទ្ធទៅលើសមត្ថកិច្ច នៅពេលដែលកម្លាំងសមត្ថកិច្ចដែលប្រដាប់ដោយខែល និងដំបង ព្យាយាមរុញពួកគេអោយចាកចេញបញ្ឈប់ការតវ៉ា។ បន្ទាប់មក សមត្ថកិច្ចក៏បានគប់ដបទឹកសុទ្ធទៅលើក្រុមអ្នកតវ៉ាវិញដែរ។
ក្នុងញត្តិនោះ ពួកគេទាមទារអោយថ្នាក់ដឹកនាំសាលារាជធានីភ្នំពេញ និងភាគីពាក់ព័ន្ធ គិតគូរពីសិទ្ធិលំនៅឋានរបស់ពលរដ្ឋ បញ្ឈប់រាល់ការរំលោភយកដីធ្លី សុំអោយមានការគិតគូរដល់មនុស្សជាតិ មុនគិតពីផលប្រយោជន៍ផ្សេងទៀត។ ស្របគ្នានេះ ក៏បានទាមទារអោយដោះលែង អ្នកស្រី យ៉ោម បុប្ផា សកម្មជនដីធ្លីមកពីតំបន់បឹងកក់ និងសកម្មជនដីធ្លីដទៃទៀតជាបន្ទាន់ និងឥតលក្ខខណ្ឌ។
ក្រុមអ្នកតវ៉ា បានអោយដឹងប្រហាក់ប្រហែលគ្នាថា ពួកគេដែលត្រូវបណ្ដេញចេញពីលំនៅឋានក្នុងរាជធានីភ្នំពេញ បានជួបការលំបាកដែលតែងតែត្រូវមន្ត្រីមានសមត្ថកិច្ចមើលរំលង។ ឆ្លងកាត់បទពិសោធន៍នេះ ពួកគាត់អំពាវនាវអោយរដ្ឋាភិបាលអាណត្តិថ្មី បោះបង់ចោលទម្លាប់ចាស់ និងត្រូវចាប់ផ្ដើមគិតគូរពីសិទ្ធិសេរីភាព និងផលប្រយោជន៍របស់ពលរដ្ឋក្រីក្រ។
របាយការណ៍របស់អង្គការមិនមែនរដ្ឋាភិបាល អោយដឹងថា ប្រជាពលរដ្ឋរស់នៅរាជធានីភ្នំពេញ ច្រើនជាង ១០% ត្រូវបានជម្លៀសចេញពីលំនៅឋានរបស់ពួកគេ ក្នុងរយៈពេលពីរទសវត្សរ៍ចុងក្រោយនេះ។ ដោយឡែក ប្រជាពលរដ្ឋនៅតាមតំបន់ជនបទច្រើនជាង ៤សែននាក់ ទទួលផលប៉ះពាល់ដោយសារវិវាទដីធ្លីចាប់តាំងពីឆ្នាំ២០០៣ មក ដោយសារតែតម្លៃដីធ្លីឡើងថ្លៃខ្ពស់កប់ពពក។ ប្រជាពលរដ្ឋចំនួន ១៥ម៉ឺននាក់ នៅរាជធានីភ្នំពេញ ប្រជាពលរដ្ឋនៅតាមជនបទជាង ៤សែននាក់ គ្មានទីជម្រក។ ភាគច្រើននៃពួកគេ ត្រូវបានគំរាមកំហែង និងបំភិតបំភ័យឲ្យចាកចេញពីលំនៅឋាន និងដីធ្លី។
នៅក្នុងការជួបជុំគ្នានោះ អាជ្ញាធរពុំបានចាត់ទុកការដើរក្បួនហែញត្តិរបស់ពលរដ្ឋ នៅថ្ងៃប្រារព្ធទិវាលំនៅឋានពិភពលោកនេះ ថាជាសិទ្ធិសេរីភាពរបស់ពួកគាត់ឡើយ ប៉ុន្តែថាជាសកម្មភាពបង្កភាពអនាធិបតេយ្យ ប៉ះពាល់សណ្ដាប់ធ្នាប់សាធារណៈ។
យ៉ាងណាក៏ដោយ តំណាងពលរដ្ឋ ៥នាក់ ត្រូវអនុញ្ញាតអោយនាំញត្តិចូលទៅប្រគល់អោយអភិបាលរាជធានីភ្នំពេញ។ ហើយការតវ៉ា ក៏បានរំសាយទៅវិញនៅម៉ោងប្រមាណ ១១ព្រឹក។
ករណីនេះ ក្រុមអង្គការមិនមែនរដ្ឋាភិបាល អ្នកឃ្លាំមើលសិទ្ធិមនុស្ស បានរិះគន់ថា សកម្មភាពរឹតត្បិតការជួបប្រជុំរបស់ពលរដ្ឋនៅពេលនេះ ផ្ទុយនឹងរដ្ឋធម្មនុញ្ញដែលធានាសិទ្ធិ និងសេរីភាពពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។