តំណាងប្រជាពលរដ្ឋ និងអ្នកភូមិនៅឃុំបន្ទាយស្ទោង ស្រុកស្ទោង ខេត្តកំពង់ធំ ជាង ៣០នាក់ ត្រូវខកខានជួបជាមួយអាជ្ញាធរខេត្តដើម្បីរកដំណោះស្រាយដីធ្លី ដែលពួកគាត់ស្នើសុំទុកអាស្រ័យផល ឬដាក់ជាសម្បត្តិរួមកាលពីពេលកន្លងទៅ។ ការខកខាននេះ ដោយសារតែសមត្ថកិច្ចដាក់កម្លាំងជាច្រើនកន្លែង ឃាត់រថយន្តរបស់ពួកគាត់ ដោយខ្លាចនាំគ្នាឡើងទៅភ្នំពេញចូលរួមជាមួយបក្សប្រឆាំង។ ចំណែកស្នងការនគរបាលខេត្តកំពង់ធំ បញ្ជាក់ថា សមត្ថកិច្ចដាក់កម្លាំងដើម្បីត្រួតពិនិត្យច្បាប់ចរាចរណ៍ប៉ុណ្ណោះ មិនបានហាមឃាត់ពួកគាត់ទេ។
តាមគម្រោង តំណាងពលរដ្ឋមានបញ្ហាដីធ្លីនៅឃុំបន្ទាយស្ទោង ៥នាក់ នឹងត្រូវជួបជាមួយអាជ្ញាធរខេត្តកំពង់ធំ នៅព្រឹកថ្ងៃទី៣០ ឧសភា ប៉ុន្តែពួកគាត់ទាំងនោះ រួមនឹងប្រជាពលរដ្ឋប្រមាណ ៣០នាក់ ត្រូវនាំគ្នាត្រឡប់ទៅផ្ទះវិញដោយមិនអស់ចិត្ត។ ការលើកពេលជួបពិភាក្សាគ្នា ក្រោមហេតុផលថា អាជ្ញាធរខេត្តជាប់ប្រជុំ ព្រោះតំណាងពលរដ្ឋទាំងនោះទៅមិនទាន់ពេលកំណត់ ប៉ុន្តែពលរដ្ឋថាដោយសារតែមានសមត្ថកិច្ចរារាំងពួកគាត់។
ពលរដ្ឋនៅឃុំបន្ទាយស្ទោង លោក សិត វឿន ឲ្យដឹងថា នៅពេលអ្នកភូមិចេញដំណើរពីផ្ទះ គឺមានសមត្ថកិច្ចឃាត់រថយន្តជាបន្តបន្ទាប់ចំនួនបួនកន្លែង ដោយសួរនាំខ្លាចប្រជាជនឡើងទៅភ្នំពេញ រហូតធ្វើឲ្យពួកគាត់ត្រូវខកខានមិនបានជួបជាមួយអាជ្ញាធរខេត្តទៀតផង៖ « ខ្ញុំថាមិនត្រឹមត្រូវទេ ព្រោះគេកោះហៅត្រូវតែទៅម៉ង »។
លោកបន្តថា គោលបំណងពលរដ្ឋឡើងទៅខេត្តកំពង់ធំ គឺដើម្បីឲ្យអាជ្ញាធរជួយដោះស្រាយបញ្ហាដីសហគមន៍ភូមិតាម៉ើ ប្រមាណ ២០ហិកតារ ដែលត្រូវបានអភិបាលរងស្រុកស្ទោង ឈូសឆាយរំលោភយកកាលពីឆ្នាំ២០១៤។
តំណាងពលរដ្ឋមួយរូប គឺលោកស្រី សាយ ណាត មានប្រសាសន៍ថា បើទោះបីជាពួកគាត់ប្រាប់សមត្ថកិច្ចតាមផ្លូវថាទៅជួបអាជ្ញាធរខេត្ត តាមការណាត់របស់រដ្ឋបាលសាលាខេត្តក៏ដោយ ប៉ុន្តែសមត្ថកិច្ចជាច្រើនកន្លែងនៅតែរារាំងដំណើរពួកគាត់ដដែល។ លោកស្រីបញ្ជាក់ថា អ្នកភូមិគ្មានបំណងឡើងទៅភ្នំពេញទេ ប៉ុន្តែពួកគាត់ត្រូវទៅជួបអាជ្ញាធរខេត្តតាមការណាត់ប៉ុណ្ណោះ៖ « ព្រោះដីកាកោះហៅខ្ញុំថ្ងៃនេះ ខ្ញុំមកមិនទាន់ពេល។ បានជាមកមិនទាន់ពេល ព្រោះខ្ញុំមកពីព្រឹកដែរ បើគេឃាត់ឡើងបួនកន្លែងហើយ »។
ទាក់ទងបញ្ហានេះ ស្នងការនគរបាលខេត្តកំពង់ធំ លោក ជូ សំអាន មានប្រសាសន៍នៅថ្ងៃទី៣០ ឧសភា ថា តាមពិត សមត្ថកិច្ចតែងដាក់កម្លាំងដើម្បីអនុវត្តច្បាប់ចរាចរណ៍ផ្លូវគោកជាប្រចាំ ប៉ុន្តែអាចអ្នកស្រុកទាំងនោះមិនបានដឹង។ លោកបញ្ជាក់ថា សមត្ថកិច្ចមិនបានរារាំងសិទ្ធិសេរីភាពពួកគាត់ទេ គ្រាន់តែបារម្ភចំពោះសុវត្ថិភាពធ្វើដំណើរ និងការប្រើប្រាស់ផ្លូវប៉ុណ្ណោះ។ លោកបន្ថែមទៀតថា ចំពោះប្រជាពលរដ្ឋមានបំណងឡើងទៅភ្នំពេញ គឺអាជ្ញាធរមិនបានហាមឃាត់ឡើយ ប៉ុន្តែសមត្ថកិច្ចត្រូវការត្រួតពិនិត្យបច្ចេកទេសរថយន្តធ្វើដំណើរទាំងនោះ៖ « គេធ្វើរាល់ថ្ងៃតើ ! ប៉ុន្តែថ្ងៃហ្នឹងយើងធ្វើស្របគ្នានៅទូទាំងខេត្ត។ គេអត់មានឃាត់ទេ »។
ទោះបីជាយ៉ាងណាក៏ដោយ មន្ត្រីអង្កេតអង្គការការពារសិទ្ធិមនុស្សលីកាដូ (LICADHO) ខេត្តកំពង់ធំ លោក ឈួម រុណ មើលឃើញថា ការត្រួតពិនិត្យរថយន្តបើកបរគ្រប់ទីកន្លែង ចំថ្ងៃគណបក្សប្រឆាំងនាំគ្នាយកញត្តិដាក់ថ្វាយព្រះមហាក្សត្រនេះ គឺអាចជាចេតនាមួយដើម្បីទប់ស្កាត់មិនឲ្យពលរដ្ឋឡើងទៅភ្នំពេញច្រើនជាង។ ករណីនេះ លោកយល់ថា នឹងធ្វើឲ្យប្រជាពលរដ្ឋជាច្រើនមិនពេញចិត្ត៖ « អានេះវាជារូបភាពមួយបំបិទសិទ្ធិសេរីភាព ហើយជារូបភាពមួយអាជ្ញាធរហ្នឹងបង្ហាញពីអំណាចរបស់ខ្លួន »។
លោក ឈួម រុណ បន្ថែមទៀតថា ប្រសិនបើសកម្មភាពរារាំងនៅតែបន្តកើតមានឡើង គឺធ្វើឲ្យលទ្ធិប្រជាធិបតេយ្យនៅកម្ពុជា ត្រូវដើរថយក្រោយ ហើយបង្ហាញច្បាស់ថារាជរដ្ឋាភិបាលកំពុងរំលោភសិទ្ធិមនុស្សថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។