អ្នកភូមិឈ្មោះ ស្រី គឹមឡេង អាយុ ៦៣ឆ្នាំ ថ្លែងថា ប្រជាពលរដ្ឋចំនួន ៣៣៥គ្រួសារ មានដីតូចធំខុសគ្នា អាស្រ័យទៅតាមលំនៅឋានដែលពួកគាត់បានកាន់កាប់រស់នៅតាំងពីឆ្នាំ១៩៧៩ មកម្ល៉េះ។ ដីទាំងនោះស្ថិតនៅភូមិបីសង្កាត់ព្រះពន្លា ក្រុងសិរីសោភណ្ឌ ខេត្តបន្ទាយមានជ័យ។ កន្លងទៅនេះ ដីនោះត្រូវបានអាជ្ញាធរខេត្ត មានទិសដៅដកហូតយកធ្វើចំណតរថយន្ត និងស្ថានីយប្រេង។
អ្នកភូមិឈ្មោះ ស្រី គឹមឡេង៖ «គោលបំណងសុំឲ្យអភិបាលខេត្តអនុវត្តតាមចំណាររបស់សម្ដេចមក អ្នកណាមានដីប៉ុណ្ណាវាស់ឲ្យប៉ុណ្ណឹងទៅ ចង់បានប៉ុណ្ណឹងឯង អត់មានចង់បានចំណែកចែកថែមនោះទេ។ សុំឲ្យដីខ្ញុំប៉ុណ្ណាចែកឲ្យខ្ញុំប៉ុណ្ណឹង ប្រជាជនមកតវ៉ាប៉ុណ្ណឹងឯង»។
កាលពីអំឡុងឆ្នាំ២០០០ ប្រជាពលរដ្ឋទាំង ៣៣៥គ្រួសារ បានធ្វើពាក្យបណ្ដឹងដាក់ទៅអាជ្ញាធរដោះស្រាយវិវាទដីធ្លីថ្នាក់ជាតិ ទីស្ដីការគណៈរដ្ឋមន្ត្រី រដ្ឋសភា និងដាក់ជូនទៅលោកនាយករដ្ឋមន្ត្រី ហ៊ុន សែន។
លោក ហ៊ុន សែន កាលពីថ្ងៃទី៣១ ខែសីហា បានសម្រេចថា ដីដែលប្រជាពលរដ្ឋរស់នៅយូរហើយត្រូវតែជាកម្មសិទ្ធិស្របច្បាប់របស់ប្រជាជន មិនអាចដកហូតតាមទំនើងចិត្តបាននោះទេ។ ក្រសួងរៀបចំដែនដី និងនគរូបនីយកម្ម ត្រូវចាត់តាំងមន្ត្រីសុរិយោដីចុះវាស់វែងចេញកម្មសិទ្ធិជូនប្រជាជនតាមដីដែលគាត់ធ្លាប់បានកាន់កាប់ ដើម្បីឲ្យគាត់ស្ងប់ចិត្ត និងកសាងជីវភាពរស់នៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។