ប្រជាពលរដ្ឋមានទំនាស់ដីធ្លីពី ៤សហគមន៍ នៅរាជធានីភ្នំពេញ គឺសហគមន៍បឹងកក់ អតីតអ្នកបឹងកក់ សហគមន៍បុរីកីឡា និងសហគមន៍ថ្មគោលជាង ១០០នាក់ បានលើកគ្នាតវ៉ានៅមុខអង្គភាពប្រឆាំងអំពើពុករលួយ នៅថ្ងៃទី៧ កក្កដា ដោយពួកគេទាមទារឲ្យស្ថាប័នរដ្ឋាភិបាលមួយនេះបើកការស៊ើបអង្កេតករណីអំពើពុករលួយក្នុងរឿងដីធ្លីនៅតំបន់បឹងកក់៖ «នៅពេលនេះយើងគាំទ្រឯកឧត្ដម ឱម យិនទៀង នឹងបញ្ចេញសមត្ថភាពក្នុងការដោះស្រាយចាប់មន្ត្រីពុករលួយទាំងនោះដាក់ពន្ធនាគារ»។
ការតវ៉ានេះផ្ទុះឡើងទី១ គឺបន្ទាប់ពីសកម្មជនដីធ្លីបានដឹងថា លោក ឡៅ ម៉េងឃីន និងលោកស្រី ជឹង សុភាព មានឈ្មោះទទួលប្លង់កម្មសិទ្ធិពីចំណែកដី ១២,៤៤ ហិកតារ ដែលគេបានប្រកាសតាមអនុក្រិត្យថាសម្រាប់អ្នកបឹងកក់ដែរនោះ ។ ទី២ គឺដោយសារក្រុមហ៊ុន ស៊ូកាគូ លក់ដីបឹងកក់ទំហំ ១,៣ ហិកតារ ឲ្យទៅក្រុមហ៊ុន អេចឆ៍.អិល.អេចឆ៍ (HLH) ដោយមានការចុះផ្សាយតាមកាសែតភ្នំពេញប៉ុស្តិ៍ផង ហើយទី៣ នោះគឺបន្ទាប់ពីមានការចាប់ផ្ដើមសង់បន្ទាយប៉េអឹមនៅលើដីជម្លោះនៅតំបន់បឹងកក់ ។
ក្នុងពាក្យបណ្ដឹង ក្រុមអ្នកតវ៉ាបានស្នើឲ្យអង្គភាពប្រឆាំងអំពើពុករលួយបើកការស៊ើបអង្កេតចំពោះបុគ្គល ១២រូបដែលសុទ្ធតែជាមន្ត្រីរដ្ឋាភិបាលហើយដែលពួកគេចោទថាជាប់ពាក់ព័ន្ធនឹងអំពើពុករលួយក្នុងការជួលដី និងកាត់ដីនៅតំបន់អភិវឌ្ឍន៍នបឹងកក់ឲ្យក្រុមហ៊ុន ស៊ូកាគូ ក្នុងនោះមាន លោក ឡៅ ម៉េងឃីន សមាជិកព្រឹទ្ធសភា និង ប្រធានក្រុមហ៊ុន ស៊ូកាគូ លោក លោក កែប ជុតិម៉ា អតីតអភិបាលរាជធានីភ្នំពេញ និង លោក ប៉ា សុជាតិវង្ស អភិបាលរាជធានីភ្នំពេញ ។
ក្នុងចំណោមតំណាង ៥នាក់នៃក្រុមអ្នកតវ៉ាដែលបានចូលយកពាក្យបណ្ដឹងទៅដាក់ជូនអង្គភាពប្រឆាំងអំពើពុករលួយ អ្នកស្រី ទេព វន្នី មានប្រសាសន៍ថា មន្ត្រីអង្គភាពប្រឆាំងអំពើពុករលួយថានឹងពិនិត្យពាក្យបណ្ដឹងហើយនិងតាមដានករណីនេះតទៅទៀត៖ « ខ្ញុំសង្ឃឹមថាប្រសិនបើអង្គភាពប្រឆាំងអំពើពុករលួយ ពិតជាធ្វើការទៅតាមច្បាប់ តាមកាតព្វកិច្ចពិតប្រាកដមែន ខ្ញុំជឿថាមន្ត្រី ដែលពាក់ព័ន្ធដែលមានឈ្មោះក្នុងពាក្យបណ្ដឹងរបស់ខ្ញុំប៉ុន្មាន គឺត្រូវជាប់គុកទាំងអស់ ហើយពួកខ្ញុំនឹងទទួលបាននូវយុត្តិធម៌ និងដំណោះស្រាយទាំងអស់គ្នានៅតំបន់បឹងកក់ » ។
វិវាទដីធ្លីនៅតំបន់បឹងកក់បានអូសបន្លាយអស់រយៈពេលជាង ៧ឆ្នាំកន្លងទៅហើយ ក្រោមរូបភាពអភិវឌ្ឍន៍របស់ក្រុមហ៊ុន ស៊ូកាគូ ហើយក្នុងអំឡុងពេលនេះ សកម្មជនដីធ្លីជាង ១០នាក់បានត្រូវគេចាប់ឃុំខ្លួននិងដាក់គុកជាបន្តបន្ទាប់ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។