ពលរដ្ឋនៅតំបន់បឹងកក់ រួមនឹងអ្នកបុរីកីឡា បានប្រមូលផ្ដុំគ្នាជាថ្មីម្ដងទៀត ដោយក្រុមអ្នកតវ៉ាធ្វើការទាមទាររកដំណោះស្រាយបញ្ហាដីធ្លីរបស់ពួកគេ មុខសាលារាជធានីភ្នំពេញ នៅថ្ងៃទី២ ខែកក្កដា នេះ។
ដោយមិនរំពឹងថា អភិបាលក្រុងភ្នំពេញ លោក ប៉ា សុជាតិវង្ស អាចផ្ដល់ការដោះស្រាយណាមួយដល់ពួកគេបានដូចអ្វីដែលបានសន្យានោះ ក្រុមអ្នកតវ៉ាទាំងនេះបានលើកគ្នាទៅស្វែងរកកិច្ចអន្តរាគមន៍នៅមុខផ្ទះរបស់លោកនាយករដ្ឋមន្ត្រី ហ៊ុន សែន បន្តទៀត។
ប៉ុន្តែ ការស្វែងរកកិច្ចអន្តរាគមន៍នេះ ត្រូវបានអាជ្ញាធររារាំងជាច្រើនសារ ដោយដាក់ពង្រាយកងកម្លាំងសមត្ថកិច្ចប្រមាណជា ២០០នាក់ ប្រដាប់ដោយខែល និងដំបង។
តំណាងអ្នកបឹងកក់ អ្នកស្រី ទេព វន្នី បានសម្ដែងការខកចិត្តទៅលើទង្វើសមត្ថកិច្ច ដែលប្រព្រឹត្តមកលើក្រុមបាតុករ។ ហើយអ្នកស្រីក៏សុំអោយលោកនាយករដ្ឋមន្ត្រី ហ៊ុន សែន ជួយដល់ពួកគាត់ផងដែរ។
អនុប្រធានផ្នែកច្បាប់ និងសិទ្ធិមនុស្សនៃសមាគមអាដហុក (Adhoc) លោក ណៃ វ៉ង់ដា មានប្រសាសន៍ថា លោកចង់អោយកងកម្លាំងសមត្ថកិច្ចជៀសវាងអោយបានការប្រើហិង្សាជាមួយក្រុមបាតុករ ដែលភាគច្រើនជាស្ត្រី។
ក្នុងហេតុការណ៍នៃការទាមទារនេះ កម្លាំងសមត្ថកិច្ចរុញច្រានអ្នកតវ៉ាបង្កអោយរងរបួសស្រាលជាច្រើននាក់។
ខណៈពេលដែលក្រុមអ្នកតវ៉ាបញ្ហាដីធ្លីកំពុងប្រឈមមុខនឹងក្រុមសមត្ថកិច្ច ការឃោសនារកសំឡេងឆ្នោតរបស់គណបក្សប្រជាជនកម្ពុជា ឃោសនានៅសួនច្បារវត្តបទុមវតី ដែលមានប្រគំតន្ត្រី និងសម្រែកជ័យរបស់ខ្លួននៅក្បែរនោះ ដំឡើងសំឡេងរបស់ខ្លួនកាន់តែខ្លាំង។
ទោះបីជាមានការរារាំងពីអាជ្ញាធរយ៉ាងណាក៏ដោយ ក្រុមអ្នកតវ៉ាដីធ្លីតំបន់បឹងកក់ និងបុរីកីឡា នៅតែប្ដេជ្ញារួមគ្នាធ្វើការទាមទារបន្តទៅទៀត លុះត្រាតែពួកគាត់ទទួលបានដំណោះស្រាយល្អប្រសើរពីរដ្ឋាភិបាល។
កាលពីរសៀលថ្ងៃទី១ ខែកក្កដា ការប៉ះទង្គិចមួយបានកើតឡើងរវាងក្រុមសមត្ថកិច្ច និងអ្នករងគ្រោះដីធ្លី ដោយបង្កអោយស្ត្រីបឹងកក់ ពីរនាក់ គឺអ្នកស្រី ខែក ចាន់រស្មី អាយុ ៣៣ឆ្នាំ ដែលមានផ្ទៃពោះទើបតែពីរខែកន្លះ រលូតកូនខណៈដែលអ្នកស្រីចូលជួយអ្នកតវ៉ាដទៃទៀត។ ហើយ អ្នកស្រី បូវ សោភា អាយុ ៣៦ឆ្នាំ រងរបួសត្រង់ពោះ។ ហើយនៅថ្ងៃទី២៩ ឧសភា ក្រុមអ្នកតវ៉ាបានធ្វើបាតុកម្មនៅមុខសាលារាជធានីភ្នំពេញ អាជ្ញាធរបានប្រើរថយន្តពន្លត់អគ្គិភ័យចំនួន ៣គ្រឿង បាញ់ទឹកសន្ធាប់ទៅលើពួកគាត់ ដែលបណ្ដាលឲ្យស្ត្រី ៣នាក់ សន្លប់នៅនឹងកន្លែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។