ជនរងគ្រោះដីធ្លីដែលរួមមានអ្នកភូមិបឹងកក់ អតីតអ្នកភូមិបឹងកក់ និងអ្នកភូមិបុរីកីឡា សរុបប្រមាណ ១០០នាក់ នៅព្រឹកថ្ងៃទី១ ខែកក្កដា នេះ បានធ្វើបាតុកម្មបិទមហាវិថីព្រះមុនីវង្ស នៅមុខសាលារាជធានីភ្នំពេញ ដោយពួកគេទាមទារឲ្យមានដំណោះស្រាយជាបន្ទាន់ពីរាជរដ្ឋាភិបាល ឲ្យបានមុនពេលបោះឆ្នោត។ ក្រុមបាតុករបានទាមទារឲ្យសាលារាជធានីភ្នំពេញ គោរពតាមពាក្យសន្យាដែលថានឹងផ្តល់ដំណោះស្រាយសមរម្យជូនពួកគេ។
អ្នកស្រី ទេព វន្នី តំណាងអ្នកភូមិបឹងកក់ បានមានប្រសាសន៍ថា អ្នកស្រី និងអ្នកភូមិបឹងកក់ ដទៃទៀត មកតវ៉ាឲ្យសាលារាជធានីចាត់ចែងផ្តល់ដំណោះស្រាយឲ្យបានមុនពេលមានរដ្ឋាភិបាលថ្មី៖ «ពួកខ្ញុំមកត្រូវការយុត្តិធម៌ ការដោះស្រាយជាបន្ទាន់ មិនត្រូវការពន្យារពេល និងកុហកបោកប្រាស់ដូចកាលជំនាន់ឯកឧត្តម កែប ជុតិមា ទេ។ ឥឡូវរហូតមកដល់ពេលនេះ ខ្ញុំឃើញថាឯកឧត្តម ប៉ា សុជាតិវង្ស មិនទាន់ឃើញមានឆន្ទៈណាមួយគោរពតាមអនុសាសន៍ខ្លួនឯង ថានឹងប្ដេជ្ញាដោះស្រាយជូនប្រជាពលរដ្ឋអត់ឃើញមានទាំងអស់»។
អតីតអ្នកភូមិបឹងកក់ អ្នកស្រី ស៊ា ណារ៉េត បានមានប្រសាសន៍ថា ថ្វីបើអ្នកស្រីទទួលបានសំណងចំពោះការបណ្ដេញចេញពីដីធ្លីរបស់អ្នកស្រីហើយក៏ដោយ ក៏អ្នកស្រីមិនទាន់សុខចិត្តនោះឡើយ ព្រោះនោះគឺជាការទទួលយកទាំងបង្ខំ ហើយសព្វថ្ងៃអ្នកស្រីកំពុងរស់នៅក្នុងស្ថានភាពលំបាក៖ «ខ្ញុំចង់ឲ្យសាលាក្រុងដោះស្រាយជម្រកឲ្យខ្ញុំ ឲ្យខ្ញុំមានជម្រកសមរម្យដូចគេឯង ព្រោះគាត់ឲ្យសំណងខ្ញុំនៅពេលចាកចេញទៅហ្នឹង គឺសំណងមិនសមរម្យទេ ខ្ញុំទទួលយកដោយការបង្ខំចិត្តដោយការគំរាមកំហែង»។
ចំណែកអ្នកភូមិបុរីកីឡា វិញ ក៏បានចូលរួមជាមួយអ្នកភូមិបឹងកក់ ទទូចទាមទារឲ្យសាលារាជធានីភ្នំពេញ ពន្លឿននីតិវិធីដោះស្រាយជូនពួកគេផងដែរ។
អ្នកស្រី ជុំ ង៉ាន់ តំណាងអ្នកភូមិបុរីកីឡា បានត្អូញត្អែរថា ស្ថានភាពរស់នៅរបស់ពួកគាត់កំពុងមានភាពលំបាកខ្លាំង ដោយត្រូវរស់នៅក្រោមតង់ និងកម្តៅក្តៅហែង៖ «ឯកឧត្តម ប៉ា សុជាតិវង្ស ដែលគាត់ឡើងថ្មីហ្នឹង គាត់បានសន្យាជាមួយពួកខ្ញុំ ថានឹងដោះស្រាយឲ្យពួកខ្ញុំមុនពេលបោះឆ្នោត ប៉ុន្តែមកដល់ពេលនេះហើយ គាត់មិនទាន់បានដោះស្រាយ។ ដូច្នេះ ពួកខ្ញុំមកទាមទារឲ្យដោះស្រាយមុនពេលបោះឆ្នោត»។
វិទ្យុអាស៊ីសេរី មិនអាចទាក់ទងសុំការបំភ្លឺពីមន្ត្រីនាំពាក្យនៃសាលារាជធានីភ្នំពេញ លោក ឡុង ឌីម៉ង់ ត្រឹមរសៀលថ្ងៃទី១ នេះបានទេ ដោយលោកមានប្រសាសន៍ថា កំពុងជាប់ប្រជុំ។
មន្ត្រីជាន់ខ្ពស់របស់អង្គការលីកាដូ (Licadho) លោក អំ សំអាត យល់ថា រដ្ឋាភិបាលគួរណាស់តែព្យាយាមពន្លឿនការងាររបស់ខ្លួនក្នុងការរកដំណោះស្រាយជូនពួកគេ ដើម្បីបង្ហាញថា រដ្ឋាភិបាលមានឆន្ទៈក្នុងការអនុវត្តគោលនយោបាយដីធ្លីរបស់គណបក្សខ្លួន៖ «សាលារាជធានីភ្នំពេញ ក៏ដូចជារដ្ឋាភិបាល គួរតែប្រញាប់រួសរាន់ដោះស្រាយបញ្ហាហ្នឹងឲ្យបានចប់មុនការបោះឆ្នោត។ នៅពេលដែលមានការឃោសនាបោះឆ្នោត ហើយមានការតវ៉ា អានេះគឺវាធ្វើឲ្យមានការច្របូកច្របល់ច្រើន ហើយវាប៉ះពាល់ទៅដល់សន្តិសុខ សណ្ដាប់ធ្នាប់ ក៏ដូចជាការឃោសនាបោះឆ្នោត»។
កាលពីថ្ងៃទី២៩ ឧសភា កន្លងទៅ ក្រុមអ្នកតវ៉ាបានធ្វើបាតុកម្មម្ដងមកហើយនៅមុខសាលារាជធានីភ្នំពេញ កាលនោះអាជ្ញាធរបានប្រើរថយន្តពន្លត់អគ្គិភ័យចំនួន ៣គ្រឿង បាញ់ទឹកសន្ធាប់ទៅលើពួកគាត់ ដែលបណ្ដាលឲ្យស្ត្រី ៣នាក់ សន្លប់នៅនឹងកន្លែង។
នៅរសៀលថ្ងៃដដែលនោះដែរ មានការប្រទាញប្រទង់គ្នារវាងសមត្ថកិច្ច និងបាតុករ ដែលបានធ្វើឲ្យស្ត្រី ២នាក់រងរបួស ក្នុងនោះស្ត្រីម្នាក់ គឺអ្នកស្រី ខែក ចាន់រស្មី អាយុ ៣៣ឆ្នាំ ដែលមានផ្ទៃពោះ ២ខែកន្លះផងនោះរលូតកូន ហើយស្ត្រីម្នាក់ទៀតឈ្មោះ បូវ សោភា អាយុ ៣៦ឆ្នាំ រងរបួសចំពោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។